21/05/2026
📞 "ألو.. يا دكتورة آكل إيه النهاردة؟"
قصة حقيقية من العيادة الأسبوع ده، مع حالة لسه مولداها بقالها أسبوع، ومقسمة جدول أكلها معايا كالتالي:
أول يوم: "يا دكتورة عاملين سمك مشوي، آكل معاهم؟" .. قلت لها: كلي طبعاً، فوسفور وبروتين ممتاز! 🐟
تاني يوم: "يا دكتورة حمروا الفراخ، ينفع آكل؟" .. قلت لها: ينفع يا ستي بألف هنا، محتاجين نغذيكي! 🍗
النهاردة بقى: أول ما الخط فتح، وقبل ما تقول أي حاجة، سبقتها وقلت لها: "عندكم أكل إيه النهاردة؟"
قالت لي بضحكة: "عاملين كبدة.. آكلها بالتوم عادي؟" 🧄
قلت لها: "بصي بقى.. تاني مرة هتكلميني فيها عن الأكل، تكوني بتعزميني على الغدا خلاص!" 😂
💡 وعلى ذكر الأكل.. كلمتين جد لكل مامي لسه والدة:
بلاش حرمان من الأكل في فترة الرضاعة والنفاس بناءً على معتقدات قديمة!
السمك المشوي🐟🐟: رائع لتعويض الجسم وبناء اللبن.
الفراخ واللحوم: بروتين أساسي لالتئام الجروح وتجديد طاقتك.
الكبدة: من أهم مصادر الحديد لتعويض أي دم فُقد وقت الولادة، والتوم طالما مش بيتعب معدتك أو بيعمل غازات للبيبي، فـ هو تمام ومفيد جداً للمناعة.
المهم: اشربي مية كتير، كلي خضار وفاكهة، وابعدي بس عن الأكل الحامي والمسبك بزيادة.
شاركونا في التعليقات.. إيه أغرب سؤال سألتوه لدكتورتكم بعد الولادة؟ وإيه الأكلة اللي كانوا حارمينكم منها وهي مفيدة؟ 🤔
💞
🧚♀️ معانا انتى اجمل ام 🧚♀️
مع
🎀د. إيمان الشناوى🎀
استشارى النسا والتوليد
والتجميل النسائي
والتغذية العلاجية
للتواصل على رسايل الصفحة
او واتساب📲01558480155
🏠 ش المحكمة برج ٢٥ يناير بجوار بنك القاهرة
