16/07/2026
ملاحظه مع إجازة الصيف الدنيا جايطة عندكم، والالتزام قل.
عايزين حماس ونشاط 🥳🥳
لازم تكملوا المشوار 💪💪
المتعة ما في الأكل غير الصحي ❌
المتعة في الصحة، وفي النشاط، وفي المقاسات الصغيرة ✅
المتعة إنكم لمن تمشوا تشتروا هدوم، الشخص الشغال في المحل يقول ليكم:
“دا ما مقاسكم، مقاسكم أقل من كدا.”
المتعة لمن تشوفوا نظرة الفخر في عيون أولادكم، لأنكم قدرتوا تنجحوا وتنقصوا وزنكم.
المتعة لمن تطلعوا من البيت وإنتو ما شايلين هم حتلبسوا شنو عشان يغطّي الزوايد في جسمكم، ولا تضطروا تلبسوا حاجة أو لون ما على مزاجكم عشان يغطّي الحتات الما عاجباكم.
المتعة لمن تطلعوا مع أصحابكم وصاحباتكم ويقولوا ليكم:
“إيه الرشاقة والجمال دا!”
المتعة لمن تسمعوا من الناس الحواليكم:
“بقيتوا أصغر وأحلى.”
المتعة لمن تنوموا من غير ضيق نفس، ولا شخير، ولا حرقان، ولا حموضة مضيقاكم.
المتعة لمن تتخلصوا من الأمراض المرتبطة بالوزن الزائد.
المتعة لمن بشرتكم تكون ناعمة وخالية من الحبوب لأنكم قدرتوا تتخلصوا من السكريات.
المتعة لمن شعركم وأظافركم يتحسنوا ويقووا.
المتعة لمن تحسوا بطعم النجاح، وتنتصروا على جهاد النفس.
المتعة لمن تقاوموا الإحباط والكسل، وتواصلوا المشوار بعزيمة وقوة.
المتعة لمن ما تمشوا وراء كلام الناس البقول:
“خلاص كفاية، وصلتوا.”
وإنتو عارفين إنو لسه قدامكم هدف أكبر.
المتعة الحقيقية، والأهم، إنكم توقفوا قدام المراية، راضين عن نفسكم وشكلكم، وفخورين بالإنجاز العملتوه.
استمتعوا بالحياة… فيها حاجات كتيرة أجمل من اللغاويس البتضحوا بصحتكم عشانها. ساعة أو ساعتين وتنتهي اللذة، وترجعوا تزعلوا من نفسكم وتدفعوا تمنها غالي.
💪🥳
💙 Nutrition Coach Nihal Ahmed 💙
#تغذيةصحية
