09/08/2026
مش عندي أجهزة تخسيس في العيادة، فبالتالي لما بلاقي حالة محتاجة أجهزة موضعية بجانب النظام الغذائي، بحوّلها لأحد أخصائيين التغذية زمايلنا اللي عندهم الأجهزة المناسبة.
وأغلب الدكاترة اللي فاتحين في المحيط بتاعي عارفين د. ضحى الباشتلي من الحالات اللي بتتحول عليهم 😅
المهم، حصلت ظروف واضطريت أوقف العيادة لفترة، وللأسف أغلب الحالات مش بيحبوا يتابعوا Online.
فكان قدامهم حل من اتنين:
إما يستنوا لحد ما أنزل تاني، وده صعب لأنهم ممكن يخسروا جزء من المجهود اللي بذلوه خلال فترة المتابعة.
أو يروحوا لأي أخصائي تاني يكملوا معاه.
وفعلًا، كذا حالة راحت كملت متابعة مع الدكاترة اللي كنت محوّلاهم عليهم قبل كده.
لكن النتيجة كانت صادمة بالنسبة لي…
رجعولي وقالوا:
"عايزين نكمل متابعة معاكِ تاني، مش مهم الطريقة… المهم معاكِ!" 🥹
هنا كان لازم أسأل: ليه؟
وكانت إجابات الحالات 👇
"أصلها قالتلي متابعة التغذية رفاهية، لو مش قادرة تدفعي مرة متجيش."
"أنا فترة متابعتي مع الدكتورة كنت حاسة باكتئاب طول الوقت، وكل اللي يشوفني يفتكرني عيانة."
"انتي واحدة عايزة تحسني شكلك، يعني دي رفاهية… عايزة تدفعي تمام، مش عايزة تدفعي خلاص."
"أنا اليوم اللي بروح فيه عند الدكتورة مبفطرش، عشان لما أروح الوزن يكون قليل."
"أنا بكون مرعوبة وأنا داخلة عند الدكتور."
"الدكتور بيفضل يزعق فيا جدًا لو منزلتش الرقم اللي هو عايزه كل مرة."
"النظام بتاع الدكتورة صعب أوي… مش عارفة أمشي عليه يوم، همشي عليه أسبوع إزاي؟"
وكلام تاني كتير جدًا…
والحقيقة إن الكلام ده ضايقني جدًا، مش بس عشان الحالات… لكن عشان خلاني أفكر قد إيه إحنا فاهمين التغذية بشكل غلط، وبالتالي بنتعامل معاها ومع الحالات بشكل غلط، وده ممكن يأثر على نفسيتهم قبل صحتهم.
وزي ما قولت قبل كده..
التغذية مش مجرد رقم على الميزان، ومش المفروض تكون رحلة مليانة خوف أو إحساس بالذنب أو حرمان.
والسمنة تُعد مرضًا مزمنًا، وزيادة الوزن ترتبط بزيادة خطر الإصابة بعدد من الأمراض والمضاعفات الصحية.
وفي المقابل، النحافة مش مجرد "شكل" برضه؛ لأنها أحيانًا بتكون نتيجة لسوء تغذية أو مشكلة صحية محتاجة تقييم ومعرفة السبب.
وعشان كده، التعامل مع الوزن لازم يكون جزء من رعاية صحية متكاملة، مش مجرد محاولة للوصول لرقم معين على الميزان.
والنظام الغذائي مش معناه الحرمان، ربنا قال:
"وَكُلُوا وَاشْرَبُوا وَلَا تُسْرِفُوا "
يعني الفكرة مش إننا نمنع نفسنا من كل حاجة، لكن إننا نتعلم إزاي ناكل بشكل متوازن، وبكميات مناسبة لحتياج كل شخص وحالته الصحية وأسلوب حياته.
وفي النهاية " الحالات محتاجه حد يساعدهم يفهموا جسمهم، ويشجعهم، ويمشي معاهم خطوة بخطوة. 🌸
ودُمتم في صحة وعافية 🥰
Dr. Doha Elbashatly
Health Coach & Nutritionist
