03/09/2021
عارفين ليه الناس الطيبة بتروح بدري ؟؟
دايماً بنحس إن الموت بيخطف أحب الناس و أجملهم روحاً و قلباً.
السبب بسيط.
الناس دي من كتر نقاء روحها و طيبة قلبها بتتحمل الأذى و الحزن و الإساءة، الظلم، الإهانة، الخيانة، قلة التقدير و انعدام الاهتمام و غيرها من مآسي كتير جداً جداً و بتسامح بلا مقابل كل اللي بيظلمها و ياخد حقوقها. بتكتم جواها الزعل و القهرة و كسرة النفس و الخاطر. بتتحمل و تتحمل و تشيل هموم تهد جبال لمجرد إن الحياة تمشي. مش مهم تمشي ازاي حتى لو داست عليهم و فرمتهم بس المهم إنها تمشي و تعدي. الناس دي بتداوي جراح الكل و هي جراحها كلها شديدة نازفة و ملتهبة، بتوزع السعادة يمين و شمال بدون مقابل فحين هي نفسها ممكن تكون مليانة هم و غم مالوش نهاية. بتحاول تبتسم و تستعين بالله و تصبر نفسها إن اللي جاي أحسن و أحلى. ناس راضية قنوعة و جميلة و اللي في إيديها و جيوبها مش ليها. الناس دي من كتر التحمل و شيل الهموم دي بيجي لها أمراض الدنيا بداية من القلب، السكر ، الضغط، القرح، الجلطات و كل أنواع السرطان و العياذ بالله. أعمارهم دايماً أقصر و تحس إن العلاقة عكسية ما بين شدة الطيبة و العطاء و ما بين عداد العمر. مهما عاشو و مهما كان عمرهم ساعة الرحيل بتحس أنه لسة بدري و إنهم اتخطفو من وسطنا لإنهم كانو طول عمرهم زي النسمة الخفيفة في ليلة مزدانة بالنجوم. طبعاً الأعمار بيد الله لكن ربنا ليه حكمة ف كدا برضو هو إنه أكيد بياخدهم بدري بدري عشان يرتاحو بدري بدري من قرف الدنيا و شقاءها و تعبها. ربنا رايد لهم الراحة عنده و أخدهم عنده لإن أكيد اللي عنده هو أجمل ملايين المرات من اللي بيعانوه في حياتهم.
اللي ربنا رزقه بشخص زي كدا أرجو إنه يتمسك بيه و يطيب خاطره و يشيله على راسه لإن الناس دي مش بتتعوض.
اللهم ارحم أمواتنا و صبرنا على فراقهم و اجمعنا بيهم في جنات الفردوس يا رب العالمين.
كفاكم الله جميعاً شر المرض و رزقكم الصحة و العافية و راحة البال 💜💜💜
