01/06/2026
ავადმყოფთა მომსახურე სასულიერო პირთა ორდენის (კამილიელები)
გენერალური წინამძღვარი
პროტ. № 6/2026
რომი, 1 ივნისი 2026
ძვირფასო თანამოძმეებო,
ძვირფასო კამილიელთა ქარიზმატული ოჯახის წევრებო,
ვიმედოვნებ, რომ უფლის მადლი კვლავაც განამტკიცებს თქვენს ცხოვრებას, მსახურებასა და ღვთისადმი მიძღვნილებას, მოგანიჭებთ შინაგან ძალას, ყოველდღიურ ერთგულებას და იმ ღრმა სიხარულს, რომელიც ქრისტესა და წმინდა კამილოს ქარიზმისადმი კუთვნილებიდან მომდინარეობს.
ამ დღეებში ჩვენ შევიკრიბეთ ბუკიანიკოში უმაღლეს წინამძღოლთა ყოველწლიურ შეხვედრაზე. ეს არის მოსმენის, მსჯელობის, გამოცდილების გაზიარებისა და ძმური ერთობის ძვირფასი დრო. ჩვენი ორდენის ცხოვრებაში ეს ყოველთვის მნიშვნელოვანი მომენტია, რადგან საშუალებას გვაძლევს ერთად ამოვიცნოთ დროის ნიშნები, გავაანალიზოთ მისიის წინაშე არსებული გამოწვევები და განვაახლოთ ჩვენი მსახურების ერთგულება ეკლესიისა და მსოფლიოს წინაშე.
ამ მნიშვნელოვანი ერთობისა და თანაზიარობის ჟამს გთხოვთ, ლოცვით დაგვიდგეთ გვერდით, რათა სულიწმინდამ გაანათოს ჩვენი მსჯელობა და გვიხელმძღვანელოს სახარებისეული სიბრძნით, წინასწარმეტყველური სიმამაცითა და ჭეშმარიტი ძმობის სულით.
ცოტა ხნის წინ, მამა ჯანფრანკო ლუნარდონთან ერთად, მქონდა სიხარული მენახულებინა პოლონეთი. ეს იყო მადლით აღსავსე და ღრმად შთამბეჭდავი გამოცდილება, რომელმაც შესაძლებლობა მოგვცა შევხვედროდით ცოცხალ საკრებულოებს, გულუხვ თანამოძმეებს და კამილიელთა ქარიზმისადმი ერთგულების გულწრფელ მოწმობას. ჩვენ მოვუსმინეთ ერთმანეთს, გავიზიარეთ გამოცდილება, გავამხნევეთ ერთმანეთი და გავაძლიერეთ ერთობის კავშირები პროვინციის შიგნით. ამ შეხვედრებმა კიდევ ერთხელ დაგვანახა, რამდენად მნიშვნელოვანია ერთობის დაცვა, ურთიერთმხარდაჭერა და ერთად სვლა.
ამ წერილით განსაკუთრებით მსურს მოგიწვიოთ, განსაკუთრებული გულმოდგინებით აღვნიშნოთ კამილიელთა მოწოდებებისათვის ლოცვის III მსოფლიო დღე 2026, რომელიც გაიმართება 2026 წლის 29 ივნისს, ორშაბათს.
წლევანდელი თემა განსაკუთრებული სილამაზისა და სულიერი სიღრმის მატარებელია:
„ერთად ტვირთი უფრო მსუბუქია“
„იტვირთეთ ერთმანეთის ტვირთი და ამგვარად აღასრულეთ ქრისტეს სჯული“ (გალ. 6,2).
ეს სიტყვა ეხება ჩვენი კამილიელთა იდენტობის გულს. როგორც დაავადებულთა მსახურნი და კამილიელთა ქარიზმატული ოჯახის წევრები, მოწოდებულნი ვართ არა მხოლოდ ავადმყოფთა, ღარიბთა და გარიყულთა ტანჯვის გაზიარებისათვის, არამედ ერთმანეთის ტვირთის სატარებლადაც — ძმობაში, თანაგრძნობასა და რეალურ სოლიდარობაში. ეს არ არის მხოლოდ სამწყსო მოწოდება; ეს არის სახარებისეული ცხოვრების წესი.
პირად დონეზე ეს თემა ღრმად მოგვმართავს. იგი მოგვიწოდებს შევაფასოთ მოსმენის, თანაგრძნობის, მოთმინების, მიმღებლობისა და მზადყოფნის უნარი. გვეკითხება, ვიცით თუ არა დახმარების მიღება, ვაძლევთ თუ არა სხვებს უფლებას შეეხონ ჩვენს სისუსტეებს და მზად ვართ თუ არა, ჩვენც ვიყოთ ნუგეშისა და იმედის მომტანნი ჩვენი ძმებისთვის.
საზოგადოებრივ დონეზე, განსაკუთრებით ჩვენს ინტერკულტურულ და მულტიკულტურულ თემებში, ეს გზავნილი კიდევ უფრო აქტუალური და აუცილებელია. სხვადასხვა ქვეყნიდან, ენიდან, კულტურიდან და მგრძნობელობიდან მომავალი თანამოძმეების ერთად ცხოვრება დიდი სიმდიდრეა, მაგრამ ამავე დროს ყოველდღიური გამოწვევაც. ძმობა თავისთავად არ იბადება; იგი შენდება მოთმინებით, თავმდაბლობით, გულწრფელი დიალოგით, ურთიერთპატიებითა და განსხვავებების გადალახვის უნარით.
ერთმანეთის ტვირთის ტარება ნიშნავს ვისწავლოთ მრავალფეროვნების აღქმა არა როგორც დაბრკოლებისა, არამედ როგორც კურთხევისა; არა როგორც მძიმე ტვირთისა, არამედ როგორც ადამიანური, სულიერი და ქარიზმატული ზრდის შესაძლებლობისა.
მსახურებისა და სამწყსო საქმიანობის სფეროშიც მოწოდებულნი ვართ ხელახლა აღმოვაჩინოთ ჩვენი მსახურების ყველაზე ღრმა ჭეშმარიტება. ავადმყოფთა მოვლა არ შეიძლება მხოლოდ პროფესიულ ეფექტიანობამდე ან ფუნქციურ თანდასწრებამდე დავიყვანოთ. ჩვენი მისია ნამდვილად სახარებისეული ხდება მაშინ, როდესაც იგი აღინიშნება თანაგრძნობით, ადამიანური სიახლოვით, სულიერი სინაზითა და ტანჯვის სიყვარულითა და პატივისცემით თანმხლებობის უნარით.
კამილიელთა ქარიზმატული ოჯახის ფარგლებში ლოცვის ეს მსოფლიო დღე წარმოადგენს ძვირფას შესაძლებლობას გავაძლიეროთ ერთობა, კუთვნილების განცდა და მოწოდებითი თანაპასუხისმგებლობა.
ამ დღის აღნიშვნა გაიმართება ავადმყოფთა მომსახურე წმინდა კამილოს კონგრეგაციის მონაზვნების მტავარ სახლში, რომელიც დღემდე რჩება სახარებისეული ერთგულებისა და ავადმყოფთა და ტანჯულთა სიყვარულით მსახურების ცოცხალ ნიშნად:
Via Maria Domenica Brun Barbantini 135, 00123 Roma
ამ მნიშვნელოვანი ღონისძიებისთვის სათანადო მომზადებისა და აქტიური მონაწილეობის ხელშეწყობის მიზნით, ფორმაციის გენერალურმა სამდივნომ, ცენტრალური ფორმაციული კომისიის წევრებთან ერთად, უკვე გაგიზიარათ საჭირო მასალები და რესურსები იტალიურ და ინგლისურ ენებზე. მათი მიზანია ხელი შეუწყოს პირად ლოცვას, გაამდიდროს საზოგადოებრივი რეფლექსია და გააღრმავოს ჩვენი საერთო მოწოდებითი მგრძნობელობა.
ამიტომ ვთხოვ პროვინციალურ წინამძღვრებს, ვიცე-პროვინციალებსა და პროვინციალურ დელეგატებს:
უზრუნველყონ მასალების დროული ბეჭდვა და ფართო გავრცელება თემებში, დაწესებულებებში, ვებგვერდებსა და სოციალურ პლატფორმებზე;
ხელი შეუწყონ ამ ლოცვით ღონისძიებაში აქტიურ, სიხარულით სავსე და გულწრფელ მონაწილეობას, ასევე, შესაძლებლობის შემთხვევაში, მოკლე სარეკლამო ვიდეოების მომზადებას;
შესაძლებლობის ფარგლებში უზრუნველყონ მასალების ადგილობრივ ენებზე თარგმნა, რათა გზავნილმა მიაღწიოს ყველას და იყოს ყველასათვის გასაგები.
ღონისძიება პირდაპირ ეთერში გადაიცემა 2026 წლის 29 ივნისს ავადმყოფთა მომსახურე წმინდა კამილოს კონგრეგაციის მონაზვნების მტავარ სახლიდან. ჩართვის ბმული მოგვიანებით გავრცელდება, რაც კამილიელთა ოჯახის წევრებს მთელ მსოფლიოში რეალური მონაწილეობის შესაძლებლობას მისცემს.
ძვირფასო ძმებო და დებო,
განვაგრძოთ ერთად სვლა, რწმენით განმტკიცებულებმა, სიყვარულში გაერთიანებულებმა და ჩვენი ქარიზმის მშვენიერებით შთაგონებულებმა. დაე, ლოცვის ამ მსოფლიო დღემ აღძრას ახალი მოწოდებები, თითოეულ ჩვენგანში განაახლოს ღვთისადმი მიძღვნილი ცხოვრების სიხარული და კვლავ აღმოგვაჩენინოს, რომ როდესაც სიყვარულით ვეზიარებით ერთმანეთს, თავად ქრისტე დადის ჩვენს შორის.
დაე, წმინდა კამილო შუამდგომლობდეს ჩვენთვის და გვასწავლიდეს მოწყალებით აღსავსე გულებით ცხოვრებას, მსახურებისთვის მუდამ მზადყოფნილ ხელებსა და ძმობის ნათლით გაბრწყინებულ საკრებულოებს.
ძმური სიყვარულით წმინდა კამილოში,
მამა პედრო ტრამონტინი, M.I.
გენერალური წინამძღვარი
