30/07/2024
🛸 التبول اللاإرادى عند الأطفال 🤦😰 🛸
♦️من أكتر المشاكل اللى بتعمل توتر و قلق فى أى اسرة .. لو طفلها عنده تبول لا إرادى و المقارنات تشتغل و ابن عمه و بنت خالتها و الكلام دا للاسف بيزود تعقيد المشكلة 😓🤚
♦️لازم نتأكد أن فيه اختلافات بين الأطفال وكل طفل بيسبق فى حاجة ويتاخر فى حاجة مش معنى أن ابن عمه قلع البامبرز بدرى شهر .. أنه هيطلع رائد فضاء 👿👿
♦️ الأول خلينا نتفق أن التبول اللاإرادى نوعين مهمين جداً و مهم أوى نفرق بينهم 👌😨😨
🔵 النوع الأول: أن الطفل بعد عمر 5 سنين ميكونش مسك نفسه قبل كده يعنى علطول بيتبول على نفسه من ساعة ما اتولد ومكملش فتره 6 شهور على بعض يمتنع عن التبول فيهم على نفسه 👀🌚
🔵 النوع التانى: اللى هو الطفل فيه قعد فترة كويس بيمسك نفسه أكتر من 6 شهور على بعض وبعد كده رجع يتبول تانى على نفسه 🥴😓
♦️ ودى تفرق ايه بقى 🤔🤔 هو مش كده كده بيغرقنا وخلاص 😖😖😖😖 ..... لا تفرق كتير أوى
⬅️ النوع الأول بيخلينا نفكر أكتر فى أسباب العيوب الخلقية وسوء التدريب والمشاكل اللى بتكون معاه من الأول ...✋🧑⚕️
⬅️ النوع التانى بيخلينا نفكر أكتر فى الأسباب النفسية والأسباب اللى ممكن تظهر على الطفل 🥺😔
🧑⚕️ طيب أى هيا أسباب التبول اللاإرادى بقى ⤵️ ⤵️
1️⃣ سوء التدريب على حبس البول وسوء إدارة الموضوع من الأب والأم 🧕🧔
2️⃣ أن الواد يشرب كولا وبيبسى وشاى وشيكولاتة كتير بيعملوا تبول لا إرادى ‼️ ... آه طبعاً تخيلى لأن الكافيين الموجود فيهم مدر للبول وخاصة لما تتشرب بالليل قبل النوم ...🙋
3️⃣ كمية الأكل الكبيرة وشرب الميه الكتير قبل النوم، المفروض العشا يكون خفيف علشان الطفل ميشربش كميات ميه كبيرة 😁... المهم الفطار والغدا دول أهم بكتير ...🤗
4️⃣ اللحمية وحساسية الصدر وحساسية الأنف اللى مبتتعالجش كويس 👃🫁 ... مشاكل التنفس والكحة بتسبب الكوابيس وعدم انتظام النوم ومشاكل فى ضغط البطن وتسبب التبول الا إرادى ... يعنى لو فى لحمية تتعمل، لو فى حساسية صدر تتعالج كويس 🗣️😏
5️⃣ الإمساك المزمن ‼️ بيسبب تضخم المستقيم اللى هو مخزن البراز ومع مرور الوقت بيضغط على المثانة وميديهاش براح تتمدد فيه فى البطن فيحصل تبول لا إرادى ...👌
6️⃣ المشاكل النفسية ودى مهمة جداً ... مثلاً مشاكل الأب والأم وموت حد عزيز على الطفل ومشاكل المدرسة أو الحضانة أو جو المقارنات المستمر، للأسف مشكلة جامدة 😢😢
7️⃣ التهابات مجرى البول والأملاح ودى غالباً من عادات الأكل الغلط و قلة شرب الميه 😎💧
8️⃣ العيوب الخلقية فى مجرى البول ومشاكل الكلى ومشاكل فى المخ ومشاكل فى الهرمونات زى أمراض السكر ونقص الهرمون المضاد للتبول ودى الدكتور بيدور عليها لو الموضوع مطول و الطفل مش مستجيب للعلاج 🤓🤓📚📚📚
♣️ طيب ايه الحل ‼️‼️⤵️⤵️
💡 نقلل من شرب السوايل والميه والعصاير بالليل وقبل النوم بساعتين 🙋
💡 نقلل خالص المأكولات اللى فيها أملاح زى الشبسيات والحمضيات لأنها بتسبب الأملاح فى البول وكمان التهاب مجرى البول وكمان بتعطش الطفل وتخليه يشرب ميه كتير ✋
💡 ممنوع الأكل والشرب اللى فيها نسبة كافيين وككاو زى الشيكولاتة 🍫والبيبسى والكولا والشاى🍵 والقهوة ☕
💡 ممنوع نهااااااااااااااائى معاقبة الطفل وأفضل طريقة للتعامل مع الموضوع ده هو أنك تطنشى ولا اكنه عمل حاجة ومتعلقيش على الموضوع بعد ما يصحى مباشرة والكلام معاه فى الموضوع يكون بينك وبينه و تنبهى على أخواته محدش يتكلم فى الموضوع قدامه من الأساس واعتبار الموضوع ده خط أحمر 🚫🚫🚫
💡 يدخل الحمام قبل ما ينام ويعمل حمام و هو واخد وقته براحته خالص لأن المثانة مبتفضاش مرة واحدة 👼
💡 هتصحى الطفل بالليل كل 3 ساعات علشان يدخل الحمام يعنى تقريباً مرتين وتتأكدى أنه صحى و فاق و هو بيعمل حمام ..💂
💡 غطى الواد كويس بالليل وهو نايم وبلاش يتعرض للبرد وميكونش نايم وهو زعلان 💝🤗
💡 نشجع الطفل بأننا نعمل مكافأه أو جايزة له لو قدر يقعد كذا يوم ميعملش 🎉👏🎁
💡 تمارين تقوية المثانة مهمة .. بأننا ندرب الطفل على أنه يمسك نفسه شوية قبل ما يدخل الحمام وممكن نطول المدة أكتر شوية كل أسبوع 👌👌💪💪
💡 طالما قررنا أننا نعالج يبقا ممنوع منعاً باتاً لبس البامبرز لأى طفل فوق الخمس سنين لأنه هيديله إحساس بالأمان لو عملها على نفسه وهيتهاون فى أنه يمسك نفسه 😯❎
💡 مهم جداً نتكلم مع الطفل و نحل أى مشاكل نفسية تاعبة الطفل و مسببة له خوف و قلق 🫂💔
💡 طبعاً لازم نعالج التهاب مجرى البول ومشاكل التنفس والإمساك والعيوب الخلقية وغيرها من الأسباب اللى قولناها قبل كدا 😎
💡 طبعاً موجود حل دوائى و بيكون تحت إشراف الطبيب و دى آخر حاجة بنلجأ لها بعد حل كل المشاكل واتباع كل التعليمات السابقة ✅💊💉
