Warda joint care

10/04/2026

05/04/2026

سلاح عليكم ورحمة الله
كل سنة وحضراتكم طيبين وبخير
ان شاءالله نستكمل العمل بالعيادة

01558469112
01554872920
الكشف بالحجز المسبق
تليفون الحجز مفتوح يوميا ما عدا الجمعة
من الساعة ١ ظهرا إلى ٩ مساء لاستقبال الاتصالات
لتحديد موعد الكشف.
عيادة الجبل
حد وتلات وخميس من الساعة ٤ إلى ٨ مساء

06/12/2025

ان شاء الله
يوم الاحد ٧ ديسمبر
العيادة شغالة ابتداء من الساعة ٥ مساء

05/12/2025

ان شاءالله الأسبوع الجاي هنتكلم عن مرض الروماتويد
تحبوا تعرفوا ايه بالتفصيل؟

05/12/2025

سلام عليكم
من أهم الموضوعات اللى نتكلم عليها النهاردة هى الحمل مع مرضى الذئبة الحمراء..
طبعا معروف طبيا وعلميا آن هرمونات الحمل وخصوصا الاستروجين وده طبعا بيعمل نشاط مناعى شديد ويسبب حدوث انتكاسات ف بعص الحالات ..
مريضة الذئبة الحمراء ممكن تحمل امتى ؟
على الاقل تكون الحالة مستقرة بدون اى مضاعفات حوالى ٦ شهور على الاقل قبل اتخاذ قرار الحمل ..

هل فيه أدوية معينة مسموح بيها ؟؟
اه طبعا فيه أدوية ملهاش اى ضرر على الجنين ومسموح بيها
زى الكورتيزون والبلاكونيل والازاثيوبرين او ال نيورال مثلا
وفيه أدوية ممنوعة بشكل كامل زى ال سلسبت او الميثوتريكسات او الارث فرى ..

امتى الدكتور يسمح للمريضة انها ممكن تستعد وتحمل ؟؟
زى ما قولنا تكون الحالة مستقرة بشكل كامل لمدة ٦ شهور وتحاليلها كويسة وعلاجها مظبوط بدون إهمال فيه او تقصير ..

هل فيه اى فحوصات معينة بتتعمل قبل الحمل ؟؟
اه طبعا تحاليل شاملة وزلال ف البول وتحاليل مناعية خاصة باحتمالية الإجهاض او لا قدر الله مضاعفات على الجنين ..ولازم تتعمل ..؟؟ اه لازم تتعمل طبعا مفيش هزار فيها دى ..

بعض الحالات بيكون عندها متلازمة تجلط مناعى مع مرض الذئبة الحمراء ...ودى طبعا قصة أخرى ليها تظبيط علاج بشكل مختلف والدكتور هو اللى يقول الوضع يمشى ازاى...

بالنسبة للرضاعة ....ايه الوضع طيب ؟
فيه أدوية مسموح بيها ف الرضاعة وتعتبر زى الأدوية اللى بتاخد ف الحمل برضو بس احيانا بنحاول نخلى مواعيد العلاج تبعد شوية عن اوقات الرضاعة..
ومفيش ضرر الحمد لله على الطفل ..

الفكرة ان موضوع الحمل ده لازم مشاركة الطبيب معاكى ..ضرورى جدا ..عشان صحتك وصحة الجنين ..لان الحمل من أخطر الأوقات اللى بيحصل فيها انتكاسات شديدة زى تسمم الحمل او إجهاض او موت الجنين قبل الولاده او حدوث مضاعفات من الذئبة الحمراء على الكلى او القلب او المخ ..
مفيش تهاون ف المتابعة مهما كنتى كويسة ومحافظة على العلاج ...
عشان فترة الحمل تعدى بسلام والطفل يبقى زى الفل ..
وربنا سبحانه وتعالى هو الشافى المعافي....

د /وردة عبد الفتاح شحاته
استشارى الروماتيزم والمناعة بمستشفي الدمرداش
01558469112

05/12/2025

ان شاءالله
العيادة شغالة السبت بكرة بعد الظهر الساعة ٣
رقم الحجز 01558469112

05/12/2025

ان شاءالله نستكمل الجزء التانى من موضوع الذئبة الحمراء
وهو ما يتعلق بالحمل والرضاعة ..

29/11/2025

الجبل الأصفر بجوار حلال ماركت
برج الاطباء فوق صيدلية د هانى
حد وتلات وخميس

29/11/2025

يعنى ايه مرض الذئبة الحمراء. ؟
ده مرض مناعى نتيجة خلل ف أجهزة المناعة ينتج عنه أجسام مضادة تهاجم أعضاء الجسم زى الجلد والمفاصل والكلى والقلب وغيره ...
ايه أعراضه؟؟
ممكن طبعا اعراض بسيطة ف الاول زى حرارة عالية وفقد وزن وصلع او حساسية من الشمس او قرح بالفم وآلام بالمفاصل ...ممكن تزيد شوية ويحصل زلال ف البول او تأثير على أعضاء الجسم المختلفة او للأسف مضاعفات خطيرة زى فشل كلوي او التهابات بالمخ مثلا ..

ازاى نتشخص ؟
كشف طبي وفحوصات واشعات ومن اهم التحاليل هو تحليل ANA .anti DNA والESR وتحليل زلال ف البول وتحاليل شاملة زى صورة الدم ووظايف الكلى مثلا .

فيه علاج يا دكتور ؟
اه طبعا فيه أدوية كتيرة جدا ..ومن اهمها الكورتيزون والبلاكونيل ويضاف معاهم أدوية مثبطة للمناعة..

هل كل المرضى بيخدوا نفس العلاج ؟؟
من الثوابت ف العلاج ..الكورتيزون بجرعات معينة + بلاكونيل او هيدروكين ...وتختلف بقى الأدوية المناعية حسب الحالة .

ايه أخطر حاجة ممكن تحصل لو المريض أهمل او العلاج غير مكتمل ؟
للاسف التاثير على الكلى من أصعب المضاعفات

هل المتابعة مهمة حتى لو المريض معندوش شكوى ؟
اه طبعا ولتكن حتى كل ٣ شهور ....لكن لو الحالة نشطة. .يفضل تكون كل شهر حتى تستقر الحالة ..

ايه الأكل المسموح وايه الممنوع ؟؟
من أهم الاكلات هى الفواكه والخضروات والاهتمام بالسلطات لأنها غنية بالعناصر الغذائية التى تحسن من أداء جهاز المناعة بالإضافة إلى البروتينات زى اللحوم او الأسماك مثلا ..ممكن البيض واللبن والزبادي..كل ده مطلوب اكيد
يعنى اقصد ان الوجبة المتكاملة دى مهمة جدا جدا ومفيش اكل ممنوع بعينه الا اللى اذكره دلوقتى..

لكن ف حالات زلال شديد فى البول او قصور الكلى ...بنحاول نقلل كمية البروتين ف الاكل ودى ليها حسابات معينة حسب كل مريض ...

اما بقى الممنوع.....يبقى المواد الحافظة ف الوجبات الجاهزة او المشروبات المعلبة او استخدام الملح الزايد ف الاكل لانه بيرفع الضغط مع ضرورة البعد عن الدهون والشطة والمخللات عشان نحافظ على المعدة ونحافظ كمان على جودة الاكل اللى بدوره يساعد على سلامة المريض ..
كمان ممنوع التعرض لاشعة الشمس المباشرة ..ممنوع استخدام أدوية مجهولة المصدر ..نخلى بالنا كويس عشان التفاعل مع أدوية المناعة ...
يتبقى سؤال مهم محدش سأل عنه !!!!
هل فيه مشكلة مع الحمل والرضاعة مع مريضة الذئبة الحمراء؟؟ هل المريض هيفضل دول عمره بياخد كل العلاج ؟؟ وهيفضل خايف كده ومعرض للمضاعفات كلها ؟؟
ده يتقال ان شاء الله المرة الجاية

د وردة عبد الفتاح
استشارى الروماتيزم والمناعة بمستشفي الدمرداش
عضو الجمعية المصرية لأمراض الروماتيزم والمناعة
01558469112

28/11/2025

ان شاء الله
كل أسبوع هنتكلم على مرض معين ونشرح كل حاجة عنه وازاى نشخص وازاى نعالج وازاى نتابع المرض. وايه الأكل المسموح وازاى اعرف ان بدأ يحصل انتكاسة وازاى اعرف ان الوضع مستقر ..
ان شاءالله نتكلم عن الذئبة الحمراء..
ايه الأسئلة اللى محتاجين تعرفوها بالتفصيل ؟؟؟ واحاول انزلها بشكل مختصر ان شاءالله

28/11/2025

أمراض المناعة دى أمراض مزمنة زى الضغط والسكر كده ..العلاج بتاعها محتاج فترات طويلة
بسبب خلل مناعى حصل نتيجة اسباب كتيرة جدا ..منها عوامل بيئية او استعداد جينى او عوامل كتير مختلفة ..
بصرف النظر عن الأسباب كانت ايه .
احنا محتاجين نتشخص ونتعالج ونلتزم بالعلاج لتحقيق افضل نتيجة للمريض واللى يقدر بعدها يعيش حياة زى اى حد سليم ..
الكورتيزون مش مرعب ولا خطر كبير ما دام الدكتور عارف فوايده ايه واضراره ايه على المريض بتاعه ..
يحدد جرعته ويحدد فترته وازاى نتجنب اضراره وامتى نوقفه او امتى محتاجين نكمل عليه ....

الأدوية المناعية الأخرى مثلا زى الميثوتريكسات او الارث فرى او ال سلسبت وغيره ..تعتبر خط الدفاع الثانى بعد الكورتيزون ودى بقى سلاح الأمان وسلاح الشفاء بإذن الله تعالى ..لأنها بتعالج الخلل المناعى اللى حصل وتحاول تسيطر ان خلايا المناعة ف الجسم تتعامل بشكل مظبوط وسليم ...عشان نقدر نحافظ على أجهزة الجسم تشتغل بكفاءة زى اى انسان طبيعى ...
العلاج المناعى مش كيماوي ولا خطير
العلاج المناعى اساس قوى جدا ف علاج أمراض الروماتيزم والمناعة