01/10/2026
الـ 3 أنواع اللي عندنا في الدواجن:
1- اللقاح الحي (Live):
ده ميكروب حي بس ضعيف.
بندخله الجسم يلف لفة صغيرة ويعمل عدوى خفيفة فالجسم يتعلم ويعمل مناعة قوية وسريعة.
- زي: هتشنر - جمبورو - لاسوتا
- بيتشرب في المية أو رش أو تقطير
- مناعته قوية وسريعة بس فيه مخاطرة لو الفراخ تعبانة
2- اللقاح الميت (Killed / Inactivated):
ده ميكروب ميت تماما بزيت.
ملهوش لازمة غير انه يعلم الجهاز المناعي شكل الميكروب من بره.
- زي: انفلونزا H5 - نيوكاسل ميت
- لازم حقن عضل - مناعته بطيئة وطويلة
- أمان 100% بس مناعته ضعيفة لو لوحده
3- التوكسيد وده موضوعنا (Toxoid):
ده ولا حي ولا ميت.. ده السم بتاع الميكروب بس.
احنا مش بنحقن البكتيريا اصلا، احنا بنحقن السم بتاعها بعد ما نعطله.
- زي: توكسيد كلوستريديا
طبعا اللقاح الحي والميت بيعلموا جسمك شكل الحرامي عشان يمسكه قبل ما يدخل البيت لكن التوكسيد: بيعلم جسمك يلبس واقي ضد الرصاص، يعني حتى لو الحرامي دخل وضرب نار، الرصاصة متقتلكش
عشان كده في الكلوستريديا بنحتاج توكسيد، لان اللي بيموت الفرخة مش البكتيريا نفسها، اللي بيموتها السم اللي بتفرزه في الامعاء.
طب تاني وللتوضيح في الدواجن بنستخدمه ضد ايه وايه انواعه؟
كلها أمراض كلوستريديا، ودي ملهاش لقاحات حية:
1- أهم واحد: توكسيد الكلوستريديا بيرفرنجنس (التهاب الامعاء النخرزي)
ده اللي عامل مصيبة في التسمين اليومين دول. نوعين سم:
- Alpha Toxoid: ضد النخرزي
- NetB Toxoid: ده الجديد والمهم جدا
2- توكسيد البوتيوليزم (الليمبرنك - الرقبة الطرية)
ده بيجي في البياض اللي بتربي على سبلة.
3- توكسيد الكلوستريديا سبتكم ونوفياي (الالتهاب الجلدي الغنغريني)
وخد بالك، التوكسيد لا يستخدم في التسمين كتحصين مباشر، بيستخدم في الامهات عشان تورث مناعة للكتكوت.
مميزاته وعيوبه
مميزات:
✅ أمان 100% لأنه مش ميكروب حي فمستحيل يرجع شرس
✅ المناعة بتاعته قوية جدا ضد السم نفسه، مش ضد البكتيريا بس
✅ بيتخلط مع لقاحات تانية زي الكولستريديا المركب + التهاب الكبد
عيوب:
❌ غالي
❌ لازم جرعتين
❌ محتاج حقن عضل فردي، مينفعش في مياه الشرب
❌ مناعته لا تمنع العدوى، تمنع تأثير السم، يعني الفرخة ممكن تتصاب بس متتنفخش وتموت
أشهر منتجات في السوق عندنا:
- Netvax - MSD: أشهر توكسيد ألفا + NetB في العالم
-Coglavax: مركب كلوستريديا 8 انواع فيه توكسيدات
- فيه منتجات محلية كتير دلوقتي توكسيد كلوستريديا بيرفرنجنس A+C
الخلاصة بتاعتك كبتاع تسمين:
انت مش هتحقن توكسيد، انت هتطلب من شركة الام اللي بتجيب منها الكتكوت: هل الامهات متحصنة توكسيد كلوستريديا ولا لأ؟
لو متحصنة، الكتكوت ده هيصد معاك جامد في النخرزي وهتوفر كتير في المضادات.
طب الكلام ده بيطبق في الواقع ؟
آه مطبق في مصر، اه مطبق في مزارع الأمهات الكبيرة بس وأي قطيع صاحبه حابب يصرف.
خليني أقولك الواقع اللي بيحصل عندنا فعلا:
1- مين اللي بيطبقه؟
- كل الشركات الكبيرة مثلا : القاهرة للدواجن، الوادي، الوطنية، الدقهلية.. كل دول بيحصنوا أمهاتهم توكسيد كلوستريديا إجباري من 3 سنين.
- بيستخدموا Netvax بتاع شركة MSD، أو Coglavax 8 .
ليه؟ عشان عرفوا أن تكلفة التوكسيد 2 مثلا جنيه للفرخة الأم، بتوفر عليهم 15 جنيه علاج كلوستريديا ونافق في الكتاكيت بتاعتها طول السنة.
طب مين اللي مش بيطبقه؟
- 90% من محطات الأمهات الأهالي الصغيرة مش بتحصنه عشان غالي ومحتاج حقن مرتين وبيقولك "الكتكوت كده كده هيتباع".
عشان كده بتلاقي كتكوت طالع من شركة كبيرة بيصد معاك في النخرزي لحد عمر 20 يوم، وكتكوت تاني من مصدر أهالي يجيله نخرزي من عمر 8 أيام.
طب ازاي تعرف وانت بتشتري الكتكوت؟
اسأل الموزع سؤال واحد:
"الأم واخدة توكسيد كلوستريديا NetB ولا لأ؟
لو قالك آه، اطمن ان الكتكوت ده واخد مناعة أمية ضد السم، وهيقلل معاك حالات الموت المفاجئ والعلف الغير مهضوم أول 18 يوم.
لو قالك لأ أو معرفش، اعمل حسابك انك هتحتاج تنزل مضاد كلوستريديا وقائي بدري عند عمر 10-12 يوم وده الغالب 🥲😅
