04/09/2026
وشحال تلقاي الحمى تاع وليدك ولا بنتك و تبداي تتخلعي؟
كل ليلة في الاستعجالات نشوفو أولياء داخلين في حالة هلع لأن ولدهم بالخمى. نفهم خوفكم، بصح لازم تعرفو بلي الحمى وحدها ماشي هي الخطر، وإنما الخطر هو حالة الطفل العامة.
إذا كان الطفل راه واعي، يلعب، يشرب الماء، ويتنفس عادي، ففي أغلب الحالات ما كاش داعي للذعر. يكفي تعطوه السوائل، تلبسوه لباس خفيف، وتستعملو خافض حرارة مناسب إذا كان متضايق.
بصح لازم تروحو للاستعجالات فورًا إذا:
* الطفل أقل من 3 أشهر وعنده حرارة 38.5 أو أكثر.
* عنده صعوبة في التنفس.
* عنده تشنجات.
* راه خامل بزاف، ما يفيقش مليح، ولا ما بقاش يتفاعل.
* يرفض يشرب نهائيًا أو عنده علامات جفاف (قلة البول، جفاف الفم، بكاء بلا دموع).
* عنده قيء متكرر، طفح جلدي غريب، ولا صداع شديد مع تيبس في الرقبة.
* الحمى بقات أكثر من 48 إلى 72 ساعة أو الحالة راهي تزيد تسوء.
ونحب نطمنكم: الحمى وحدها ما تسببش شلل دماغي ولا إعاقة ذهنية. وكاين أطفال عندهم قابلية يديرو تشنج حراري، لكنه في أغلب الحالات يكون بسيط وما يخلفش أضرار دائمة.
ثقوا في طبيبكم، لأنه ما يعالجش الرقم اللي يبان في الترمومتر، وإنما يقيم حالة الطفل كاملة ويقرر إذا كانت تحتاج علاجًا مستعجلًا أو لا.
