22/08/2022
ما ترنش على حد أكتر من مرتين متتاليتين
لو كنسل في المرة الأولى ما ترنش عليه تاني
ما تكررش المحاولة قبل ٣ ساعات
ما ترنش على حد خارج وقت العمل
ما تبعتش ريكورد ع الواتس أطول من دقيقة
ما تبعتش رسالة أكتر من ١٠ سطور
ما تبعتش فايل أكتر من ١٠ صفحات
ما تطلبش حاجة مجانية من حد بيبيعها بفلوس
ما تطلبش من حد يرشح لك حد في مجاله
ما أبقاش أنا دكتور عظام . وتطلب مني أرشح لك دكتور عظام !!
ما تسألش حد عن تقييم صديقه للقيام بعمل
افرض صديقه خايب في شغله . عاوزه يقول لك إيه ؟!
ما تطلبش حاجة مجانية من حد
ما تفكرش حد بحاجة مجانية طلبتها منه وما عملهاش
ما تطلبش تقابل حد طالما الواتس والتليفون كافيين
ما تطلبش تقابل حد في شغل إلا إذا كانت مصلحة مشتركة
ما تطلبش تقابل حد في استشارة من غير ما تسأله عن أتعابه
اللي يبعت لك إيميل . رد ع الإيميل . مش تكلمه ع الواتس
اللي يكلمك ع الواتس . كلمه ع الواتس . مش تتصل بيه على التليفون
الستات بنقول لهم يا فندم . أو يا أستاذة
مش يا مدام . أو يا آنسة
ما ينفعش تمد إيدك بالسلام لست
لو مقابل ست في طريق . إيدك اللي ناحيتها بتحطها ورا ضهرك
لو ماشي وسط ستات . بتحط ايدك الاتنين قدام جسمك
الرجالة بنقول لهم حضرتك . ويا أستاذ
ويا فندم
ما تقولش لحد يا بيه . أو يا باشا
اللي يقول لك ( إنتا ) . ما تقولوش ( حضرتك )
اللي تكرهه . ما تقولوش ( حضرتك )
فيه ناس هتناديك باسمك مجرد . عادي . مش عيب . بيعتبر نوع من الجنتلة بين الناس الكبيرة
لكن . إنتا بردو نادي له باسمه مجرد . إلا إذا كان فرق السن بينكم كبير . ٢٠ سنة مثلا
الكبير في السن يعمل اللي هوا عاوزه
لو هتعطي مثال بحاجة وحشة . قوله على نفسك
يعني نقول مثلا ( افرض إن أنا خسرت في مشروعي . يبقى كذا كذا )
لكن ما تقولوش ( افرض إنك خسرت ... )
المسيحيين بنبدأ الكلام معاهم ب ( صباح / مساء الخير )
وبنقفل الكلام معاهم ب ( مع السلامة )
لو حد جاي لك بلدك . هوا اللي يحدد يقابلك فين
لو حد جاي لك بلدك . يتأخر براحته . المسافر ليه عذره
اللي طالب المقابلة هوا اللي يحاسب ع المشاريب
لو حد جاي لك بلدك . لازم تأكله
لو حد عزم عليك بأكل وإنتا في بلده . العزومة دي بتتقبل عادي
لما تتسأل تاكل إيه في العزومة . قول ( هاكل زي ما إنتا هتاكل . بس ما تجيبش حاجة تتساب ما تتاكلش ) عشان ما يأفورش في الطلبات
أيا كان طعم الأكل . لازم تمدحه
أيا كان المكان اللي عزمك فيه . لازم تمدحه
لو مش عاوز تغرم اللي مضيفك في مطعم . اطلب ( وجبات ) . دي أكتر حاجة ما بتضربش الميزانية
لكن لو طلبت طلبات مفتوحة هتغرم جامد
لو بيعزم عليك بمشروب . اطلب قهوة أو شاي . بلاش المشروبات اللي مكونة من أكتر من ٦ حروف . باستثناء الاسبريسو . وابعد عن أي كوكتيل أي حاجة
الكلام ما بيبدأش في الموضوع . لازم تتكلم في أي حاجة بعيدة عن الموضوع الأول
الطريق كان عامل إيه . شفت المول اللي على أول الشارع . بيبنوا فيه من أيام ٦٧
دا اسمه ice breaking
إنتا من دمياط . دانا خالتي متجوزة من دمياط
يا سلام بقى لما بنروح راس البر ونجيب مشبك من بلبول . ولا فطير من أبو طبل
تعرف إن الفيلل هناك اسمها عشش
أصلها كانت عشش زمان
وبعدين تدخلوا في الموضوع
لو اللي بيكلمك تليفونه رن . قول له ( اتفضل رد )
خلال المقابلة . خلي تليفونك صامت . ووشه لتحت
ما تبصش في الساعة وإنتا في مقابلة . معناها إنك زهقت
لو اللي قدامك زهق . انهي المقابلة بسرعة
لو قلت كلمة وشكيت إنها اتفهمت غلط . اشرحها بشكل واضح ومباشر
لو اللي قدامك قال كلام يتفهم بأكتر من معنى . قول له ( أنا مش فاهم حضرتك )
لو حد كان في بلدك والدنيا ليلت جامد . بتحجز له في فندق
لو حد كان معاك وسابك وسافر . اطلب منه يبلغك لما يوصل . واعتبره في عهدتك لحد ما يوصل . ويستحسن تاخد رقم حد من أهله
لو العربية فخمة . بنركب الشخص الكبير ورا
لو اقتصادية . بنركب الشخص الكبير قدام
لما بتركب حد العربية . ما تعطيش ضهرك للعربية لحد ما يمشي
لو شخص كبير دخل عليك مكتبك . بتسيب الكرسي اللي ورا المكتب . وتقعدوا إنتوا الاتنين على الكراسي اللي قدام المكتب
لو دخلت مكان . اقعد على الكرسي اللي ضهره للمكان . اللي ضهره للمصنع . اللي ضهره للصالة . إلخ
لو ماشي في مصنع حد . ادخل كل صالة إنتاج برجلك اليمين
وكل ما تشوف حاجة قول ما شاء الله
لما حد يبعت لك لوكيشن مصنعه . قول له ( ربنا يملأه بركة )
لو حد جاي لك مصنعك . بتقابله برا المصنع
لو ماشيين مع بعض وداخلين على باب . قدم صاحب المكان
لو صاحب المكان بيقدمكم . قدموا الكبير
لو اتعازمتوا على بعض . اللي ع اليمين يدخل
لو العزومة طالت . اللي يزقك ادخل وخلصنا
