26/08/2026
"هولد النهارده ان شاء الله..
اكتتتر حاجه ممكن تقوليلهالى اعملها؟"
رسالة حقيقية وصلتني انهاردة.. 😅
تعالي أقولك تعملي ايه..🧐
بس هم مش حاجة.. هم ٣٠ حاجة.. ترتيب زي ما جه في دماغي
1. قلب الشفايف لبره بعد من البيبي يلتقم ممكن يقلل ٨٠٪ من الوجع
2. أهم خطوة لالتقام صحيح هي مش المسكة او الوضع.. الأهم البداية عند أولى علامات الجوع
3. العياط علامة جوع متأخرة
4. ممنوع تجويع البيبي عشان يرضى يرضع من الثدي
5. رضعة البيبي أول يوم ٥ سم تقريبا (مش ٣٠ سم زي معيار الصناعي!!)
6. البيبي ما بينزلش جعان من بطن مامته و ممكن يستنى مامته لحد ٦ ساعات تفوق من البنج.. هو بيعيط عشان مخضوض
7. لو هتولدي قيصري حاولي تأخري معاد الولادة قد ما تقدري ما دام مفيش سبب طبي يستدعي الولادة
8. في لبن في صدر الأم من الشهر السادس و لبن السرسوب كفاية للبيبي في الايام الأولى
9. التيتينة ممنوعة لحد ما تستقر الرضاعة.. تقريبا بعد ٤-٦ اسابيع
10. الببرونة بتعمل التباس حلمات.. بمعنى البيبي بيتلخبط و بيبطل يعرف يرضع بطريقة صح من الثدي
11. فيه علامات شبع معروفة تزود ثقتك في نفسك و تطمنك ان البيبي بيشبع.. من اهمهم عدد الحفاضات في اليوم (٣ مليانين في ال٢٤ ساعة) و تغيير لون البراز من اللون الاسود الى اللون الاصفر المسطردة بحد اقصى اليوم الخامس
12. لو فيه وجع في الرضاعة ← يعني التقام خاطئ ← و يعني البيبي مش بينزله لبن كفاية ← هيقعد يرضع ساعة و يقوم جعان
13. لو صدرك حجّر.. اعملي كمادات باردة ❄❄ مش سخنة 🛑🛑
14. اللبن في الصدر المحجر او السخن آمن للبيبي و عادي جدا يرضع منه
15. مراقبة البلع و التفرقة بين مص تغذوي و غير تغذوي من اهم المهارات اللي لازم تعرفيها
16. ممنوع المدرات بأنواعها قبل هجمة اللبن
17. مسكة المقص بتقلل تدفق اللبن.. بفضل مسكة الساندويتش
18. ضروري جدا نصحصح البيبي اثناء الرضاعة عشان يكمل رضعته و ما ينامش اكتر من ٣ ساعات متواصل من غير رضاعة
19. مفيش حاجة اسمها ننظم رضاعة.. انما بنتعلم علامات الجوع و بنلبي جوع البيبي و عادي ممكن يطلب رضاعة كل ساعة (لبن الام بيتهضم بسرعة)
20. الرضاعة في وضع نوم الام و الطفل آمنة ولا تسبب التهاب في الاذن
21. مفيش حاجة اسمها أم لبنها خفيف و أم لبنها تقيل.. لبن الأم دايما مفيد
22. ارتفاع الصفرا الفسيولوجية مرحلة طبيعية بيمر فيها الرضيع.. بنتابعها و بتعدي بسلام لو الرضاعة الطبيعية ماشية كويس و الصناعي مش علاج تلقائي ولا احترازي!!
23. علبة اللبن اللي بتنزل على روشتة المستشفى مجرد ما البيبي بيتولد.. سبوبة و بتوهمك انك معندكيش لبن.. اجمدي
24. تلامس جلد للجلد مش مجرد لقطة حلوة و رومانسية.. هو أداة قوية بتساعد في صعوبات و تحديات كتير.. استغلوه
لوضع التقام سليم:
25. البيبي يكون مرفوع ليكي مش انتي موطية عليه
26. راسه و كتافه و وسطه و بطنه مواجهة لبطنك (ما تكونش بطنه باصة للسقف) و ملاصقة ليكي من غير كوڤرتات
27. ضهره مسنود على دراعك.. مش ممسوك من راسه بس
28. مناخيره تبقى قصاد الحلمة مش بقه (بمعنى الحلمة تبقى أعلى من بقه)
29. بعد الالتقام بق البيبي يكون مفتوح فتحة واسعة و واخد النص التحتاني من الهالة اكتر من الفوقاني و دقنه لازقة في صدرك
*************
30. الرضاعة مش مقياس لنجاحك كأم.. حياتك بتتغيير و انتي بتتغيري.. اسمحي بالتغيير ده و ما تقاوميهوش ولا تستني حياتك ترجع زي زمان.. قدامك مرحلة جديدة.. اتعلميها بالراحة.. هتحبيها.. حاوطي نفسك بناس بتدعمك صح 💜
********************************
ولو وصلتي لآخر الـ30 نصيحة و مش عارفة تطبّقي ده إزاي؟ 💜
لا تقلقي..
اكتبي الكلمة اللي محتاجاها في الكومنت، وهتوصلك التفاصيل تلقائيًا على الـMessenger.
**التقام** ←خطوات الالتقام الصحيح
**وضع** ← وضع المهد المعكوس خطوة بخطوة
**جوع** ← علامات الجوع المبكرة
**الحفاض** ← إزاي عدد ولون الحفاضات بيتغيروا في الأيام الأولى
**نوم** ← طرق بسيطة تساعدك تصحّصي البيبي أثناء الرضعة
**بلع** ← إزاي تفرّقي بين المص والبلع الفعّال وغير الفعّال
**معدة** ← حجم معدة البيبي في الأيام الأولى وكمية اللبن اللي بيحتاجها
ملحوظة: ولو محتاجة أكتر من موضوع، مهم جدًا تكتبي كل كلمة في كومنت منفصل 💜
يعني: جوع في كومنت، معدة في كومنت تاني، وضع في كومنت ثالث… وهكذا.
__________________________
ولو لسه فيه أي نقطة مش واضحة، سيبي سؤالك في كومنت وأنا أجاوبك 🥰🥰
واحفظي البوست… عشان لو احتاجتيله في أي وقت...
و طبعا.. منشن و شير للحامل..
#ولادةطبيعية
___________________
