Quality School DrAhmed Adel

12/05/2026

11/05/2026

المريض ملوش ذنب ان مرتبك مش عاجبك
المريض ملوش ذنب ان ظروف الشغل غير آدمية
المريض ملوش ذنب انك دخلت تخصص مش بتحبه
حط نفسك او حد من أهلك مكانه هتعرف انه مش غلطته هو
ابذل افضل ما عندك بكل ضمير و افتكر انه ملوش ذنب
اللهم استعملنا و لا تستبدلنا

10/05/2026

زملاء كثير سألوني عن خريطة درجة الادوية فى الكراش كارت هو في الواقع مفيش خريطة ثابتة و لا في توصية بشكل ثابت لا من وزارة الصحة و لا من اي هيئة اعتماد لانه المفروض انه شان داخلي للمؤسسة و ان كنت بنادي و انبح صوتي من اصدار دليل رسمي لتنظيم الكود الازرق و كل ما يتعلق به من بروتوكولات للاستجابة او عربة الكراش او النماذج المستخدمة.
لكن بكل حال المطلوب انك انت فى مكانك ترتب الكراشات بشكل ثابت ايا كان هذا الترتيب و تستمر على الثبات ده و تخليه سياسة ملزمة حتى يحفظها الجميع.
الثبات هو المطلوب و خصوصا لو كانوا اكثر من كراش فى المكان فكلهم لازم يكونوا على نفس الرصه و المفضل بس انك تخلي الادرينالين في اول الدرج اقرب حاجه لمتناول اليد.
طيب ايه الفايدة؟
اننا نوفر الثواني اللي هتدور الممرضه فيها على الادوية فى انهي مكان فى الدرج و ده تحقيقا لمبدأ ال5S اللي اتكلمنا عنه قبل كده.
و لو ثبتناها دايما سواء فى الكراش اللي عند الممرضة دي او اي كراش تانيه في المؤسسة هيتكون عندها ما يسمى بذاكرة العضله فهي هتتعود انها اول ما تفتح الدرج على الناحية اليمين قدام هتلاقي الادرينالين فأيدها هتروح تلقائي على المكان ده و توفر وقت التدوير.
طبعا في وسيلة مساعده كمان بوضع ملصقات تعريف باسم الاصناف على مكانها في الدرج كما فى الصورة فده برضو هيقلل زمن البحث و كمان يضمن اعادة التعبئة بعد الاستخدام بشكل اسرع.
لا تنسوني من الدعاء

24/04/2026

معيار الاوامر الشفوية و التليفونية مش مشكلته انك تكتب في السجل و خلاص و انما هو معمول بالاساس لحل مشاكل و عيوب التواصل الشفوي و اللي هي بتتلخص في 3 مشكلات
1-النسيان (بسبب كثرة المشاغل)
2-السماع الخاطئ (بسبب كثرة المشتتات الصوتيه ويزداد سوءا عبر التليفون)
3-الفهم الخاطئ (بسبب الاختصار المخل دون ترك فرصة للاستفسار)

و علشان كده الطريقة اللي لازم تتبعها مع اى تواصل شفوي سواء كان حد بيعطيك امر شفوي او تليفوني او بيبلغك بنتيجة حرجة بشكل شفوي او تليفوني هو انك تعمل احتياطك لتفادي ال3 مشكلات دول

1-النسيان ..................... هتعالجه عن طريق الكتابة و التدوين مباشرة
2-السماع الخاطئ........ هتعالجه عن طريق اعادة القراءة لما كتبته على من يحدثك.
3-الفهم الخاطئ.......... هتعالجه عن طريق طلب التأكيد للفهم من محدثك.
باختصار (write down-read back-confirm)
طبعا الاوامر دي سيتم توثيقها فى ملف المريض من المتلقي (في النموذج المناسب تبعا لنوع الامر) ومصدر الامر لازم يأكد بتوقيعه في خلال مدى زمنى محدد تذكره السياسه فى العادة بيكون 24 ساعه.

في حالة الاوامر الشفوية الفورية لدواعي انقاذ الحياة مثل الانعاش القلبي (او النزيف الحاد/الاختناق/محاولة الانتحار) هنا مفيش مجال للنسيان اصلا فمش محتاج تكتب لانك ببساطه هتنفذ فورا لكن فاضل مشكلتين حلهم السماع الصحيح و الفهم الصحيح اذن انت هتكرر repeat back بصوت واضح على من يعطيك الامر ما ستقوم بتنفيذه قبل تنفيذه و بكده هو هيضمن انك سمعته صح و هتنفذ صح اللي طلبه فورا.
طبعا بعد الموقف ما يخلص انت و هو كده كده هتكتبوا التدخلات في النماذج المناسبه لان اى اجراء على المريض هيتكتب فى ملفه.

طيب ما في واحد في فريق الانعاش بيكتب كده يبقى حققنا المعيار؟
لا برضو لان المعيار طلب الكتابه و اعادة القراءة من متلقي الامر اللى هينفذ علشان يعالج نسيانه هو و فهمه هو الخاطئ مش لمجرد الكتابه من أى حد تاني و خلاص.

سجل الاوامر الشفوية و التليفونية هو ليس جزء من المعيار اساسا و انما معمول من قسم الجودة لاغراض تتبع تطبيق السياسة بشكل صحيح فمتربطش دماغك انه اللي مش مكتوب فيها هو مش امر شفوي لانه في حاجات ممكن متتكتبش فيه و هي امر شفوي زي حالات الانعاش لان ليها سجل مخصوص.

تاني و ثالت ما في أي قيود من المعايير على اى اصناف او ادوية انها تتوصف من خلال الاوامر الشفوية انت اللى هتعمل ده في سياستك و برأي الهيئة الطبية مش بوجهة نظرك انت يا جودة و انصحك بلاش الا في الضرورة القصوى خصوصا الجمله الخايبه بتاعت انه ممنوع ادوية عالية الخطورة بالامر الشفوي اللي انت هتخالفها مع اول حالة انعاش قلبي.
يا جماعه الجودة فهم مش حفظ .. بطل تقلد و افهم المعيار ارجوك.

لا تنسوني من الدعاء
د.احمد عادل السيد

17/04/2026

ده من الاسئلة اللى اتكررت من اكثر من زميل عن مراجعة السياسات و الاجراءات المكونة لنظام الجودة فى المستشفي و عشان كده هنتكلم فى البوست ده عن العملية دي.
عملية مراجعة السياسات و الاجراءات هي عملية ديناميكية و مستمرة و الهدف منها التأكد اننا ماشيين على الطريق الصحيح و ان السياسات والاجراءات بتحقق الغرض المطلوب منها و ان مصادر المعلومات اللى على اساسها بنينا السياسة لازالت صالحة و لم تتغير مع التحديث المستمر للمعارف و تغير الادلة العلمية و التوجيهات الارشادية و الممارسات المثلى.
كمان لازم تتأكد اثناء المراجعة ان السياسة تطابقت مع معايير الاعتماد سواء الخاصة بهيئة الاعتماد المصرية او اي معايير تانيه انت حابب تستخدمها كbenchmark لاحظ ان المعايير بتطلب محتويات معينه لازم تتحقق فى السياسة و نقاط لازم تخاطبها و تجيب عنها.
كمان لازم تتأكد ان السياسة و الاجراءات مطابقة لسياسة اصدار السياسات فى مؤسستك
النموذج المرفق ممكن تستخدمه و انت بتراجع السياسات و بيتعمل شيت منه لكل سياسة و بناءا على المراجعة بتاخد قرار المراجعة
طيب هل مطلوب فى المعايير اننا اصلا نراجع السياسات و الاجراءات؟
ايوه مطلوب ان السياسات تراجع بحد اقصي كل 3 سنوات و ده اللى طلبته هيئة الاعتماد المصرية فى المعايير
و دي من الحاجات اللى هيراجعها الsurveyor انك مطبقها اقرأ كده معايا اللى قالته gahar.
GAHAR surveyor may perform a document review for the policy, followed by checking the implementation of the policy by review of the related documents which include the hospital policies and procedures (to ensure that they had standardized format, tracking system,identified approver, issuing and revision date at ***least every 3 years ***
***
***اتمني يكون الامر اتضح و اللي محتاج شرح اكثر يسأل في التعليقات و لا تنسوني من الدعوات.
د.احمد عادل السيد
استشاري جوده الرعاية الصحية و مكافحة العدوي

03/04/2026

اقناع الفريق الطبي بأهمية تطبيق نظام الجودة هو واحد من المهام الصعبة خصوصا الاهتمام بالتوثيق للرعاية الطبية.
بعض الاطباء يرى ان وقته اثمن من ان يضيعه فى الكتابه و الحجة هي ان وقت الكتابه يمكن توجيهه لرعاية المرضى و لا أدري كيف ستتم رعاية المرضى دون توثيق اوامر الطبيب او توثيق ملاحظاته بشأن تطور حالة المريض.
لذلك تجد المعارضه الدائمة لتطبيق انظمة الجودة فيما يخص السجلات الطبية للمرضى.
كيف تقوم بمعالجة هذا الامر ؟؟

31/03/2026

واحده من المعارف المهمة جدا التي يجب ان تدرس كمصاحب لدراسة الجودة هو علم ادارة التغيير.
انت كقسم جودة بتسعى لتحقيق التميز و تحسين الوضع الحالي.
و اي حد هتقوله تعالي نغير ما نحن فيه وهناك ما هو احسن طبعا هيقاومك.

الانسان دوما بيخاف من التغيير لانه بيغير التركيبة اللي هو معتاد عليها و عارفها و الانسان بطبعه عدو ما يجهل.
مقاومة التغيير بتحصل بصور منها:
محاولة منع التغيير من البداية و التمسك بالوضع الراهن.
خلق الاعذار لتأجيل تطبيق التغيير.
التظاهر بقبول التغيير ثم محاولة افشال الانظمة الجديدة في العمل
نشر الروح السلبية او الشائعات عن الانظمة الجديدة العمل
و مطلوب منك انك تنتبه جيدا لكل اسلوب من اساليب المقاومة دي لانها كلها هتحصل مع بعض.

30/10/2025

الزملاء فى مراكز الرعاية الاولية الصيدلي ملهوش علاقة بعملية التوافق الدوائي خالص.
الصيدلي هتروحله الوصفة الدوائية بعد ما الطبيب عمل التوافق الدوائي في العيادة واخد قراره الدوائي خلاص وكتب الوصفة المطلوب صرفها.
في مرحلة الصرف الصيدلي بيراجع على الوصفة اللي حررها الطبيب و يعمل ما يسمي بالملائمة الدوائية طبقا لعناصرها المطلوبة و دي ملهاش علاقه خالص بالتوافق الدوائي.
لازم تميز الفرق بين العمليتين.

02/06/2025

سؤال جالي من زميله بتسألني ايه الفرق بين الملائمة الدوائية و التوافق الدوائي؟
و هو سؤال حلو حبيت اجاوب عليه على العام علشان الكل توصله المعلومه
لازم تعرف ان معايير ادارة الدواء فى مرحلتي الوصف من الطبيب و الصرف من الصيدلي طلبت انه يتم نوعين من المراجعة:
الاول مرحلة الوصف:
اثناء قيام الطبيب باتخاذ قرار الوصفة الدوائية المعايير الزمته انه لازم يجمع افضل تاريخ دوائي ممكن BPMH من المريض او ذويه ( ليه بنقول افضل و ممكن لانه ببساطه احنا هنعتمد هنا على وصف المريض وذاكرته او اي علبه فاضيه معاه او صورة لادويته وده مش دايما افضل حاجه كجمع معلومات و لكنه افضل المتاح ). المهم انه لازم يتم عمل توافق بين ما يتناولة المريض حاليا او كان تناولة حديثا جدا و بين ما سيتم وصفه جديدا من الطبيب و العملية دي بنسميها Medication reconciliation ممكن يساعده فى الخطوة دي الصيدلي الاكلينيكي لو متاح في المؤسسة (و لو مش متاح فهي قانونا مسئولية الطبيب) و لكن ناخد بالنا اننا هنا لسه فى مرحلة اتخاذ القرار الدوائي يعني لسه الوصفه متكتبتش ( اي تدخل من الصيدلي الاكلينيكي بعد الوصف والصرف هو طبعا تطبيق غير صحيح للتوافق الدوائي)
المرحلة التانية هي مرحلة الصرف:
و هنا الصيدلي في الصيدلية سواء داخلي او خارجي و من مهام وظيفته و كطبقة ثانية من منع الاخطاء الدوائية هيعمل عملية مراجعة قبل الصرف لملائمة عامة للادوية الموصوفه مع البيانات المتوفره عنده عن المريض يعني هو بيشوف ملائمة الوصفة(لسن المريض / حالته المرضيه / حالة الحمل و الرضاعه / تداخل الادوية مع بعض / الجرعات و ملائمتها) و لو احس بأي شيئ مقلق يرجع يتواصل مع الطبيب و يأكد منه انه فعلا يقصد كده و انه مفيش اي خطأ بشري و بنسمي العملية ديappropriateness review بالمناسبة لو الصرف هيحصل من دولاب طوارئ مثلا بواسطة الممرضة لاعطائة للمريض هتبقى من مسئوليتها القيام بعملية المراجعة دي برضو حسب معرفتها.

و هو ده الفرق بين عمليتي المراجعة دول و اتمنى ان الامور تكون اتضحت
و لا تنسوني من الدعاء.

د.احمد عادل السيد
استشاري جودة الرعاية الصحية ومكافحة العدوى

16/05/2025

الخطة الامنية في المستشفى

واحدة من اهم الخطط الخاصة بالسلامة لانها تضمن سلامة الموظفين و كذلك المرضى و الزوار ضد المخاطر الامنية و بتبدأ الخطة بتحليل المخاطر الامنية ثم تتطور لوضع حلول امنية لكل خطر محتمل منهم و مكوناتها كالتالي:

تقييم المخاطر الأمنية (Security Risk Assessment)
• تحديد المخاطر المحتملة: سرقة، اقتحام، عنف، تخريب، تسلل، اختطاف أطفال، تسرب معلومات.
• تقييم المناطق عالية الخطورة (مثل غرف الأدوية، الطوارئ، حضانات الأطفال، وحدة العناية المركزة، الخزينة، غرفة الكهرباء).
• تحليل الحوادث السابقة والتكرار المحتمل.
السياسات والإجراءات الأمنية العامة
• سياسة دخول الزوار
• سياسة دخول وخروج الموظفين.
• سياسة الأمن في الأوقات الليلية والعطلات.
• التعامل مع الأشخاص غير المصرح لهم.
• إجراءات الطوارئ الأمنية (اقتحام، اختفاء طفل، إخلاء...).
مراقبة الدخول والخروج (Access Control)
• بطاقات تعريف إلكترونية للعاملين.
• نظام توقيع إلكتروني أو يدوي للزوار.
• نقاط تفتيش على البوابات.
• كاميرات مراقبة (CCTV) عند المداخل، المخازن،الممرات و توزيعها لتغطية النقاط العمياء.
• أجهزة إنذار للبوابات وغرف الأدوية.
الحراسة والأمن البشري (Security Personnel)
• توزيع الحراس في جميع أنحاء المستشفى.
• تعريف مهام الحارس: تفتيش، مراقبة الكاميرات، الاستجابة للحوادث.
• الزي الرسمي، أجهزة اللاسلكي و التواصل الداخلي.
• تدريبهم على التعامل مع المرضى العقليين، الحوادث، السيطرة على الحشود.
إدارة مفاتيح المناطق الحساسة
• سجل رسمي لتسليم المفاتيح.
• حظر نسخ المفاتيح دون تصريح.
• استخدام أقفال إلكترونية كلما أمكن.
خطة الاستجابة للطوارئ الأمنية (Security Incident Response Plan)
• آلية التعامل مع:
-العنف الجسدي أو اللفظي
-المشتبه بهم أو المتسللين
-الكوارث الأمنية (مثل تهديدات القنابل)
-فقدان طفل أو سرقة مولود
-سرقة أجهزة أو أدوية
أرقام التواصل مع الشرطة والجهات الأمنية فورًا.
إدارة الزوار
• تحديد ساعات الزيارة.
• تسليم بطاقات هوية مؤقتة.
• منع دخول الأسلحة أو المواد المحظورة.
تأمين المعدات والمواد الحساسة
• غرف الأدوية والمخازن مؤمنة بأبواب حديدية.
• حصر يومي أو أسبوعي للمعدات عالية القيمة.
التدريب والتثقيف الأمني للعاملين
• تدريب دوري على التبليغ عن السلوكيات المشبوهة.
• توعية بطريقة التصرف في حال حدوث مشكلة أمنية.
• محاكاة سيناريوهات طارئة.
الرصد والتحليل والتطوير
• سجل يومي للحوادث الأمنية.
• مراجعة دورية للخطة الأمنية.
• اجتماعات دورية بين إدارة الأمن وإدارة المستشفى.
مرفقات ضرورية للخطة:
• خريطة توضح توزيع الحراسة والكاميرات.
• نماذج تقارير الحوادث.
• جداول الورديات الأمنية.
• قائمة بالمناطق المصنفة خطرة و الحلول الامنية.
• خطة إخلاء أمني.

مين شاطر يقول في انهي معيار من معايير السلامة في جهار طلب تلك الخطة ؟