17/10/2026
پریس ریلیز
ڈی ایچ کیو ہسپتال گاہکوچ کی انتظامیہ سوشل میڈیا پر گردش کرنے والی ایک مبہم اور دھمکی آمیز وڈیو کے حوالے سے عوام اور ذرائع ابلاغ کے سامنے اصل حقائق پیش کرتے ہوئے اس کی سخت الفاظ میں تردید کرتی ہے۔ وڈیو میں مذکورہ شہری کی جانب سے عائد کیے گئے تمام الزامات من گھڑت، بے بنیاد اور حقیقت سے بالکل بعید ہیں۔
واقعات کی تفصیل کے مطابق مذکورہ شہری او پی ڈی میں آمد کے وقت ڈاکٹر کے آ فس کے باہر نمبر جاری کرنے والا گریڈ 1 اس وقت وہاں ایک ضروری انتظامی دستاویز کی منتقلی کے لیے چند منٹوں کے لیے ایم ایس آفس گیا ہوا تھا۔ اس مختصر غیر موجودگی کے دوران مذکورہ شخص نے 2 منٹ انتظار نہ کر کے ڈاکٹر کے کمرے کے باہر جمع دیگر مریضوں اور ان کے لواحقین کے سامنے خود کو ایک سیاسی نمائندہ ظاہر کرتے ہوئے باآوازِ بلند اشتعال انگیز اور دھمکی آمیز گفتگو شروع کر دی۔ مذکورہ شخص نے نہ صرف ہسپتال کے ڈاکٹروں اور طبی عملے کے خلاف نازیبا الفاظ استعمال کیے بلکہ وہاں موجود دیگر مریضوں کو بھی انتظامیہ کے خلاف ورغلانے اور نظم و ضبط خراب کرنے کی کوشش کی۔
ہسپتال کے او پی ڈی میں غیر ضروری شور و غوغا، ہنگامہ آرائی اور دیگر مریضوں کے معائنے میں شدید خلل پڑنے پر ڈیوٹی پر موجود ڈاکٹر نے فوری طور پر سکیورٹی اہلکاروں کو طلب کیا۔ سکیورٹی اہلکار نے اپنی قانونی اور پیشہ ورانہ ذمہ داری نبھاتے ہوئے مذکورہ شخص کو باقاعدہ احترام اور حکمتِ عملی سے وہاں سے ہٹایا تاکہ دیگر مریضوں کی دیکھ بھال اور علاج کا عمل متاثر نہ ہو۔
اس واقعے کے فوراً بعد مذکورہ شخص نے خود ساختہ اور یکطرفہ وڈیو بنا کر سوشل میڈیا پر وائرل کی، جس میں اس نے یہ دعویٰ کیا کہ اسے ہسپتال کے خلاف پہلے سے شکایات موصول ہو رہی تھیں۔ انتظامیہ یہ واضح کرنا چاہتی ہے کہ اگر موصوف کے پاس کوئی تعمیری تنقید یا شکایت تھی تو بحیثیت ایک ذمہ دار شہری انہیں قواعد و ضوابط کے تحت ہسپتال انتظامیہ یا ایم ایس آفس سے رجوع کرنا چاہیے تھا نہ کہ او پی ڈی میں مریضوں کے سامنے ہنگامہ آرائی کی جاتی۔
مزید برآں وڈیو میں مذکورہ شخص کی جانب سے ہسپتال کو بند کروانے کی دھمکی دی گئی ہے جو کہ انتہائی مضحکہ خیز، خلافِ قانون اور عوامی مفاد عامہ کے شدید منافی ہے۔ ہسپتال ایک بنیادی اور حساس قومی ادارہ ہے جسے کسی فردِ واحد کی دھمکیوں سے یرغمال نہیں بنایا جا سکتا۔ڈاکٹرز کو صرف او پی ڈی نہیں ایمر جینسی اور ایڈمٹ مریضوں کو بھی دیکھنا ہوتا ہے ۔۔
انتظامیہ اس امر پر گہرے دکھ اور تشویش کا اظہار کرتی ہے کہ متعدد سوشل میڈیا پیجز اور صارفین نے واقعے کی سچائی اور دوسرے فریق کے موقف کی تصدیق کیے بغیر اس یکطرفہ وڈیو کو شیئر کرنا شروع کر دیا۔ صحافتی اخلاقیات اور قانون کے طے شدہ اصولوں کے خلاف اس عمل پر ہسپتال انتظامیہ بے بنیاد پروپیگنڈا کرنے والے فرد اور بغیر تصدیق خبریں پھیلانے والے تمام پیجز کے خلاف قانونی چارہ جوئی کا پورا حق محفوظ رکھتی ہے۔
ڈی ایچ کیو ہسپتال گاہکوچ اپنے محدود وسائل اور مریضوں کی تعداد کے شدید دباؤ کے باوجود علاقے کے تمام شہریوں کو بہترین اور بروقت طبی سہولیات فراہم کرنے کے لیے دن رات کوشاں ہے۔ ہسپتال کے تمام ڈاکٹرز اور پیرامیڈیکل اسٹاف روزانہ مقررہ حد سے کہیں زیادہ مریضوں کا پوری پیشہ ورانہ ذمہ داری اور شفقت سے معائنہ کرتے ہیں۔
عوام الناس سے اپیل کی جاتی ہے کہ وہ ہسپتال انتظامیہ اور ڈاکٹروں کی انتھک محنت کا احترام کریں اور سوشل میڈیا کے گمراہ کن پروپیگنڈے کا شکار نہ ہوں۔ اگر کسی شہری کو ہسپتال کی خدمات سے متعلق کوئی شکایت یا بہتری کے لیے تجاویز ہوں تو وہ زبردستی ہنگامہ آرائی کرنے کے بجائے باضابطہ درخواست کے ذریعے متعلقہ اعلیٰ حکام سے رجوع کرے۔
منجانب:
انتظامیہ
ڈی ایچ کیو ہسپتال گاہکوچ
