29/05/2026
س : انا حامل و عاوزة اعرف اكل اية عشان خايفة على البيبى جدا ؟
ج:
ضرورى جدا الاكل السليم اثناء الحمل و خصوصا ان فيه سبب قوى يخليكى تاكلى كويس و هوا طبعا الواد اللى بيتحرك فى بطنك هو معتمد عليكى متخيبيش امله فيكى
1. موضوع الاكل 3 وجبات دا تنسيه ..لازم يبقوا 10!!!! طب ازاى يا دكتور دا انا باكل 3 بالعافية و مش بكملهم كمان
المقصود العدد مش الكم يعنى تاكلى كتير على اد ما تقدرى حتى لو قليل
2. نبعد عن الاكل بتاع المطاعم مش مفيد تماما و خصوصا انه مليان زيوت و مواد حافظة
3. نبعد عن الاكل المشطشط (هيجيلك بواسير اللى هى طبيعى تكون عندك و انتى حامل ) و الاكل المسبك ( هيخليكى ترجعى )
4. نقلل الموالح و خصوصا فى اول 3 شهور بس للى ضغطهم واطى ممكن حاجات مالحة من وقت للتانى بخلاف السوايل الكتيرة و خصوصا المايا ثم المايا
5. السوايل زى ما قلت و خصوصا المايا للى ضغطهم واطى و بلاش قرفة و لا بلح بيسببوا انقباضات
6. بالنسبة لموضوع الترجيع دا موضوع مهم و ليه قاعدة لوحده فى العيادة
7. ناكل البروتينات زى اللحوم اللى مفيهاش دهون زى السمك و الفراخ
8. ناكل الاكل اللى فيه حديد زى السبانخ و الموز و التفاح و العسل الاسود و بالنسبة للكبدة ممنوعة
9. ممنوح سمك مملح مش عاوز اقول معفن زى الرنجة و الفسيخ
10. القهوة و الشاى بلاش كتير عشان الكافين اللى فيهم يعنى ممكن مرة او اتنين فى اليوم لو انتى مدمنة قهوة او شاى
11. مهم جدا ....متاخديش اى ادوية عموما فى اول 3 شهور الا بمراجعة الطبيب المعالج شخصيا حتى لو كان الموضوع صغير يعنى لو رموشك بتقع و هتاخى دوا كلمى دكتورك الاول
12. نقطة مهمة جدا بردو ...لازم نسوى الاكل بتاعنا كويس و خصوصا اللحوم و نغسل الخضار و الفاكهة كويس و بلاش لانشون
13. فى الاخر..............موضوع الاكل و الشرب ليه ممنوعات و دى زى ما ذكرت جزء منها بس فى العموم الموضوع مختلف من واحدة للتانية يعنى فيه واحدة بتحب تاكل كذا و مش بتحب تاكل كذا ...دا الحمل و دا عادى
المهم نلتزم بالممنوع و نبعد عنه و خلاص
