Dr. Marwa Thabet -استشاري التغذية العلاجية

06/08/2026

المشروبات الساقعه مش كلها بترطب 🤗

في الحر أول حاجه بنجري عليها هي مشروب ساقع
بس الغريب إن مش كل مشروب بارد بيرطب جسمك
في مشروبات ممكن تحسسك بالانتعاش لدقايق لكن في الحقيقه تسيب جسمك محتاج مياه أكتر من الأول
البروده إحساس أما الترطيب فهو وظيفه
الجسم مش بيدور على إحساس البروده لكنه بيدور على مياه وأملاح تدخل الخلايا وتحافظ على توازنها
علشان كده ممكن تشرب كوب كبير من مشروب ساقع مليان سكر وتحس إنك ارتويت وبعد شويه تلاقيك عطشان تاني
وده لأن السكر العالي بيخلي الجسم يحتاج كميه أكبر من المياه للتعامل معاه والمشروبات الغنيه بالكافيين أو السكريات ممكن تزود الإحساس بالعطش عند بعض الناس لو اتشربت بكميات كبيره
أما المشروبات اللي بترطب بجد فهي اللي بتدي الجسم سوائل من غير تحميله بكميات كبيره من السكر
زي
المياه
المياه المعدنيه
مياه مع شريحه ليمون أو نعناع
اللبن
الزبادي السائل
مياه جوز الهند باعتدال
العصائر الطبيعيه غير المحلاه بكميات مناسبه
وكمان متنساش إن الترطيب مش جاي من المشروبات بس
البطيخ
الخيار
الكنتالوب
البرتقال
الخس
والطماطم
كلهم بيساعدوا جسمك يحافظ على توازنه
ولو حاسس بجفاف في الفم أو صداع أو إرهاق
فدي غالبا رساله من جسمك إنه محتاج ترطيب حقيقي مش مجرد مشروب ساقع
افتكر دايما
مش كل ما يبردك يرويك
ومش كل ما يروي عطشك يروي خلايا جسمك
اهتم إنك تشرب بذكاء مش بإحساس اللحظه
لأن الصحه الحقيقيه بتبدأ من اشباع احتياجات جسمك

05/08/2026

في رحله النجاح أجمل المحطات هي اللي بتجمع بين التقدير والعلم والإلهام كل الامتنان لشركه &PURA على الدعوه الكريمه لحضور MANTO Conference 2026
سعيده بدعوتي لحضور هذا الحدث المميز ومؤمنه إن كل تجربه جديده هي فرصه لاكتشاف أفق أوسع وصناعة نسخه أفضل من أنفسنا متحمسه لكل لحظه ولكل نقاش ولكل فكره هتضيف قيمه حقيقيه في رحله التطور المستمر لأن النجاح لا يصنعه ما نعرفه فقط بل ما نتعلمه باستمرار وما نشاركه مع الآخرين من خبره وشغف شكرا على هذه الفرصه الراقيه وأتطلع ليوم مليء بالإلهام والمعرفه والطاقه الإيجابيه واللقاءات الملهمه التي تصنع فارق حقيقي

https://www.facebook.com/share/1BNSA7TRLV/?mibextid=wwXIfr

https://www.instagram.com/pura__and?igsh=eDdvbXM0bzVta2Qw&utm_source=qr

03/08/2026

التغذيه بعد الزلزال
اول حاجه الحمد لله على السلامه يا جماعه 🤍
النهارده ناس كتير صحيت على هزه في الارض وبعدها حصلت هزه من نوع تاني في السوشيال ميديا
كل واحد بقى خبير زلازل وجيولوجيا وتوقعات للعشرين سنه الجايه 🫢وفي ناس اول حاجه عملتها فتحت التلاجه
مش علشان جعانه علشان المخ كان بيدور على اي حاجه تحسسه ان الحياه رجعت طبيعي
وده مش هزار بالمناسبه🙋🏼‍♀️
لما نتعرض لموقف مفاجئ زي زلزال او حادث او خبر يخضنا
الجسم بيفرز هرمونات زي الادرينالين والكورتيزول ويفضل المخ مستني اي خطر جديد حتى بعد ما كل حاجه تخلص وطبعا شوفناه كلنا بعدها في السهر في انتظار التوابع وتساؤلات الكل ننزل ولا نستنى
وعلشان كده ممكن تلاقي نفسك
مصدع مرهق مش قادر تنام جعان بشكل غريب
او العكس قافل نفسك من الاكل
وهنا التغذيه بتبقى جزء مهم جدا من رجوع الجسم لاتزانه
ابدأ بكوب مياه لان التوتر ساعات بينسينا نشرب والجفاف البسيط ممكن يزود الصداع والخمول
بعدها اختار وجبه متوازنه فيها بروتين وكربوهيدرات معقده ودهون صحيه لان الجسم محتاج طاقه ثابته مش انفجار سكر يعليه شويه وبعدها يوقعه
ركز على الاطعمه الغنيه بالماغنسيوم
زي اللوز والكاجو واللب وبذور القرع والسبانخ والشوفان
لان الماغنسيوم بيساعد العضلات والجهاز العصبي يهدوا
واهتم بالبوتاسيوم
زي الموز والكيوي والبطاطس والافوكادو
لانه بيساعد على توازن السوائل واتزان وظائف العضلات والاعصاب
ولو تقدر كل سمك
لان الاوميجا ٣ ليها دور مهم في دعم المخ وتقليل الالتهابات وتحسين المزاج
ولو بتحب الزبادي فهو اختيار جميل خصوصا بالليل
لان صحه الامعاء مرتبطه بشكل كبير بالحاله النفسيه
وده مش كلام مجازي في ارتباط حقيقي بين الامعاء والمخ
وحاول النهارده تقلل القهوه ومشروبات الطاقه
لان الكافيين مع جسم لسه خارج من حاله توتر ممكن يخلي الخفقان يزيد ويخليك حاسس ان الهزه لسه مستمره
وكمان بلاش تعيش باقي اليوم بين فيديوهات الزلازل والتوقعات
لان المخ مش بيفرق قوي بين الخطر الحقيقي والخطر اللي بتتفرج عليه طول الوقت
واهم نصيحه
لو لقيت نفسك كل شويه رايح تفتح التلاجه اسأل نفسك الاول
انا جعان فعلا ولا انا متوتر
لان كتير مننا بياكل علشان يطمن مش علشان جسمه محتاج اكل
وفي النهايه
الارض ممكن تهتز ثواني لكن احنا باختيارنا يا اما نهدي جسمنا وعقلنا يا اما نخلي القلق يكمل الهزه جوانا بالساعات والايام
هدي نفسك اشرب مياه كل اكله حقيقيه مفيده
خد نفس عميق وافتكر ان اقوى حاجه ممكن تعملها بعد اي هزه في الدنياانك ترجع توازنك من جوه قبل ما تدور على توازن الارض حواليك 🤍

16/06/2026

كل عام وحضراتكم جميعا بخير

الدكتورة مروة ثابت
تهنئكم بالعام الهجري الجديد 1448هـ

سائلين المولى عز وجل أن يجعله عامًا مليئًا بالخير واليمن والبركات، وأن يديم عليكم الصحة والسعادة والنجاح.