08/06/2026
🌿🌳2026 წლის 6 და 7 ივნისს საქართველოს ეროვნულ ბოტანიკურ ბაღში ტონინო გუერას ფონდის ორგანიზებით, ქ. თბილისის მერიისა და საქართველოს ეროვნული ბოტანიკური ბაღის მხარდაჭერით გაიმართა ბუნებისა და ხელოვნების ფესტივალი ‘’მწვანე საღამოები/Serate Verdi’’. ღონისძიება მიეძღვნა გამოჩენილი იტალიელი პოეტის, მწერლის, მხატვრის, მოქანდაკის, დრამატურგის და კულტურის მოღვაწის, ტონინო გუერას ხსოვნას და წარმოგვიდგა, როგორც იტალიური და ქართული კულტურული ტრადიციების შეხვედრის უნიკალური სივრცე. 6 ივნისს, 20:00 საათზე, ფესტივალი საზეიმოდ გაიხსნა იტალიელი მომღერლის კონსუელო ალფიერისა და მისი ბენდის კონცერტით 7 ივნისს ბოტანიკურ ბაღში, ტონინო გუერას სახელობის ‘’დავიწყებული ხეხილის ხეივანში’’ გაიმართა იშვიათი და დავიწყებული ქართული ხეხილის ნერგების დარგვის ცერემონია. აღსანიშნავია, რომ ტონინო გუერას ხეივანი ბოტანიკურ ბაღში გაშენდა 2020 წელს, სადაც იშვიათი ჯიშის ხეხილის ნერგებია დარგული, რომლებიც ტონინო გუერას ოჯახისა და მისი სახელობის ფონდის მხარდაჭერითაა შემოტანილი. ტონინო გუერას სახელობის ‘’დავიწყებული ხეხილის ხეივანში’’ დარგულია ნატა ვაჩნაძის, სოფიკო ჭიაურელის, ჭაბუა ამირეჯიბის, რეზო თაბუკაშვილის, ნოდარ დუმბაძის, სანდრო მრევლიშვილის, თენგიზ ცერცვაძისა და სხვა საზოგადო მოღვაწეების სახელობის ხეხილის ნერგები. ამჯერად, გამოჩენილ პირთა სახელზე ხეების დარგვის მორიგ ცერემონიაში მონაწილე ექვს ქართველ მოღვაწეთა შორის იყო ჩვენი კლინიკის დამფუძნებელი და დირექტორი, თბილისის სახელმწიფო სამედიცინო უნივერსიტეტის ენდოკრი-ნოლოგიის დეპარტამენტის პროფესორი ემერიტუსი, საქართველოს ოკუპირებული ტერიტორიებიდან დევნილთა, შრომის ჯანმრთელობისა და სოციალური უზრუნველ-ყოფის სამინისტროს ექსპერტი - ენდოკრინოლოგი დავით მეტრეველი. შ.პ.ს. „დავით მეტრეველის სამედიცინო ცენტრის“ თანამშრომელთა სახელით გვინდა გამოვხატოთ გულწრფელი მადლიერება ტონინო გუერას ქართულ იტალიური ფონდისა და მისი პრეზიდენტის, მედიცინის საპატიო დოქტორის ნინო ჭუმბურიძის მიმართ, რომლის ინიციატივით ‘’დავიწყებული ხეხილის ხეივანში’’ სხვა ქართველ მოღვაწეებთან ერთად, დავით მეტრეველის სახელზეც დაირგა კიდევ ერთი ხის ნერგი, რაც ჩვენი საზოგადოების მხრიდან ყურადღების, პატივისცემისა და აღიარების გამოვლინებად მიგვაჩნია
