dr.bassant hazem

21/04/2026

لو هرمون الكورتيزول عالي عندك… ده معناه التهابات أعلى في جسمك
وعشان كده نزول الوزن بيبقى صعب جدًا! 😳
الحل مش معقد… 10 خطوات بسيطة 👇

1. الملح الصخري

رشة صغيرة على كوب مياه بتظبط الإلكترولايت
ولما الجسم يتوازن… التوتر يقل

2. النوم الكويس

7–9 ساعات
السهر بيرفع الكورتيزول جدًا

3. تقليل الكافيين

القهوة الكتير = توتر أعلى

4. شاي البابونج

بيهدّي الأعصاب ويساعد على نوم أعمق

5. الماغنسيوم

موجود في الكاكاو الخام والمكسرات
مهم لتهدئة الجسم

6. التعرض للشمس الصبح

ينظم الساعة البيولوجية والكورتيزول

7. تقليل السكر

الـ spikes بتزود الالتهاب والكورتيزول

8. رياضة خفيفة

مشي أو يوجا
مش إجهاد زيادة

9. التنفس العميق

5–10 دقايق يوميًا بتفرق جدًا

10. راحة نفسية

قللي التوتر والعلاقات المرهقة.

03/04/2026

الكرش والأرداف .. أماكن الدهون العنيده
ليه الدهون بتعند في المناطق دي؟

كتير بيسألوني: "أنا بخس من وشي وكتافي، بس منطقة البطن أو الأرداف ثابتة ومابتنزلش!

الموضوع مش صدفة، ومش مجرد أكل.. دي كيمياء جسم!
هرمونات .. جينات

تعالى نفهم علمياً ليه ده بيحصل، وإزاي نحله بذكاء مش بس بمجهود.

📌 أولاً: ليه الدهون بتتراكم هنا بالذات؟

الموضوع خليط بين الجينات والهرمونات:

منطقة البطن (The Belly): غالباً مرتبطة بمقاومة الأنسولين (Insulin Resistance) وارتفاع هرمون التوتر
(Cortisol). لما تكون طول اليوم مضغوط، مابتنامش كويس،
وبتاكل سكريات.. جسمك بيخزن الطاقة على هيئة دهون حشوية (Visceral Fat) حوالين الأعضاء لحمايتها، وده اللي بيعمل "الكرش".

منطقة الأرداف والمؤخرة (Glutes & Hips): دي غالباً بتتحكم فيها جينات وهرمونات أنثوية (Estrogen) عند السيدات أكتر.

وقلة الحركة بتخلي الدورة الدموية في المنطقة دي أضعف، فعملية حرق الدهون فيها بتكون أبطأ.ويبدا كمان يظهر السيلوليت

❌ ثانياً: عادات غلط بتدمر مجهودك

عشان نصلح، لازم نعرف إحنا بنبوظ الدنيا إزاي:

النقنقه المستمره (Snacking): طول اليوم بتاكل أي حاجة تيجي في سكتك، حتى لو صحية! ده بيخلي مستويات الأنسولين دايماً عالية، وبالتالي حرق الدهون بيقف.

قعدة الكرسي: الجلوس لفترات طويلة بيقلل معدل الحرق اليومي (NEAT).

أكل الليل المتأخر: مشكلة الأكل بالليل مش في الوقت، المشكلة إنه غالباً بيفتح النفس على اكل مش صحي زي المعجنات والبيتزا، حلويات، سعرات فاضيه تبوظ مجهود طول اليوم

ده غير إن الوجبات الدسمة قبل النوم بتقلل جودة نومك، وتبوظ هرمونات الحرق تاني يوم.
كمان انك تبدّا بدايت قاسي : بتجوّع نفسك؟ جسمك بيدخل في حالة "مجاعة" وبيتمسك بالدهون العنيدة أكتر والمشكله انك لو هتكمل انت مش بتكمل 3 اسابيع وتبوظ عشان مش هتقدر تستمر وهتتعب .. لان محدش بيوجهك صح

✅ طيب يعني مفيش حل 🤨

عندك دهون عنيده وعايز نتيجة .. هتشتغل علي ٣ حاجات مع بعض

1️⃣ التغذية: عجز السعرات والصيام وزود بروتين :
لازم تاكل أقل من احتياجك.
مفيش مشروب هيحرق أكل سعراته عالية.
أكلك لازم يكون مطبوخ بطريقة صحية وطعمه حلو (التوابل مش هتزعل).

البروتين: زوّد بروتين في كل وجبة (فراخ، سمك، بيض، بقوليات لو ماعندكش مشاكل في القولون) عشان تشبع وتحافظ على عضلاتك؛ لأن العضلات (سواء للراجل أو الست) هي المحرك الأساسي لحرق الدهون.

الصيام المتقطع (اختياري بس فعّال): بيساعد جداً في ضبط الأنسولين وتقليل دهون البطن تحديداً.

2️⃣ الحركة (Functional Health):

مش تمارين بطن وبس: تمرين البطن بيقوي العضلة بس مش بيسيح الدهون اللي فوقيها! الحل في تمارين المقاومة للجسم كله (Compound Movements)

التمارين دي بتحرق سعرات أكتر وبتحسن شكل الجسم في المجمل.

زوّد خطواتك (NEAT): الحركة برا الجيم (المشي، السلم، شغل البيت) هي اللي بتعمل فرق شاسع في الحرق اليومي.

3️⃣ الاستمرارية (Mindset):

افتكر دايماً قاعدتي: "الاستمرارية دايماً تغلب المثالية.. وقليل دائم خير من كثير منقطع". مش لازم تكون 100% ملتزم، بس لازم تكون مستمر. يوم باظ منك؟ مش نهاية العالم، كمل تاني يوم عادي.

💡 نصيحة أخيرة: جسمك ذكي جداً، لو فهمته وصاحبته هيتغيّر.. لو عاندته وجوّعته هيعاند معاك.

Dr.Bassant Hazem

17/02/2026

:لو عايزة تخسّي في رمضان

1️⃣ - ابدئي فطارك بحاجة خفيفة
تمر + مية + شوربة علشان تهدي معدتك وتقللي الشراهة٠

2️⃣ - خلي طبق السلطة أساسي يوميًا
الألياف هتشبعك وتقلل امتصاص الدهون٠

3️⃣ - قلّلي الحلويات لأقصى درجة
مرة أو مرتين في الأسبوع بكمية صغيرة كفاية جدًا٠

4️⃣ - امشي بعد الفطار بـ30 دقيقة
حتى لو 20 دقيقة… هتفرق جامد في الحرق٠

5️⃣ - اختاري سحور بروتين + ألياف
بيض – زبادي – جبنة قريش + شوفان أو خيار… يشبعك وميعطشك 🤲🌙

15/02/2026

💜 في حب القراصيا 💜 الصديقة الوفية للجهاز الهضمي

​القراصيا مش مجرد فاكهة مجففة لرمضان، دي "صيدلية طبيعية" في حبة صغيرة.

السر في مفعولها السحري هو مادة السوربيتول (Sorbitol)؛ وده نوع من السكر الطبيعي اللي مش بيمتص بالكامل، فبيقرر يعمل مهمة إنسانية ويسحب المية معاه لداخل الأمعاء (بخاصية بنسميها علمياً الخاصية الأسموزية)، وده اللي بيحسن من الهضم ةيريح القولون ويسهل اخراج الفضلات جداا

​🌟 الفوائد
​بطلة "الإمساك": بتجمع بين الألياف والسوربيتول، يعني تنظيف وتليين طبيعي بدون كسل للأمعاء.

​حارسة العظام: الأبحاث بتقول إنها غنية بمركب "البورون" وفيتامين K، ودول ليهم دور كبير في حماية كثافة العظام.

​صديقة القلب: بتساعد في تقليل الكوليسترول الضار بفضل الألياف القابلة للذوبان.

​مضاد شيخوخة: فيها كمية مهولة من مضادات الأكسدة (الفينولات) اللي بتحمي خلاياك من التلف وبتفرق جداا في نضاره البشره .

​📉 طيب والدايت يا دكتور 🫣🤫

​في الدايت، القراصيا سلاح ذو حدين، بس لو استخدمتيه صح هيكون في صفك:

​مؤشر جلايسيمي معتدل: مش بترفع سكر الدم بسرعة البرق، فبالتالي مش بتجوعك بعدها بفترة قصيرة.

​الشبع: الألياف اللي فيها بتنفش في المعدة وبتحسسك بالامتلاء.

​الطاقة: ممتازة كـ "سناك" قبل الجيم بيدي طاقة فورية ومستمرة.

​🍯 وصفات القراصيا لزيادة الوزن
​لو هدفك زيادة الوزن بشكل صحي، القراصيا "قنبلة سعرات" لو اتجمعت مع مكونات تانية:

​سموزي الطاقة: (3 حبات قراصيا + كوب لبن كامل الدسم + ملعقة زبدة فول سوداني + موزة). اضربيهم في الخلاط، المشروب ده غني بالسعرات والمعادن.

​كرات الطاقة: اطحني القراصيا مع تمر، لوز مطحون، وجوز هند. كلي منها 3 كرات يومياً كوجبة إضافية بين الوجبات.

​مربى القراصيا البيتي: اطبخي القراصيا مع قليل من العسل والسمسم، واستخدميها كغموس مع القشطةالطبيعي

​🥗طيب يعني إزاي تاكليها في "الدايت"
​عشان تخسي وتستفيدي منها من غير ما وزنك يزيد:

​قاعدة الـ 3 حبات: لا تزيد حصتك اليومية عن 2 إلى 3 حبات (الحبة الواحدة فيها حوالي 20 لـ 25 سعر حراري).

​مع الزبادي: قطعي حبتين قراصيا على علبة زبادي يوناني أو طبيعي بالليل. دي وصفة مثالية لبطن مرتاحه وهضم ممتاز الصبح.

​بديل السكر: لو نفسك في حاجة حلوةاوي كلي حبة قراصيا بعد الوجبه وامضغيها ببطء، هترضي رغبتك في السكريات ببديل طبيعي مليان ألياف.

​⚠️ ​ القراصيا غنية جداً كمان بالبوتاسيوم، وده ممتاز لضغط الدم.
​بس ناخد بالنا انه لو زادت عن حدها، السوربيتول هيتحول من "ملين لطيف" لـ "مسبب للغازات والانتفاخ" وممكن إسهال شديد.

وال​نصيحة الذهبية: دايماً نشرب مية كتير مع القراصيا او اي الياف ؛ لأن الألياف من غير مية ممكن تعمل نتيجة عكسية وتسبب إمساك!

18/12/2025

صباح الخير ❤️🌞
يومكوا بيبدأ بوجبة الفطار لو فطرتوا صح هتكملوا اليوم كله صح اشربوا قبل الفطار كوبين مياه وزودوا البروتين في الفطار هتحسوا بشبع وقت أطول💪
يلا ابداوا مستنيين ايه

18/12/2025

🌿 نصائح دايت لو عايزة نتائج سريعة وثابته :
1️⃣ كلي ببطء 🏆 عشان تدي معدتك فرصة تشبع ، ومتضطريش تزودي أكل من غير ما تحسي .
2️⃣ اشربي مياه قبل كل وجبة ب10 دقايق 🚰 بتقلل الجوع وتزود الحرق .
3️⃣ نامي كفاية 😴 لأن قلة النوم بتزود هرمون الجوع وتبطأ الحرق .
4️⃣ متاكليش وانتي متوترة 🥺 او زعلانة💔 لأنك هتاكلي اكتر من احتياجك .
5️⃣ خلي طبقك فيه ألوان 🥦🥕 كل ماكان متنوع يزيد من مناعة الجسم
6️⃣ زودي البروتين في كل وجبة 🍗 بيساعد في الشبع وبناء العضلات .
7️⃣ متوزنيش كل يوم ⚖️ الوزن بيختلف بسبب الميه والهضم ، خليه مرة اسبوعيا .
8️⃣ الدايت مش حرمان 🍫 خدي قطعة صغيرة من الحلو المفضل مرة في الأسبوع عشان تثبتي .
9️⃣ خلي في يوم " توازن" مش " تخريب " 😅 لو خرجتي واكلتي برا ، ارجعي تاني للنظام من الوجبة اللي بعدها .
🔟 استمتعي بالرحلة ❤️ التغيير الحقيقي بيبدأ من أسلوب الحياة مش بس من الأكل .

09/12/2025

ناس كثير اول ما بتقف علي الميزان بتزعل و بتندم انها وزنت و في ناس بتتأثر لدرجة لما بنسألهم مالكم
الإجابة :

-(ان الميزان ثابت )🥹

-متزعليش لو وزنك ثابت الحقيقة ان وزنك مش مقياس نجاحك

-ناس كثير بتنزل دهون و بتزيد عضلات و بتزعل ان الرقم متحركش 🥹

✔️نصيحة
-الميزان بيقيس رقم مش شكل ، الميزان مش بيعرف بطنك نزلت او هدومك بقت اوسع

✴️ف الأهم من الميزان هي #المقاسات شكلك قدام المراية و هدومك و تغييرها عليكي 🤍

✔️نصائح :

١-هنوزن مرة واحدة كل اسبوعين و ممنوع توزني كل يوم

٢-الأصح للميزان يكون الصبح قبل الإفطار و الإخراج يكون منتظم كل يوم الصبح لان الإمساك بيعمل ثبات بالوزن

09/12/2025

وصفات فيها بروتين غير اللحمة والفراخ 🥩

09/12/2025

معلومة مهمه💥💥
عدم نزول الوزن لا يعني فشل الدايت دائمًا، ممكن يكون بسبب:
احتباس سوائل
اقتراب الدورة
زيادة عضل
ملح زائد
✅ الأهم من الميزان: المقاسات + شكل الجسم + الإحساس بالخفة.

09/12/2025