10/10/2026
🧕🏻 «ابني عنده سنتين ومش بيتكلم يا دكتور!»
👨⚕️ محتاجين نعمل مقياس سمع يا مدام.
🧕🏻 لا يا دكتور، هو بيسمع كويس جدا ! لما أنادي عليه بيلتفت، ولما التليفزيون يشتغل بيجري عليه!
👨⚕️ الحقيقة يا مدام، مقياس السمع مش رفاهية في حالات تأخر الكلام، لكنه خطوة أساسية في التقييم.
🤔 طيب إزاي ابني بيسمع الأصوات ومع ذلك ممكن يكون عنده مشكلة في السمع؟
👨⚕️ لأن استجابة الطفل لبعض الأصوات مش دليل كافي إن سمعه طبيعي تمامًا!
🔹 ممكن الطفل يسمع الأصوات العالية، لكن يكون عنده ضعف في سماع الأصوات الهادئة أو بعض الترددات المهمة لفهم الكلام.
🔹 ممكن يكون عنده ضعف سمع بسيط أو في أذن واحدة، والأهل ما يلاحظوش المشكلة بسهولة.
🔹 وممكن يكون عنده مشكلة في توصيل الصوت، زي وجود سوائل خلف طبلة الأذن، تؤثر على سماع الكلام بوضوح.
🔹 والطفل ممكن يسمع صوتك، لكن ما يقدرش يميّز الكلمات والأصوات الكلامية بنفس الكفاءة المطلوبة لاكتساب اللغة.
📌 ليه لازم نعمل مقياس سمع لطفل متأخر في الكلام؟
🔹 لاستبعاد ضعف السمع كأحد أسباب تأخر اللغة.
🔹 عشان نبدأ التدخل المناسب في الوقت المناسب لو اكتشفنا مشكلة في السمع.
🔹عشان أخصائي التخاطب يقدر يبني خطته العلاجية على تقييم سليم.
🔹 لأن اكتشاف ضعف السمع مبكرًا والتعامل معاه بيساعد الطفل على تطوير مهارات التواصل واللغة.
🧕🏻 طيب لو مقياس السمع طلع طبيعي؟
🧑🏻🔬 ده خبر كويس ، لكنه مش معناه إننا نوقف التقييم! لازم ندور على أسباب تأخر الكلام التانيه، ونقيم فهم الطفل للغة، وتواصله، ومهاراته النمائية والاجتماعية، مع بدء التدخل المناسب من غير تأخير.
وعلي أرض الواقع تقريبا اكتر من 20% من حالات تأخر الكلام اللي بنشوفها بيكون عندها ضعف سمع متوسط إلى شديد وده من تجربه مع الحالات ودراسات منشوره
