21/02/2023
რატომ გვჭირდება ფსიქოლოგი?
ადამიანის ცხოვრება სავსეა პრობლემებით, რომელთა გამკლავებაც საკმაოდ რთულია. ზოგიერთი ამას დამოუკიდებლად ახერხებს, ზოგიერთისთვის - ეს შეუძლებელია.
ვის ვთხოვთ დახმარებას გამოსავლის ძიებისას ?
რა თქმა უნდა მეგობარს, ხშირ შემთხვევაში ეს ამართლებს, თუმცა არსებობს შემთხვევები, როდესაც მეგობრის კომპეტენცია ვერ სწვდება პრობლემას, გარდა ამისა მეგობარი არის ადამიანი რომელიც მიეკუთვნება სოციალური მხარდაჭერის სფეროს, ამიტომ მას თქვენთან აკავშირებს წარსული და დადებითი განწყობა, რაც შესაძლოა გახდეს სუბიექტური შეფასების მიზეზი.
გარდა მეგობრისა, პრობლემის გადაჭრაში შესაძლოა დაგვეხმაროს ფსიქოლოგიც. ფსიქოლოგი არის ადამიანი, რომელიც არ არის თქვენი სოციალური წრიდან, შესაბამისად არ აქვს არც დადებითი და არც უარყოფითი დამოკიდებულება თქვენ მიმართ, ამიტომ მისი შეფასება იქნება უფრო ობიექტური. ის ფლობს სხვადასხვა ხერხებს, რომელიც საშუალებას აძლევს მას დაგეხმაროთ სხვადასხვა პრობლემის გადაჭრაში. პროფესიული ეთიკის მიხედვით , ფსიქოლოგი ვალდებულია:
• დაიცვას კონფიდენციალობა;
• მუშაობის პროცესში ფსიქოლოგი ვერ გახდება თქვენი მეგობარი;
• ეკრძალება ინტიმური ურთიერთობა კლიენტთან;
• ეკრძალება კლიენტისთვის ზიანის მიყენება;
• ეკრძალება მანიპულირება კლიენტზე არსებული ინფორმაციით;
ნორმების დარღვევის შემთხვევაში ფსიქოლოგს აეკრძალება მუშაობა, რამდენიმე წლით ან სამუდამოდ.
ფსიქოლოგს შესაძლოა მივმართოთ სხვადასხვა მიზეზით: ეს შესაძლოა იყოს როგორც ხანმოკლე და ახლადაღმოცენებული, ასევე ხანგრძლივი პრობლემა, რომელიც წლებია გრძელდება და ბევრად ღრმა ფესვები აქვს ვიდრე გვგონია.
ფსიქოლოგთან ვიზიტი შესაძლოა დაგეგმოს პიროვნებამ, რომელსაც აღენიშნება შემდეგი სიმპტომები: დეპრესია, შფოთვა, წყენა, ფსიქიკური ჯანმრთელობის სხვადასხვა დარღვევები, სტრესული სიტუაციები, ადიქციები (დამოკიდებულება, მაგ: ნარკომანია).
ფსიქოლოგიური დახმარება მრავალფეროვანია, ზოგიერთი ადამიანი თავს უკეთ გრძნობს მტკიცებულებებზე დაფუძნებული დახმარების შედეგადაც, რომელიც აუმჯობესებს მის ცხოვრებას. ფსიქოლოგის მუშაობის ფორმას თერაპია ჰქვია. არსებობს თერაპიის სხვადასხვა სახეები, ყველაზე გავრცელებულია : კოგნიტური, ბიჰევიორალური, კოგნიტურ- ბოჰევიორალური, ჰუმანისტური, ფსიქოდინამიკური. პრობლემის კომპლექსურობის შემთხვევაში შესაძლოა რამდენიმე მეთოდით ერთდროული მუშაობა . რთული ფსიქიკური მდგომარეობის შემთხვევაში ფსიქოლოგი მუშაობს ფსიქიატრთან ერთად. თერაპიული და მედიკამენტოზური მკურნალობა ერთდროულად მიმდინარეობს.
ფსიქოლოგი საჭიროა სხვადასხვა ორგანიზაციებში, განსაკუთრებით სკოლებსა და საბავშვო ბაღებში, რათა ყურადღება მიექცეს სწავლებისა და აღზრდის პროცესებს და დარეგულირდეს მოზარდებისა და ბავშვების რთული ქცევა. ფსიქოლოგი განსაკუთრებით საჭიროა გარდამავალი ასაკის მოზარდებთან სამუშაოდ. გარდა მოზარდებისა ფსიქოლოგის ჩართულობა აუცილებელია მათ მშობლებსა და მასწავლებლებთან სამუშაოდ, რათა გააცნონ მათ მოზარდთა ასაკობრივი თავისებურებანი და ასწავლონ მოზარდთან სწორი კომუნიკაცია.
ფსიქოლოგის ჩართულობა აუცილებელია ასევე სწავლების სწორი სტრატეგიების შერჩევისას, ამ შემთხვევაში გათვალისწინებული უნდა იყოს ინტელექტის განვითარების სტადიები და ფიზიკური მომწიფება.
ფსიქოლოგის მუშაობა ასევე აუცილებელია სხვადასხვა ორგანიზაციაში, კადრების შერჩევისა და დიაგნოსტიკისათვის.
