16/04/2026
- لو جالك روشته لوحده لسه والده ومكتوبلها هيربانا ( أعشاب لزيادة إفراز اللبن ) مثلا
وتحته موتيليوم ( دومبريدون ) وحد سالك دا مكتوب ليه أوعي تقوله دا عشان الترجيع عشان هيقولك بس هيا مابترجعش
هوا مكتوب هنا عشان يذود إفراز اللبن
- لو جاللك روشتة من دكتور جلديه مكتوب فيها ازماكاست او كوكاست ( مونتيلوكاست )والمريض سالك دا بتاع ايه اوعي تقوله للحساسية الصدرية عشان هيقولك بس أنا ماعنديش حساسية صدرية هوا مكتوب هنا عشان الإكزيما
ولو جالك برضو ازماكاست او كوكاست ( مونتيلوكاست )وبدائلهم في روشتة انف وأذن مع بخاخة للجيوب الانفيه مثلا هوا هنا مكتوب للجيوب الأنفية
- لو جالك روشتة لواحده ست ومكتوب لها تامسولين ( تامسيلوسين )وسألتك دا بتاع ايه اوعي تقولها للبروستاتا
هوا مكتوب هنا عشان إرخاء عضلات المثانة والحالب فبيعالج احتباس البول وبيسهل طرد حصوات الحالب الصغيرة
- لو جالك روشتة من دكتور باطنة مكتوب فيها سيبرالكس او سيبرا برو (إسيتالوبرام ) والمريض سألك دا بتاع ايه اوعي تقوله مضاد للإكتئاب
عشان هيقولك بس أنا ماعنديش إكتئاب
ولكن قوله دا مهدئ وبيحسن المود
اي مريض بياخد ادوية كتيرة وعنده أمراض مزمنة كتيرة بيأثر علي حالته النفسية وبالتالي بيتكتبله حاجة مضاده للإكتئاب بس الدكتور مابيقولوش انت عندك إكتئاب وبالتالي انت كمان ماتقولوش
- لو جالك روشتة من دكتور كلي ومسالك مكتوب فيها فورسيجا ( داباجليفلوزين ) او بدائله والمريض سألك دا بتاع ايه اوعي تقوله دا للسكر عشان غالبا هيقولك بس أنا ماعنديش سكر
هوا مكتوب هنا عشان وظائف الكلي وامراض الكلي المزمنة
ولو فورسيجا ( داباجليفلوزين )من دكتور قلب يبقي مكتوب عشان قصور القلب
- لو جالك روشتة من دكتور نسا مكتوب فيها جلكوفاج ( ميتفورمين ) والمريضة سألتك دا بتاع ايه اوعي تقوله دا بتاع سكر عشان غالبا هتقولك بس أنا ماعنديش سكر
هوا مكتوب هنا عشان تكيس المبايض او لزيادة الحرق والتخسيس
- لو جاتلك واحده من بتوع التيك توك بتسأل علي زالاتان ( لاتانوبروست ) قطرة اوعي تقولها لإرتفاع ضغط العين هيا عايزاها عشان تطويل الرموش والحواجب
- لو جالك روشتة من دكتور جلدية مكتوب فيها جينيرا والمريضة سألتك دا بتاع ايه اوعي تقولها مانع للحمل
عشان غالبا هتقولك أنا آنسة اساساً منع حمل ايه !
هوا مكتوب هنا عشان حبوب الشباب عشان تنظيم الهرمونات
- لو جالك روشتة من دكتور أسنان مكتوب فيها فلاجيل ( ميترونيدازول ) او امريزول والمريض سالك دا بتاع ايه اوعي تقوله مطهر معوي
هوا مكتوب هنا عشان البكتريا اللا هوائية
ولو من دكتور نسا يبقي مكتوب لعدوي مهبلية بسبب طفيليات
لو واحد هيعمل منظار ع القولون
وجاي ياخد ابيماج ( مغنسيوم سيترات ) اوعي تقوله دا بتاع أملاح عشان هيقولك بس أنا ماعنديش أملاح
هوا هنا هياخده ك ملين للتحضير قبل المنظار
