10/09/2026
المضادات الحيوية (ليزونتِبيوتيك) ماشي سكاكر؛ الاستهلاك العشوائي تعهم يرجعهم من دواء يدير الشفاء لخطر يهدد الصحة.
⚠️ ماشي أي وعكة لازمها "أنتيبيوتيك"! ⚠️بزاف منّا غير يحس بشوية (سخانة، لاغريب، ولا سطر في الحلقوم) يجري ديريكت للفارماسي يشري "مضاد حيوي" (Antibiotique) ولا يكمل هذاك الشريط اللي بقالو مخبي في الدار.
للأسف، هاد التصرف راهو #خطر كبير على صحتك وصحة أولادك!
علاش لازم نحبسوا هاد العقلية تاع "دواك من راسك"؟ ❌ما يداويش الفيروسات: لاغريب، ومعظم نزلات البرد والتهابات الحلق السبة تعهم فيروس.
ليزونتيبيوتيك يقتلوا البكتيريا برك، يعني كي تشربهم في الفيروسات ماراحش يفيدوك كامل.
البكتيريا تولي #قاوية (المقاومة): كي تشرب مضاد حيوي بلا سبة، البكتيريا راح تتعرف عليه وتطور روحها باش تقاومه. والنتيجة؟
نهار تمرض بصح وتحتاجه، ماراحش يقضي عليها وتولي في مشاكل كبار.يقتل البكتيريا النافعة: الكرش تعنا فيها بكتيريا مليحة تعاون في الهضم وتحمي المناعة.
كي تشرب الأنتيبيوتيك #عشوائياً، راح تقتلها وتسبب لروحك مشاكل في الماكلة وتضعف مناعتك.
الأعراض الجانبية: كاين اللي يديرلهم حساسية واعرة، إسهال، ومع الوقت يتعبوا الكلاوي والكبدة.
القاعدة الذهبية باش تحمي روحك: 🩺ما تشرب حتى مضاد حيوي بلا استشارة الطبيب، وكي يكتبهولك، كمل السيرو ولا لبوّاطة تع الدوا حتى للتالي، ماشي غير تحس روحك ترفدت تحبسو!
قولولنا في التعليقات: شكون فيكم اللي كان يشرب كلاموكسيل ولا ارڤمونتان من راسه غير يحكمه السطر؟ 🤔
#ليزونتيبيوتيك
