14/08/2026
صدقوني و الله
مفتقدين فعلاً أسامي كتير جدا في السوق كانت صادقة و منتجاتها محترمة جدا و منافستها محترمة جدا
نتمنى الوضع يتحسن و يرجعوا تاني يونسونا و ننافس بعض في إننا نوفر منتج أفضل.
بس أنا كمان باكتب، باشكر عملائنا اللي معانا لهم سنين
شكرا على ثقتكم و إن شاء الله نحافظ على مستوانا و نحسن
إحنا عاملين المشروع ده في الأساس بغرض خيري تنموي
حتى و احنا بنكسب منه مادياُ، و يمكن ده سبب في إننا بفضل الله ثم النية دي ثم حضراتكم، مكملين.
احنا بنعمل اللي يرضي ربنا قبل ما بنوفر اللي نقدر نأكله لاولادنا و دي نقطة مهمة جداُ، و ده يقين عندنا و مكملين بيه دايماُ.
ادعوا لنا كتير، الخامات بتغلى و الجو صعب و المنتجات الكويسة بتقل، و بنحاول نحافظ رغم ده على الجودة و المعايير اللي متفقين عليها و بأسعار فعلا و الله تنافسية جدا
الموضوع فعلا مكلف جدا و هامش ربحنا رغم السعر العالي إلا أنه قليل جدا
نوعدكم نفضل محل ثقة ليكم طول ما احنا مكملين
أعينونا على السوق الصعب ده بإنكم تتكلموا عنا و تعرفوا حبايبكم
و على نفسنا بالنصح و التوجبه، ماتستلمش أو ماتستلميش أوردر مش عاجبك، و لو رضيت بالمنتج رغم عيبه، من فضلك عرفنا علشان نتقى الخطأ ده، لإنه هايفضل يتكرر لو مابلغتوناش ان فيه غلطة أو إنه ممكن يكون أفضل.
الكلام ده فضفضة و وليد اللحظة دي، بس ده اللي حبيت إني اعرفه لحضراتكم
و أعينونا قبل كل ده بالدعاء
دمتم ذوق و مهذبين و ناصحين و أصحاء
