10/10/2026
إزاي تربي جيل غير سوي نفسيًا؟
(أخطاء بنعملها بحسن نية)
Part 4: الناس هتقول علينا إيه؟
لحد إمتى هنفضل خايفين من شكلنا قدام الناس؟
ولحد إمتى هنربي ولادنا على أساس إيه اللي يليق في عين المجتمع، وإيه اللي الناس هتقول عليه؟
بجد... إحنا مالنا ومال الناس؟
إيه اللي هيتغير في حياتك لو جارتك قالت إن ابنك مش مؤدب؟
أو قالت إن بنتك مختلفة؟
هل رأيها هيخلي ابنك أحسن؟ هل هيساعد بنتك تتخطى مشكلة عندها؟ هل هيعرفها أكتر منك؟
أوقات بنكون خايفين من كلام الناس لدرجة إننا بدل ما نعالج المشكلة، بنحاول نخبيها.
لو ابنك عمل تصرف غلط، بدل ما نفهم ليه عمله ونعلّمه إزاي يتصرف صح، نقوله:
"اسكت! الناس هتقول علينا إيه؟"
ولو بنتك عندها مشكلة أو بتتصرف بطريقة محتاجة تعديل، بدل ما نقف معاها ونفهمها ونساعدها، كل همنا يبقى شكلنا قدام الناس.
وبكده إحنا ما حليناش المشكلة... إحنا بس سكّتناها.
زي المسكن بالظبط؛ خفّى الوجع شوية، لكن ما عالجش السبب.
وأنا دايمًا بقول: إنت أدرى بولادك من أي حد.
إنت اللي شايف اللي بيحصل جوه البيت، وعارف ظروفهم ودوافعهم والحاجات اللي محدش شايفها.
فلو فيه سلوك محتاج يتظبط، اشتغل عليه.
ولو فيه تصرف غلط، افهم سببه وعلّم ابنك ليه هو غلط وإزاي يصلحه، بدل ما يكون كل هدفك إنه ما يبانش قدام الناس.
لأن في النهاية، إنت مش بتربي ابنك عشان الناس ترضى عنه... إنت بتربيه عشان هو يبقى إنسان سوي وقادر يفهم نفسه ويتعامل صح مع الحياة.
طب والناس؟
الناس هتتكلم كده كده... في كل الأحوال.
فسيبهم يتكلموا.
د. سالي الشيخ
استشاري الطب النفسي
⬅️ للحجز والاستفسار:
01112923333
⬅️ للعنوان: 19 ش مصدق - الدقي
