د.محمد عوض - استشاري طب الأطفال

30/09/2026

🚨 مهم لكل أب وأم… حملة الحصبة والحصبة الألماني اتأجلت!

طب اتأجلت ليه؟ 🤔
السبب المرة دي خبر كويس 👌

وزارة الصحة مشكورة بتجهز إن الحملة تكون مميكنة، بحيث يتم تسجيل بيانات الأطفال باستخدام أجهزة التابلت، وده يساعد على تنظيم التسجيل وتقليل احتمالات التكرار أو الأخطاء في تسجيل الجرعات. 💉📱

⚠️ عشان كده، ما تروحوش بكرة وتضيعوا وقتكم انتظارًا للإعلان الرسمي عن الموعد الجديد للحملة.

وأول ما الحملة تنزل رسميًا، هقولكم على كل التفاصيل هنا بإذن الله. ❤️

📲 شير الفيديو على أوسع نطاق عشان المعلومة توصل لكل أب وأم، وماحدش يروح على الفاضي.

د. محمد عوض
استشاري طب الأطفال وحديثي الولادة 👶🩺

#الحصبة

28/09/2026

أرجوكم
إقفلو المراوح والتكييف بالليل من دلؤتي

25/09/2026

شكراً للمحترمين جروب@شكاوي ومطالب قرية طوخ دلكه
وانتظرونا اليوم بإذن الله تعالى في تمام الساعة ٣مساءا

24/09/2026

مين قال إن التطعيم لازم ينتهي بعيّاط؟ 😂💉❤️

مليكة أخدت التطعيم… وخرجت مبسوطة وزي الفل 😍
وكمان ختمنا الزيارة بأحلى بوسة للدكتور 😂😘❤️

لأن تعاملنا مع الطفل وقت التطعيم بيفرق جدًا، وبنحاول دايمًا نخلي التجربة أهدى وألطف عليه قدر الإمكان 👶🏻🩺

وأهو مليكة خير دليل…
التطعيم خلص والبوسة وصلت 😂❤️

ربنا يحفظ مليكة وكل أطفالنا 🤲❤️

د. محمد عوض
استشاري طب الأطفال وحديثي الولادة 👨‍⚕️🩺

22/09/2026

⚠️ مش كل ترجيع عند الطفل سببه المعدة!
البنوتة دي كانت بتشتكي من زورها، ولما فحصت الحلق كويس لقيت جسم غريب رفيع جدًا عالق في الزور، والحمد لله قدرنا نشيله زي ما شايفين في الفيديو. ❤️
وده يخلينا ناخد بالنا من نقطة مهمة جدًا 👇
أحيانًا وجود شوكة سمك أو جسم غريب في الحلق ممكن يسبب ألم، إحساس بالشرقة أو صعوبة في البلع، كحة أو محاولات ترجيع، وممكن الأهل ما يكونوش عارفين الطفل بلع إيه أصلًا.
علشان كده يا ماما ويا بابا:
لو الطفل بيرجع بشكل متكرر، أو فجأة بدأ يرفض الأكل، يشتكي من زوره، يسيل لعابه بشكل غير معتاد، يكح أو يشرق أثناء الأكل… ما نفترضش تلقائيًا إن المشكلة نزلة معوية. الطفل محتاج يتفحص كويس.
وخاصة مع الأطفال الصغيرين: أبعدوا عنهم الأجسام الصغيرة والخيوط وقطع البلاستيك، ولو هياكلوا سمك لازم يتنضف بعناية شديدة جدًا من الشوك قبل ما يتقدم لهم.
🚨 ولو فيه صعوبة في التنفس، اختناق، عدم قدرة على البلع أو سيلان لعاب شديد، دي حالة تستدعي تقييمًا طبيًا عاجلًا، وما نحاولش نطلع الجسم بإيدينا في البيت.
الفحص الصح أحيانًا بيكشف سبب ما كانش حد متوقعه. 👌
د. محمد عوض
استشاري طب الأطفال وحديثي الولادة
#الأطفال

22/09/2026

بيقولوا الهدية مش بقيمتها المادية… بقيمتها المعنوية ❤️
وأنا مؤمن جدًا بالكلام ده…
بس من ساعة ما جالي دهب بدأت أراجع بعض المبادئ 😂😂
أصل موضوع الهدايا معايا في العيادة له تاريخ طويل…
مرة ملوخية 🌿
ومره تورتايه
ومرة فرخة 🐔
ومرة بطة… ومرة وزة 😂
وحمام، وعيش مخبوز، وفطير…
وكل واحد بييجي بالحاجة اللي بيحبها وعايز يفرّحني بيها ❤️
لكن المرة دي الجماعة غيروا الفئة السعرية خالص 😂😂
وربنا يحفظهم ويبركلهم إنهم وهما بيدوهالي قالولي:
«يا دكتور دي حاجة بسيطة… كنا عايزين نجيبلك حاجة أحسن»
بسيطة إيه يا جماعة؟!
ده أنا كنت مبسوط بالملوخية 😂❤️
وطبعًا بعيدًا عن الهزار…
أكتر من قيمة أي هدية، بيفرحني إن حد خرج من عندي مبسوط، وبعدها افتكرني وقال: أنا عايز أفرّح الدكتور زي ما فرّحني. ❤️
ربنا يديم المحبة بينا ويقدرني دايمًا أكون عند حسن ظنكم.
بس للتوضيح… الهدية فعلًا بقيمتها المعنوية.
إنما الدهب له معنويات عالية شوية 🤣🤣

20/09/2026

🤮 طفلك بدأ يرجّع فجأة؟

الفترة دي بنشوف حالات نزلات معوية كتير، وأحيانًا أول عرض بيكون الترجيع المتكرر.

💊 Ondansetron من الأدوية اللي ممكن تساعد في تقليل الترجيع في حالات مختارة من الأطفال، لكن الجرعة لازم تتحسب حسب وزن الطفل وتركيز المستحضر.

⚠️ المهم: وقف الترجيع مش هو العلاج كله.
بعد السيطرة عليه لازم نبدأ محلول الجفافلإ بالفم تدريجيًا لتعويض السوائل والأملاح ومنع الجفاف.

🚨 ولو الطفل:
مش قادر يحتفظ بأي سوائل، خامل بشكل واضح، البول قل جدًا، فيه دم أو لون أخضر في القيء، أو ظهرت عليه علامات جفاف شديدة → لازم يتكشف عليه فورًا.

احفظ الفيديو 📌 لأن نزلات المعدة والترجيع عند الأطفال ممكن يبدأوا فجأة.

د. محمد عوض
استشاري طب الأطفال وحديثي الولادة

19/09/2026

18/09/2026

دخلت الحضانة وأنا فاكر إني جاي أتكلم عن صحة أطفالنا…
وخرجت منها بواحدة من أجمل الذكريات اللي حصلتلي ❤️

كنت جاي أشارك في لقاء عن مناعة الأطفال، والتطعيمات، وإمتى الطفل يقدر يرجع الحضانة بأمان…

لكن اللي ماكنتش أعرفه إن فيه مفاجأة مستنياني فوق. ❤️

ممر شرفي من أطفال لابسين البالطو الأبيض 👨‍⚕️👩‍⚕️
استقبال جميل جدًا… فقرات حضّروها بحب… وأسئلة ونصايح وضحك وكلام من القلب.

والأجمل من كل ده؟
إني ماكنتش أعرف أصلًا إني بتصور…
فكل ابتسامة وكل لحظة فرحة في الفيديو كانت حقيقية جدًا.

يمكن إحنا كدكاترة متعودين إن دورنا هو إننا نطمن الأطفال ونخفف عنهم…
لكن المرة دي الأطفال هما اللي فرّحوني. ❤️

شكرًا من قلبي لكل طفل شارك في اليوم الجميل ده، ولكل شخص تعب علشان يحضّر المفاجأة دي.

وشكر خاص جدًا لـ مس سمر
وشكر كبير لـ د. سارة
وكل الشكر والتقدير لـ جينيس أكاديمي على الاستقبال الرائع والتنظيم والمفاجأة الجميلة اللي أسعدتني بجد. 🌷

اليوم خلص…
بس الذكرى دي هتفضل معايا كتير. ❤️

د. محمد عوض
استشاري طب الأطفال وحديثي الولادة

17/09/2026

اللي فاتحه شباك أو شيش تقفله دلؤتي عشان في نسمه هوا بارده شويه طبعاالهوا ده هياثر على الاطفال