رضاعة طبيعية من الألف للميم مع د. رنا حسن

01/06/2026

بارزة أو غائرة.. مش مهم!!
المهم انها بتنور.. 💡



❓س: أعمل إيه لو عندي ح**ة غائرة أو مسطحة؟

✅ ج: متقلقيش.. كتير من الأمهات قدروا يرضعوا رضاعة طبيعية ناجحة رغم وجود ح**ة غائرة أو مسطحة 💪🤍

❓ ازاي؟؟

اعملي الخطوات دي:

1️⃣ تجنبي الببرونة تماما

2️⃣ اتعلمي الالتقام العميق (Deep Latch) وتكنيك الساندويتش، لأن المهم إن البيبي يمسك الثدي صح، مش الح**ة بس.

3️⃣ حافظي على إنتاج اللبن بتفريغ الثدي بانتظام كل 2-3 ساعات لو البيبي مش بيرضع بكفاءة.

4️⃣ لو محتاجة تدي لبن مشفوط، يفضل بالكوب أو السوفت كب.

5️⃣ اعملي Skin-to-Skin كتير، واعرضي الثدي على البيبي بشكل متكرر وهو هادي وصاحي.

6️⃣ بعض الأمهات بيستفيدوا من شفط دقيقة أو دقيقتين قبل الرضعة ممكن يخلي الح**ة تبرز شوية.

7️⃣ زوري استشاري رضاعة طبيعية.. لأن فيه حلول وتكنيكات كتير بتتحدد حسب حالتك وحالة البيبي. و يا سلام لو عملتي الزيارة دي و انتي لسه حامل

8️⃣ والأهم من كل ده: استمري.. كرري.. واصبري ❤️

الح**ة الغائرة أو المسطحة ممكن تبقى تحدي في البداية، لكنها مش حكم بفشل الرضاعة الطبيعية أبدا أبدا.

لو محتاجة تشوفي فيديوهات لأمهات نجحوا بالفعل.. سيبيلي كومنت و هبعتلك لينكات ❤❤

#ح**ة_غائرة

01/06/2026

ما تخافيش ترضعي بره بالساتر..
لو أي حد ضايقك..
مشكلته هو.. مش مشكلتك 💪

31/05/2026

بطلتنا انهاردة من #الجزائر 💚💚
بعتتلي المسجات دي..
قد ايه فرحتني..
و قد ايه كلماتها دافية و جميلة..

فكرتني قد ايه هي كانت بطلة و مثابرة و قوية..
و كانت وقتها بتعوم عكس التيار..
و استحملت كتير لحد ما بدأت ترضع بدون ألم..

و الجميل بقى.. انها بعد نجاحها مع بنتها الاولى.. هي كانت السبب في نجاح اختها وبعدها اخت زوجها و دلوقتي ان شاءالله هتكون السبب في نجاح اختها الصغيرة 💪💪♥️♥️

تستحق كل الحب و التقدير و الاحترام..
ده كفاية لغتها العربية الرائعة..😍😍
كل المحادثات بينا طوال السنين اللي فاتت باللغة العربية الفصحى 🤍🤍🤍

من مصر ببعتلك كل الحب و التقدير
و كل التوفيق لأختك الصغيرة ان شاءالله 🩷🩷


#الجزائر #مصر

31/05/2026

- دكتور الاطفال قالنا نديله بالسرينجة مش ببرونة!
= أكيد د أحمد شلتوت.. صح؟
- ايوه صح!! و كمان قالنا استشاري الرضاعة هتقولكم لو فيه لسان مربوط ولا لأ..
= يعني ما بصش من بره و قال لسانه حلو و شغال؟
- لا 😀
= هو فعلا من اكتر دكاترة الأطفال في طنطا اللي بيدعموا الرضاعة الطبيعية "بحق و حقيقي" 👏🏻👏🏻

شكر خاص لد. أحمد شلتوت.. ☺️☺️
Dr.Shaltout Child Clinic عيادة د/أحمد شلتوت لطب الأطفال
و شكراً لدعمك الدائم للرضاعة الطبيعية
شكرا لكل دكتور أطفال مقدر نعمة لبن الأم و ما بيستسهلش الصناعي و بيدي العيش لخبازه

25/05/2026

سيبكم من الرسم البياني و الكلكعة.. هبسطهالكم..
استشاري الرضاعة الاجنبية دي عايزة تقول ايه؟؟
عايزة توريكم تغيير عدد رضعات البيبي في اليوم.. من اول ما كان لسه مولود لحد ما بقى ١٤ شهر..
و الرسم البياني بيبين ازاي في الاسابيع الاولى البيبي تقريبا كان بيرضع كل ساعة.. و ازاي مل ما بيكير.. رضاعته بتتباعد.. لحد في الاخر.. وصل لرضعتين في اليوم 😊😉

معرفة الطبيعي .. بيفرق اوي في ثقتك في نفسك.. و في انك تحاربي شكوكك و ظنونك.. و تعرفي انك ماشية صح…

كملي ♥️♥️💪💪

Look 👀 at this amazing graph which shows every recorded breastfeed for 14 months.

In the early days of breastfeeding it can feel like that’s all you’re doing, and it’s supported by the many dots (feeds) we see in the early months of this baby’s life, but look how the feeds spread out as the baby gets older.

You can see how the pattern changed again as the baby started to eat more solid food alongside breastfeeding, and then how shecontinued having a morning and evening breastfeed for many months after that too.

This is a fabulous visual to show what happens over the course of one breastfeeding journey. (Of course, not everyone’s will look like this)

Thank you so much to Lizzy for giving me permission to share this.

*edited to say, please be kind! This is just ONE feeding journey of ONE dyad. Every feeding journey looks different, and each journey is beautiful in its own right. It can be normal for some babies to decrease the number of feeds as they get older, and it’s fine to follow their lead if all else is well. However other babies will continue frequent feeds day and night and this is fine too! If you’re ever in doubt, or would like some reassurance/support please reach out.*

24/05/2026

و دي بقى كانت مشاعر جياشة من مامي جميلة جدا.. مبسوطة بعد ما وزن بنوتتها زاد اخيرا على الميزان .. ❤❤❤
عمري ما هنسى سجدة الشكر اللي سجدتها في وسط العيادة بعد ما شافت رقم الميزان 😍😍😍

ماشالله ماشالله.. الوزن ده اتحقق بعد زيادة ضعيفة في الوزن لمدة ٣ اسابيع تقريبا.. مع تشققات و جروح و قلق و حيرة 😥😓

المامي دي كان عندها اصرار رهيب الاسبوع اللي فات.. انها تصلح كل حاجة مرة واحدة.. 💪💪

هتصلح وضع الالتقام ✅
و هترضع من الناحتين ✅
و هتلحق علامات الجوع المبكرة ✅
و مش هتستخدم تيتينة ✅
و هتشيل الح**ة السيلكون ✅
و هتصحصح البيبي ✅
و هتضغطلها و هي بترضع ✅
و هتابع علامات الشبع ✅

و الحمدلله نجحت بجدارة.. 🎉🎉
سقفة كبيرة جدا ليكي.. 👏👏👏👏👏👏
فخورة بيكي من هنا لبكرة 😍❤😘

24/05/2026

صبايا.. محتاجة مساعدتكم..
الأم اللي والدة بقالها ١٠ ايام..
و بتمتحن امتحانات اخر السنة..
و تسافر تمتحن في بلد غير بلدها..
و بترضع البيبي طبيعي..
مع رضعة ولا اتنين صناعي بس..
لكن ما لحقتش تتفرج على الفيديوهات اللي بعتهالها لسه…

نقولها ايه؟؟؟

(الام محتاجة دعمكم.. واثقة في جدعنتكم… انطلقواااا.. هبعتلها اللينك 😉♥️)

20/05/2026

عمرك ما هتعرفي تضبطي الالتقام الصحيح .. إلا لو لحقتي "أول" علامات الجوع..!!
ايه ده؟ هو فيه أول و تاني؟ أمااال.. و فيه تالت.. و اه ياني لو وصلتي للتالت.. 😅

اتفرجي على الفيديو ده و اتعلمي علامات الجوع بمنتهى الوضوح و الهدوء كما لم ترينها من قبل

التعرف على العلامات دي و تمييزها هي أول مهارة لاتقان مهارات الالتقام السليم 😉😍

عمل مشترك مع أستاذتي الغالية د. عيادة د شروق الهيتمى للتغذية و الرضاعة الطبيعية

منشن للحامل ضروري.. هتفرق معاها كتير 😍

مين اتقالها رضعي البيبي لما يعيط؟؟


#حمل #حامل #رضاعة

19/05/2026

و سؤال المسابقة الأهم كان: مين في البيت محتاج ناخد بالنا منه اكتر 🤔:

- بابا 🩵
- ماما 🩷
- البيبي 💚

مين يا ترى؟ هي دي محتاجة سؤال 😅🤭🩷🩷🩷
طب تفتكروا الحضور الجميل جاوب ايه؟

*********

اللحظات دي كانت من مشاركة Medic8 Healthcare Clinics في كارنفيال مدرسة Sphinx في التجمع الاول..

كان يوم جميل اوي.. و انا اصلا بحب اللعب و المسابقات 🥳🥳

اتفرجوا على الفيديو و قولولي جاوبتوا كم سؤال صح 😍

19/05/2026

بفتح الفايل اراجع الهيستوري.. لقيت اخر زيارة من اكتر من سنة و شهرين..
فضولي زاد جدا.. يا ترى المامي جاية في مشكلة رضاعة لبيبي عمرها سنة و شهرين؟؟ قليل لما السن ده يجي في مشاكل رضاعة 🤔..

- بس هي جاية لوحدها يا دكتور.. مش معاها بيبي

يبقى ممكن حمل جديد؟ بس لحقت تحمل امتى و تخلف امتى؟ يا عيني يا بنتي.. ولا ممكن فطام؟ بس مش بدري شوية على الفطام؟ 🤔..
أنا مستعجلة ليه.. هعرف حالا 🤭🤭

- خليها تتفضل يا مريم.. 😅

*********

= بصي يا دكتور.. انا صحيت من يومين على كلكيعة.. و رحت لدكتور جراحة و خدت علاج و خفيت.. بس انا جاية عشان عايزة اعرف حصل لي كده ليه؟
- طب تعالي سوا كده نفصص اللي حصل اللي الاسبوعين اللي فاتوا.. احكيلي..
بدأنا علاج جديد؟ لا
كان فيه أي تعب؟ لا
غيرنا مقاس البرا؟ لا
البيبي بقت تنام اكتر؟ لا
في سترس؟ لا
نقلنا بيت جديد؟ لا
سفر؟ لا
شغل جديد؟ لا
تشفيط؟ لا
غيرتي حاجة في نظام اكلك؟ ااااه.. غيرت..

- ها؟ احكيلي.. 🤗

= انا قررت اني عايزة ارجع جسمي زي ما كان قبل الحمل والولادة.. و نزلت الجيم مع كابتن شاطرة.. و عملت نظام غذائي عشان يزود الكتلة العضلية.. بقيت افطر بروتين و اتغدى بروتين و اتعشى بروتين.. زبادي و بيض و لبن و شوفان و فراخ و سمك و تونة…
تصدقي فعلا يا دكتور.. بعدها لقيت صدري بقى يملى اكتر من الاول و في يوم حجّر و عمل الكلكيعة دي…

********

اذا عرف السبب.. بطل العجب ..
عرفتي ليه بيعملوا للأم الوالدة فرخة مسلوقة 😍

القصة دي بقيت احكيها للأمهات في العيادة لما نتكلم على خطة زيادة اللبن..

و اللي فكرني بيها.. مامي جميلة امبارح بتقولي انها حست صدرها بدأ يملى اكتر بعد ما زودت بروتين عملا بنصيحة صحبتها اللي كنت حكيتلها القصة الاسبوع اللي قبله 😅😍♥️

فقلت لا بقى.. لازم احكيلكم كلكم 🤗🤗♥️♥️😍😍

Moral of the story:

البروتين مدّر رائع و قوي للبن لو اتاخد بالكمية المطلوبة 🤩🤩
‼️ بس ما ننساش ان الطريقة الاكثر فعالية لزيادة اللبن هي سحبببببه..

يعني لو كلتي ١٠ فرخات و خمستشر كوباية حلبة و ٥ لتر مية و شريطين ادوية.. لبنك مش هيزيد الا لو كان فيه تحفيز و سحب بالشكل الصحيح.. اتفقنا؟

طب تفتكروا انا نصحت الأم دي ب ايه؟ هل قلتلها تقلل بروتين؟