20/05/2026
للجدد واللي ماشي فاهمين السيلياك مليح خلي نبسطهالكم 💃✨
عندنا هنا في الفوطو لمصارين تاع مسعودة 🌚 مسعودة سيلياكية وبلا ما تعرف تاكل القمح والعجائن يوميا
لمصران تاع مسعودة يفكك القمح ويخرج منو مادة اسمها لغلوتين جاية من كلمة gleu اللي هي صمغ واللي معناها زغبات مسعودة اللي يمصو الاكل في لمصارن مساكن رجعو يتلاصقو بيه، حتى وتشرب الماء ولا تاكل لعجب ما راحش يتنحى لغلوتين بسهولة راه لاصق في سطح الزغبات
جهاز مسعودة المناعي مسكين اكتشف بلي كاين حاجة راهي لاصقة في المصران تديرلو الضرر مالا طلق عليها الجنود تاعو يقضيو عليها، ومادام الغلوتين لاصق في الزغبات معناها باش يتنحى لازم يتنحى معاه جزء من الزغبات
وتتكرر العملية كل ما تاكل مسعودة القمح حتى تمسحوا زغباتها نهائيا
بعدما عرفت مسعودة مرضها والتزمت بالحمية لأشهر بداو الزغبات يبراو ويخرجو، مي مسكينة تشهات حبة قاطو وكسرت الريجيم
السؤال لي يطرحوه الاغلبية لي ماشي فاهمين هل تعب مسعودة راح كامل في حبة قاطو؟
الاجابة لا! كيما راكم تشوفوا في الفوطو الزغبات منتشرة بشكل واسع وأوسع من أنو تتغطى كامل بحبة قاطو...ايه تلصق في جزء بسيط من الزغبات وتتضرر ضرر بسيط وموضعي بصح ماشي كيما راه شائع
واذا ضربت مسعودة طبسي شخشوخة تتغطى كمية اكبر من الزغبات ويصرى ضرر واسع مي مش رح تتمسح الزغبات بكاملها في وجبة وحدة، لازم سنوات من التكرار باش تختفي
الدكتورة صالحي مريم
