05/09/2026
Məktəbəqədər dövrdə peyvəndlər və məktəbəqəbul ərəfəsində tibbi müayinələr niyə vacibdir?
Mingəçevir Şəhər Mərkəzi Xəstəxanasının həkim-pediatrı Könül Zeynalova məktəbəqədər yaş dövründə uşaqlara tətbiq olunan peyvəndlər və məktəbəqəbul ərəfəsində tövsiyə olunan tibbi müayinələr barədə valideynlərə məlumat verib.
Həkim bildirib ki, peyvəndlər uşaqların sağlamlığının qorunmasında mühüm rol oynayır. Azərbaycan Respublikasının profilaktik peyvənd təqviminə əsasən uşaqlar müxtəlif yaş dövrlərində bir sıra yoluxucu xəstəliklərə qarşı vaksinasiya olunur.
Məktəbəqədər dövrdə xüsusilə 18 aylıqda göyöskürək, difteriya və tetanusa qarşı GDT, həmçinin poliomielitə qarşı bOPV tətbiq edilir. 6 yaşda isə qızılca, epidemik parotit və məxmərəyə qarşı QPM, eləcə də difteriya və tetanusa qarşı DT peyvəndləri aparılır.
👩⚕️ Pediatr qeyd edib ki, məktəbəqəbul ərəfəsində uşağın ümumi sağlamlıq vəziyyətinin qiymətləndirilməsi də vacibdir. Profilaktik müayinə zamanı uşağın fiziki inkişafı, görmə və eşitmə qabiliyyəti, dayaq-hərəkət sistemi, ağız-diş sağlamlığı və digər göstəricilər qiymətləndirilə bilər. Zərurət olduqda pediatr uşağı müvafiq ixtisaslı həkimlərə yönləndirir.
🔹 Məktəbəqəbul öncəsi əsas məqsəd uşağın sağlamlıq vəziyyətində mövcud olan problemləri vaxtında aşkar etmək, onların məktəb mühitinə uyğunlaşmasına və təhsil prosesində sağlam şəkildə iştirakına şərait yaratmaqdır.
Unutmayaq: sağlam məktəb başlanğıcı sağlam gələcəyin ilk addımlarındandır! 💙
