29/08/2026
طبعًا ممنوع ندي حقن مضاد حيوي في البيت ..
وكمان ممنوع في الصيدليات ..
عشان الأماكن دي غير مجهزة للتعامل مع حالات الصدمة التحسسية لقدر الله لو المريض أخد الحقنة وحصل تفاعل الحساسية كلها دقائق ويتوفى لو متعاملناش معاه 💔
الحل إننا نروح ناخد الحقنه في المستشفى لأن دا المكان اللي المفروض مجهز للتعامل مع الحالات دي صح كدا ؟
لاء للأسف ممنوع في المستشفيات برضه عشان المسؤولية 🙉
طيب السؤال بقى ليه الدكاتره بتكتب حقن عمال على بطال في الروشيتات ؟
هل الحالة تستدعي فتتحجز في المستشفى وتاخد الحقن في المستشفى ولا هو عشان نجيب من الآخر والمريض فرحان أنك كتبتله حقن عشان تنجز !!
للأسف اللي بيتحط في مواجهة سخيفة مع المرضى هو الصيدلي
لو مرضاش يدي الحقنة ويخاطر بمستقبله المريض هيقوله خلاص هات الروشته اجيبها من مكان تاني ‼️
ولو قرر يخاطر ويعمل اختبار الحساسية ويدي الحقنه والحساسية ظهرت بعد كدا رغم أن الاختبار مظهرش منه حساسية ودا وارد لان اختبار الحساسية بيتعمل كدا بالحب وعادي ميظهرش اذا كان فيه حساسية ولا لاء وهنا بقى الكارثه ساعتها بقى ، الصيدلي هيتعمل عليه أحلى تريند واللي ليه واللي ملهوش هيطلع يتكلم عنه دا غير المسؤولية القانونية ومستقبله اللي هيضيع ، طيب ليه الصيدلي هو اللي هيلبس المصيبة دي !!
لأن الدكتور مأمن نفسه وكاتب في الروشته بعد عمل اختبار حساسية.
والشركة مأمنه نفسها وكاتبه بعد عمل اختبار حساسية.
(الإختبار اللي هو أصلا ملهوش لازمة ووارد جدا ميدينيش نتيجة صح)
والصيدلي الغلبان اللي خاف الروشته تطير منه لو مداش الحقنه أو بعد إلحاح أهل المريض عليه هنروح فين ونيجي منين يا دكتور متقلقش إديله الحقنه بس على مسؤوليتنا احنا.. هو اللي هيلبس فى الأخر والأهل اللي قلبهم محروق على ابنهم مش هيرحموه رغم ان هم اللي اتحايلوا عليه.
