09/10/2026
Mae Wythnos Meddygon SAS yn tynnu sylw at y cyfraniad hanfodol y mae meddygon Arbenigol, Meddygon Cyswllt Arbenigol ac Arbenigwyr (SAS) yn ei wneud ar draws y GIG. Mae meddygon SAS yn glinigwyr profiadol ar lefel uwch sy'n chwarae rôl allweddol mewn gofal cleifion, addysg, arweinyddiaeth a gwella gwasanaethau.
Mae rôl Dr Georgina Forbes, Meddyg Arbenigol yn ein Gwasanaeth Iechyd Rhywiol ac Atgenhedlol, yn ymestyn ymhell y tu hwnt i ofal uniongyrchol i gleifion. Yn ogystal â chefnogi cleifion, mae'n addysgwraig, yn arweinydd diogelu ac yn arweinydd gwasanaeth, gan helpu i lunio a gwella gwasanaethau ledled Cymru.
Un cyflawniad y mae'n arbennig o falch ohono yw sicrhau cyllid a chydlynu hyfforddiant ar gyfer 13 o fydwragedd drwy Gynllun Iechyd Menywod Cymru. Ehangodd y prosiect y gofal a'r dewis oedd ar gael i fenywod ar draws gwasanaethau mamolaeth a gwasanaethau cymunedol, gyda 72 o fenywod yn defnyddio'r gwasanaeth newydd yn ystod ei dri mis cyntaf.
Mae Georgina hefyd yn cefnogi cydweithwyr fel goruchwylydd addysgol a hyfforddwr, tra'n cyfrannu at raglenni cenedlaethol sy'n helpu i wella iechyd menywod a gofal ôl-enedigol.
Wrth siarad am weithlu SAS, dywedodd Georgina:
"Mae Meddygon Arbenigol yn rhan brofiadol, fedrus a gwerthfawr o'r gweithlu. Mae gennym lawer i'w gynnig ym maes arweinyddiaeth, addysg, gwella gwasanaethau a gofal cleifion. Trwy gydnabod a chefnogi cyfraniad meddygon SAS, gallwn gryfhau gwasanaethau, cefnogi ein timau ac yn y pen draw wella canlyniadau i gleifion."
Diolch i Dr Georgina Forbes, ac i'n holl feddygon SAS, am yr arbenigedd, yr arweinyddiaeth a'r gofal tosturiol rydych yn eu darparu bob dydd. 💙
