30/07/2026
დღეს 30 ივლისს შეზღუდული შესაძლებლობის მქონე პირთა საბჭოს მორიგი შეხვედრა გაიმართა, რომელიც ორგანიზებული იყო გურჯაანის მუნიციპალიტეტის მერის მოადგილისა და შშმ პირთა საბჭოს თავმჯდომარის, ბატონი ვაჟა ბენაშვილის ინიციატივით.
შეხვედრის მიზანი იყო შშმ პირთა საკითხებზე მომუშავე ორგანიზაციებთან ღია დიალოგი, არსებული გამოწვევების განხილვა და სამომავლო თანამშრომლობის გაძლიერება.
შეხვედრას ესწრებოდნენ შშმ პირთა თემაზე მომუშავე ორგანიზაციები, სოციალური დეპარტამენტის ხელმძღვანელი ქალბატონი სოფიო ქუმსიაშვილი და ფინანსური სამსახურის წარმომადგენელი ქალბატონი ნატო გონგაძე.
შეხვედრის ფარგლებში თითოეულ ორგანიზაციას მიეცა შესაძლებლობა, წარმოედგინა საკუთარი საქმიანობა, გაეზიარებინა არსებული გამოწვევები, სამომავლო პრიორიტეტები და ის საჭიროებები, რომელთა გადაწყვეტაშიც სახელმწიფოს აქტიური ჩართულობა განსაკუთრებით მნიშვნელოვანია.
ა(ა)იპ „მშობელთა და ბავშვთა ინტერესების დაცვის ასოციაცია – დია“-მ საბჭოს წევრებს გააცნო ორგანიზაციის საქმიანობა. აღინიშნა, რომ ორგანიზაცია ემსახურება ადრეული განვითარების საჭიროების მქონე ბავშვებს (0–7 წელი) და აუტიზმის სპექტრის მქონე ბავშვებსა და მოზარდებს, უზრუნველყოფს მათთვის განვითარების, ქცევითი, მეტყველების, ფსიქოლოგიური და სხვა მულტიდისციპლინური სერვისების მიწოდებას, ასევე მშობლების მხარდაჭერასა და გაძლიერებას.
წარმოდგენილი იქნა არსებული სტატისტიკური მონაცემებიც: საქართველოში ადრეული განვითარების მხარდაჭერა განსაკუთრებით მნიშვნელოვანია, რადგან 0–7 წლის ასაკის ბავშვების დაახლოებით 10–15% განვითარების შეფერხების ან განვითარების რისკის წინაშე დგას, ხოლო აუტიზმის სპექტრის აშლილობის გავრცელება მსოფლიოში საშუალოდ ყოველ 100 ბავშვში დაახლოებით 1-ს შეადგენს. ამ ფონზე ადრეული ჩარევის სერვისებზე მოთხოვნა ყოველწლიურად იზრდება.
ორგანიზაცია „დიამ“ განსაკუთრებული ყურადღება გაამახვილა იმ პრობლემებზე, რომლებიც დღეს ყველაზე მწვავედ დგას: სერვისებზე გაზრდილი მოთხოვნა, სპეციალისტების დეფიციტი და ოჯახების საჭიროებების სრულყოფილად დაკმაყოფილების სირთულე.
შეხვედრაზე კიდევ ერთხელ აღინიშნა, რომ თითოეულ ბავშვს უნდა ჰქონდეს ხარისხიან სერვისებზე თანაბარი წვდომა, მიუხედავად მისი საცხოვრებელი ადგილისა და სოციალური მდგომარეობისა. სწორედ ამიტომ, აუცილებელია სახელმწიფოს, მუნიციპალიტეტებისა და სამოქალაქო სექტორის კიდევ უფრო მჭიდრო თანამშრომლობა, რათა შშმ ბავშვებისა და მათი ოჯახებისთვის შეიქმნას ღირსეული, თანასწორი და მხარდამჭერი გარემო.
მადლობას ვუხდით შეხვედრის ორგანიზატორს, გურჯაანის მუნიციპალიტეტის მერის მოადგილესა და შშმ პირთა საბჭოს თავმჯდომარეს, ბატონ ვაჟა ბენაშვილს, ასევე შეხვედრის ყველა მონაწილეს ღია დიალოგისა და თანამშრომლობისთვის.
გვჯერა, რომ მსგავსი შეხვედრები მნიშვნელოვანი ნაბიჯია შშმ პირთა უფლებების დაცვის, ინკლუზიური გარემოს გაძლიერებისა და საჭირო სერვისების განვითარების მიმართულებით.
გურჯაანის მუნიციპალიტეტის მერია • City hall of Gurjaani Municipality
გურჯაანის ადრეული ინტერვენციის სერვისი Early intervention service of Gurjaa
