16/05/2026
السكر الأبيض صديق أم عدو ؟
خلينا نبدأ من اللي أغلبنا يعرفه…
🟡 كل ما مستوى السكر يرتفع في الدم، البنكرياس يفرز هرمون الإنسولين، علشان يساعد الخلايا تستخدم السكر لإنتاج الطاقة، أو تخزن الفائض منه داخل الكبد والأنسجة الدهنية.
لكن مع الإفراط المستمر في تناول السكر والسعرات العالية، الجسم يبدأ يوسّع “المخازن” دي تدريجيًا…
فتكبر الخلايا الدهنية ويزيد عددها، خصوصًا في منطقة البطن وحول الأعضاء الداخلية (القلب والأوعية الدموية، الكلى وغيره).
ومع الوقت قد تظهر:
🔸زيادة الوزن والسمنة
🔸ارتفاع الدهون الثلاثية في الدم
🔸تراكم الدهون على الكبد واللي ممكن يتطور لالتهاب وتليف وفشل الكبد
وللأسف دي ممكن تبقى مجرد البداية في رحلة أضرار السكر !
🟡 مع الوقت، الخلايا بتفشل في التجاوب مع كميات الإنسولين المهولة
يعني البنكرياس يفرز إنسولين، لكن الخلايا ما تنفذش “الأوامر” بالكفاءة المطلوبة ..
وكأنها بتقاوم أوامره
لا تحرق السكر ولا تخزنه بالشكل المطلوب
فيستمر البنكرياس في تحضير كميات أكبر وأكبر من الإنسولين
للتغلب على مقاومة الخلايا
فالخلايا تقاوم أكتر
والبنكرياس يفرز إنسولين أكتر
فالخلايا تقاوم أكتر
وهكذا
بنسميها حالة مقاومة الإنسولين
🟡 وفي البداية انت ممكن ماتبقاش حاسس بأي أعراض منذرة
أو تظهر بعض الأعراض المبهمة زي :
🔸الإرهاق والخمول
🔸صعوبة التركيز
🔸الجوع المتكرر واشتهاء الحلويات
🔸زوائد جلدية داكنة أو خشنة في بعض الرقبة وغيره
🟡 ومع استمرار المشكلة، هيدخل الجسم في دائرة مغلقة:
جوع أكثر، ثم أكل أكثر، ثم ارتفاع أكبر في السكر، ثم إفراز إنسولين أكثر / ثم مقاومة أكبر للإنسولين، ثم جوع أكثر… وهكذا
ومع مرور السنوات، قد يُرهق البنكرياس تدريجيًا، وتقل قدرته على إنتاج الإنسولين بالكميات المطلوبة، وهنا هيظهر مرض السكر من النوع الثاني.
🟡ودي برضو مش آخر خطوة في رحلة أضرار السكر
لأن السكر المرتفع لفترات طويلة بدون سيطرة وبدون علاج، هيوصل بالمريض للمضاعفات اللي لا مفر منها
🔸تلف الأوعية الدموية الدقيقة
🔸تلف الأعصاب الطرفية
🔸تضرر شبكية العين
🔸قصور الكلى
🟡وطبعًا في النهاية ما ننساش الأضرار اليومية اللي ناس كتير بتعتبرها “بسيطة”، زي:
🔸تسوس الأسنان
🔸زيادة حب الشباب
🔸جفاف الجلد وتسارع ظهور التجاعيد
🔸اختلال توازن البكتيريا النافعة داخل الأمعاء، فتعاني مع الانتفاخات واضطرابات الهضم.
ختامًا،
أجسامنا مش محتاجة السكر الأبيض.
إحنا بناكله لأننا اتعودنا على طعمه، وأدمغتنا متعلقة بالشعور السريع بالمتعة والطاقة اللي السكر بيحققهالنا.
فلو حابب تبدأ تقلل أضرار الإفراط في السكر، فدي شوية خطوات بسيطة ممكن تساعدك:
• قلل المشروبات الغازية والعصائر المصنعة و المحلاة أو امنعها.
• حاول تخلي الحلويات أكلة لطيفة في المناسبات مش عادة يومية.
• اهتم بالبروتين والألياف في أكلك، هتحس بالشبع لفترات أطول.
• اقرأ المكونات… السكر أحيانًا بيكون موجود بكميات كبيرة في أطعمة ما نتوقعهاش زي الصوصات والصلصات واللحوم المصنعة والمتبلة وغيرها.
• لو نفسك في حاجة حلوة، الفاكهة غالبًا هتكون اختيار أفضل من الحلويات المصنعة الغرقانة في الشربات والدهون الغير صحية.
#الاسبتالية
#د.إيمان_الإمام
