香港中文大學「醫·家·營」健康及營養支援計劃, Hong Kong (2026)

03/02/2023

【機會來了飛雲】

雖然醫家營計劃告一段落，
但中大公共衞生學院仲有好多其他健康活動架！🥳👏🏻
2月我地會開始招募社區健康工作者

經過訓練後可以為社區中有需要的社群進行身體檢查🩻
同進行健康跟進，一齊向健康邁進☃️

歡迎大家報名同叫身邊既朋友一齊參加😆😆

參加者條件︰
1. 參加者必須為18 歲以上
2. 能用廣東話溝通
3. 有責任感、準時

工作類別（二選一）︰
1. 進行健康評估
🔸必須完成培訓課堂（12小時版）
🔸4小時面授課堂 + 8小時健康評估實習
2. 進行健康評估 + 個案電話跟進及支援
🔸必須完成最少8成培訓課堂（80小時版）

報名連結︰ https://bit.ly/ccw-cuhk
截止報名日期： 2023年2月28日中午12:00

培訓會於5-6月以全實體方式進行~
Training會係威院CUHK Jockey Club School of Public Health and Primary Care 進行🙈

好想見到大家齊齊改善基層醫療🥰
快啲報名啦‼️
有咩問題想問都歡迎大家搵我地傾傾呀~

中大公共衞生及基層醫療學院團隊🚥

26/10/2022

《懶人正餐之選: 五彩粒粒飯》

唔知大家有冇聽過藜麥呢？望落去一粒粒咁，好多人都以為佢係穀物🌾，但其實藜麥係種子嚟架😮其中白、黑、紅顏色嘅藜麥就最常見：
⚪️ 白藜麥脆口之餘，味道比較清新
⚫️ 黑藜麥有嚼勁，而且帶有甜味，營養價值亦都係最高
🔴 紅藜麥就最軟身，較為適合小朋友同長者食用

唔少素食者同健康人士都鍾意食藜麥，因為佢哋真係好有營養💯：一杯煮熟咗嘅藜麥有5克嘅膳食纖維，除咗血糖管理之外，亦有助降低總膽固醇。仲有呀，一杯煮熟咗嘅藜麥原來有8克嘅蛋白質😍，藜麥含有人體無法合成嘅9種必需胺基酸(蛋白質)，所以絕對係優質嘅植物性蛋白質來源👍🏻。另外，藜麥亦都含有豐富嘅礦物質、維他命B雜等等🙌🏻 甚至比起一般嘅小麥、大米含有更加高嘅鐵質同鈣質，有益於骨骼健康🦴

講咗咁多藜麥嘅好處，係時候同大家分享一個用白、黑、紅藜麥整嘅素食食譜📖✨呢個食譜除咗藜麥之外，另外只需要3種材料：白米、西芹、番茄，而且只需要用電飯煲，唔使開火煮😌，想知更多嘅煮食貼士同詳細食譜就睇post啦😏

（內容由 #香港社區營養師協會註冊營養師黃蔚昕提供）

#賽馬會醫家營健康及營養支援計劃 #醫家營 #營養 #健康飲食 #健康資訊 #素食 #懶人食譜 #一鍋搞掂 #有營食譜 #健康食譜 #新煮意 #烹調新手 #無火煮食 #藜麥 #蔬菜類 #高纖 #蛋白質 #糖尿病 #血糖管理 #降膽固醇 #香港社區營養師協會

10/10/2022

《健康小食之選: 呑拿魚薯仔煎餅》

三點三下午茶煩緊食咩好🤔？好多人食黎食去都係麥當勞同茶餐廳，雖然係好食，但就唔係最健康嘅選擇。咁今日就等我哋介紹一個易整又健康嘅小食 – 呑拿魚薯仔煎餅 🐟🥔😋 咁樣下午茶又多個選擇啦😏

呢個食譜超啱烹飪新手🧑🏻‍🍳，基本上將所有材料撈勻，之後搓成餅狀，再加少少油煎至兩邊金黃色就可以㗎啦✨但要注意⚠️一定要將吞拿魚嘅水份完全隔去，咁樣先至夠乾身將材料搓成餅狀👍🏻 比起三文魚同其他魚，呑拿魚一般都含有較少脂肪同熱量✅ 但佢同時有豐富嘅奧米加三脂肪酸、蛋白質、維他命B12等等，可以幫我哋維持腦部同心血管健康，而且仲有抗炎功效💪🏻

但吞拿魚係深海魚，受重金屬（例如水銀）污染嘅機會比較大，宜適量進食❗️其實市面上售賣嘅罐頭吞拿魚五花八門🥫，有啲牌子會選用體型比較小嘅吞拿魚品種🐟，所以其重金屬含量會比較低🙂；相反地，體型比較大嘅吞拿魚品種（例如大眼吞拿魚、藍鰭吞拿魚同長鰭吞拿魚）嘅重金屬含量都會高啲🙃，大家記住睇清楚先買啦👀

食譜另一個特別之處就係用咗檸檬、粟米、彩椒、洋蔥呢啲天然嘅調味料去減低用鹽量，大家平時煮嘢食可以根據自己嘅喜好加入不同嘅天然調味料同香草，例如芫荽、蒜頭、香茅、薑、葱等等，可以增加食物嘅風味之餘，又可以減低鹽分嘅攝取，一舉兩得🤭 仲有呀，薯仔所含有嘅鉀都可以幫助身體排走多餘嘅鹽分，有助降血壓⬇️，仲有膳食纖維可以增加飽腹感😌

#賽馬會醫家營健康及營養支援計劃 #醫家營 #營養 #健康飲食 #健康資訊 #健康小食 #下午茶 #懶人食譜 #有營食譜 #健康食譜 #新煮意 #烹調新手 #呑拿魚 #蛋白質 #薯仔 #防三高 #高纖 #降血壓 #低糖 #糖尿病飲食

08/10/2022

每1️⃣0️⃣個香港人當中就有1️⃣個患有糖尿病，而糖尿病係香港人主要死因嘅第十位😵

糖尿病屬於慢性疾病🩺，當胰臟唔能夠分泌足夠嘅胰島素，或者胰島素唔能夠正常發揮功能（胰島素功用係將食物中嘅糖分帶入細胞內轉化成能量被身體利用），血糖就會高過正常水平，導致糖尿病🤒。

糖尿病嘅成因係基於好多唔同因素，而肥胖、缺乏運動、家族遺傳等等嘅因素會增加患病嘅風險，一般人只要恆常運動同均衡飲食，風險就可以大大減低✌🏻

「糖尿病唔可以食水果」、「糖尿病唔可以食白飯」，呢啲有關糖尿病飲食嘅限制大家平時應該聽唔少，但呢啲講法並非完全正確🙅🏻‍♀️。其實只要選擇合適嘅碳水化合物和留意份量，糖尿病患者都可以享受自己鐘意嘅食物☺️。今日介紹嘅醣質交換法就可以幫助糖尿病患者控制每餐醣質（碳水化合物）嘅攝取量同埋穩定血糖，詳情睇呢個post啦🔎

一般都會建議糖尿病患者在正餐攝取4-6份嘅醣質（當然因應唔同患者嘅需要攝取份量都會有所唔同，最好先諮詢營養師同醫生👩🏻‍⚕️）

咁1份醣質究竟有幾多呢？1份醣質等於1滿湯匙嘅白飯、2塊梳打餅、半碗白粥、半塊方包等等。另外，大家要特別留意甘薯類、根莖類，或者食落比較甜、口感鬆軟綿密嘅蔬菜，因為佢哋嘅醣質含量會比較高，番薯🍠、粟米🌽、蘿蔔🥕就係一啲高醣質嘅例子。最後最後，糖尿病患者每一餐都應該配合充足嘅蛋白質同脂肪黎穩定血糖✨

#賽馬會醫家營健康及營養支援計劃 #醫家營 #營養 #健康飲食 #健康資訊 #糖尿病 #高血糖 #血糖控制 #糖尿病飲食 #醣質交換法 #醣質 #碳水化合物

06/10/2022

⚠️各位食肉獸注意⚠️

唔知大家有冇留意成日食緊嘅肉究竟係咪高熱量或者高脂嘅呢🤔 今日就同大家睇幾款常見肉類嘅熱量、蛋白質同脂肪含量‼️等大家可以學識點樣揀又低脂又有優質蛋白質嘅肉類🥩

首先講咗最唔推薦嘅豬頸肉先，每100克嘅豬頸肉就有70克脂肪（即係七成都係肥膏），但係就只有6克蛋白質，而熱量竟然高達655千卡😰 所以如果揀豬頸肉作為肉類主食，好容易就會令到卡路里同脂肪攝取超標📈 之後第二高熱量嘅就係飯枱上經常出現嘅排骨🐖，雖然冇豬頸肉咁誇張，但100克嘅排骨都有23克嘅脂肪😩 跟住雞翼雖然有較高嘅蛋白質，但同樣地都有唔低嘅脂肪含量。以上講嘅三種肉類都係屬於近骨、腩位同埋皮層嘅位置，所以相對上脂肪含量會較高🧐

我地比較推薦兩款低脂、高蛋白質嘅選擇：牛腱🐂同雞胸肉🐓，每100克嘅牛腱同雞胸肉都有超過30克蛋白質，而且兩者嘅脂肪量都唔超過6克👍🏻 的確係減肥同健身人士嘅恩物😆

如果鍾意食牛嘅話，可以盡量揀啲比較瘦嘅部位例如西冷、牛柳、牛肩、封門柳；鍾意食豬肉嘅話就可以試吓豬柳、豬後脾、赤肉、豬𦟌、瘦豬扒，都係比較瘦嘅部位嚟㗎⭐️

另外，世界衛生組織(WHO) 建議一星期攝取最少兩份魚🐟，魚同海鮮可以代替肉類主食加入我哋日常的飲食裏面😋 🙌🏻 我哋間唔中仲可以用豆類代替肉類，例如黃豆、黑豆、鷹嘴豆、紅腰豆等等，有優質嘅蛋白質之餘，有豐富嘅膳食纖維同礦物質😉

#賽馬會醫家營健康及營養支援計劃 #醫家營 #營養 #健康飲食 #健康資訊 #卡路里大搜查 #食肉獸 #肉類 #肉類卡路里 #卡路里陷阱 #熱量炸彈 #高卡路里 #高脂 #脂肪含量 #高蛋白質

20/08/2022

《社區健康工作者》
我哋成日提「社區健康工作者」，到底佢哋係咩人？
其實佢哋係一班熱心嘅學生👨🏻‍🎓同退休人士👨🏻‍🦳👵🏼，雖然佢哋冇接受過專業醫學訓練，但係要成為「社區健康工作者」，都要經過一連串嘅培訓💪🏼，例如學習基本護理同營養知識🧐、個案跟進同評估嘅技巧✍🏼，仲要通過實習添🏃🏽！

唔好睇少佢哋呀🤘🏼！早前提及過嘅健康評估日同個案跟進，都係由社區健康工作者主力負責😲，為街坊提供日常生活中嘅健康建議，佢哋都係我哋團隊重要嘅成員嚟㗎🤗！

#賽馬會醫家營健康及營養支援計劃
#醫家營
＃社區健康工作者
＃無名英雄
＃不可或缺

18/08/2022

《疫境·互勉》

第五波疫情期間，我哋「醫·家·營」團隊了解到疫情對劏房住戶於經濟和生活上嘅嚴重打擊，不少街坊有糧食同防疫物資不足嘅情況😓，所以我哋早前派發咗防疫用品、快速檢測包、新鮮食物包、湯包及平安藥包比佢哋😁。
我哋亦有透過WhatsApp同電話關心街坊嘅個別需要🗣，為佢哋提供專業意見希望街坊平安度過疫情😷，在艱難時期都要保持住「精、氣、神」🔥🔥！

＃新冠疫情
＃身體健康
＃百毒不侵
＃食得是福

#賽馬會醫家營健康及營養支援計劃
#醫家營

17/08/2022

《健康管理在社區》

經過健康評估之後，469個參與家庭當中發現有大約43％都面對緊健康風險🥴，例如體重問題、前期糖尿病、前期高血壓等情況🤕。我哋團隊有註冊營養師👨🏻‍⚕️、護士👩🏻‍⚕️、社工👨🏻‍💼同社區健康工作者🧑🏻‍💻進行跨專業合作，改善大家嘅健康🤠！

我哋為呢班街坊提供咗營養師同護士既免費健康諮詢，幫佢哋度身訂造健康及營養目標，並且由社區健康工作者進行6個月電話跟進。為咗令街坊更清楚自己嘅身體狀況，我哋會借出健康監察工具比有需要嘅街坊，例如血壓計🌡、血糖機🖲同體脂磅⏲。如果問題嚴重，我地仲會轉介街坊去專科服務接受跟進😇。

＃劏房
#健康管理
#註冊營養師
＃護士哥哥姐姐
＃社工
＃社區健康工作者
＃健康諮詢
#血壓血糖體脂
＃幫緊你幫緊你

14/08/2022

《點食會健康啲❓: 茶餐廳篇》

茶記嘅常餐唔少香港人由細食到大，貪佢豐富、多唔同嘅配搭😍。但係食一個常餐已經好容易超過1000卡路里😰，今日就教大家點樣食常餐可以健康啲❕

首先講吓常餐成日出現嘅公仔麵，公仔麵經過油炸同加工，所以卡路里比其他麵類更高📈。其實將常餐嘅公仔麵轉做通粉或者米粉已經可以減少200卡路里👏🏻。另外，五香肉丁都係屬於加工肉類，將五香肉丁轉做鮮牛肉亦都可以減少200卡路里❕甚至轉做豬潤同叉燒都OK㗎👌🏻仲有呀，五香肉丁同公仔麵呢啲加工食物通常都好高鈉(鹽)，攝取過多嘅鈉增加腎臟嘅負擔，容易造成水腫、高血壓等等嘅健康問題，所以都係少食加工食物啦😤

另外，好多人鍾意嘅炒蛋加入咗大量嘅牛油🧈去炒，所以先至會咁滑，卡路里亦會比較高。想減少攝取卡路里同脂肪，大家可以將炒蛋轉做煎蛋🍳，就可以減少100卡路里🙌🏻。同埋多士🍞記得要走牛油呀😆牛油本身熱量高，一般錫紙包裝嘅牛油大概10克左右，已經有74卡路里同8克脂肪🫠，而且亦有唔少嘅膽固醇，想減肥、有膽固醇過高或者心臟病嘅人士要注意啦⚠️。

飲品方面，相信唔少人都鍾意飲奶茶同茶走(煉奶➕奶茶)呢類港式飲品。唔講唔知呀，一杯細細嘅奶茶已經有120卡路里，如果再另外加糖嘅話，卡路里仲高呀🫣。如果你想減低卡路里嘅攝取，就記得要少糖或者走糖，甚至可以考慮將奶茶轉做檸水🍋。

茶餐廳未必係最健康嘅選擇🤣，但大家都可以盡量揀啲比較低熱量、低脂、低糖嘅食物👍🏻，例如煎雞扒去皮同去肥膏、牛奶無糖麥皮、烚蛋、鮮茄牛肉通粉等等😋 想知仲有啲咩較好嘅選擇就睇我哋呢個post嘅最後一頁啦➡️

#賽馬會醫家營健康及營養支援計劃 #醫家營 #營養 #健康飲食 #健康資訊 #茶餐廳 #茶記 #常餐 #健康搭配 #健康貼士 #健康飲食貼士 #熱量 #外食 #減脂 #減醣 #減鹽

13/08/2022

《卡路里大搜查: 茶餐廳篇☕️》

一個成年人每日所需嘅熱量大概係1800-2000卡路里*🔥，通常早餐會建議攝取大概300-500卡路里左右，以免攝取過多熱量👌🏻但係大家可能唔知道一個普普通通嘅茶記常餐好容易就會超過一個人每日所需熱量嘅一半呀😭

以五香肉丁公仔麵為例，食晒一碗嘅話就有815卡路里，已經係早餐建議攝取熱量嘅2-3倍。仲有常餐必備嘅多士同炒蛋，兩樣都各有大概200卡路里，如果另外再加牛油、煉奶、果醬嘅話，卡路里仲會更加高添呀📈。另外，香港人最愛嘅港式奶茶都有120卡路里架🫣。計計埋埋，一個茶記常餐已經有1356卡路里，熱量驚人😱

如果大家下次去茶餐廳想食早餐，但又想食得健康，就要留意我哋聽日嘅post啦❕我哋會教大家點樣食一個較低卡路里嘅常餐😋

*根據年齡同性別會有唔同 (可以參考之前嘅post😉👉🏻https://www.instagram.com/p/CgOuRXLhDch/?utm_source=ig_web_copy_link)

#賽馬會醫家營健康及營養支援計劃 #醫家營 #營養 #健康飲食 #健康資訊 #卡路里大搜查 #茶餐廳 #茶記 #常餐熱量 #常餐卡路里 #卡路里陷阱 #熱量炸彈 #地雷早餐 #高卡路里 #高脂 #高納

11/08/2022

《三文治自由配🥪》

今日又嚟同大家分享早餐食譜啦☀️，今次嘅食譜係健康三文治😋，同樣係可以自由配搭材料架。多啲選擇，唔怕食厭啦😙

包底🌮
除咗全麥方包🍞呢啲常見嘅選擇之外，仲可以用英式鬆餅(English Muffins)同墨西哥薄餅 (Tortillas) 🌯，一樣咁飽肚好味🤤。如果怕早餐食得太飽或者減緊肥嘅話，可以試吓用生菜🥬、切片蕃薯🍠、越南米紙做包底，呢啲碳水化合通常較少加工❕

配料🥒
最理想就有膳食纖維同蛋白質🥚。蔬菜一般都有好豐富嘅膳食纖維，想再健康啲嘅話就要加入唔同顏色🌈，好似甜椒同蕃茄🍅都係唔錯嘅選擇，顏色靚啲食慾都大增呀😌，而且有唔少研究表示膳食纖維除咗可以有助排便，仲可以有助預防癌症和心臟病嘅慢性疾病😮。蛋白質嘅話，大家可以跟據個人口味黎揀，例如低脂芝士🧀、雞肉、蝦、蛋等等，吸收充足嘅蛋白質好重要架，可幫助小朋友發育，又可以幫老人家預防肌少症，仲可以幫助增強免疫力添💪🏻

醬料調味🍯
市面上好多醬料都好高糖高脂高卡路里，買嘅時候最好就睇清楚係低糖低脂先好買‼例如低脂蛋黃醬同低脂忌廉芝士😋。鐘意食牛油果🥑嘅話，可以用牛油果黎做醬料，有研究顯示佢入面嘅維生素E、維他命 C、健康嘅脂肪酸同葉黃素(Lutein)有助抗氧化同預防衰老✨。最後同大家介紹一個比較少見嘅食物 — 瑞可塔芝士(Ricotta Cheese)，佢嘅卡路里唔單止俾一般芝士低，而且含有豐富嘅蛋白質，啱晒一眾健身人士🏋🏻‍♂️

簡簡單單嘅三文治可以有幾十款唔同嘅配搭🥪，實會配到一款啱你口味又有營養嘅😉

#賽馬會醫家營健康及營養支援計劃 #醫家營 #營養 #健康飲食 #健康資訊 #健康早餐 #有營早餐 #創意早餐 #三文治 #三文治配撘 #三文治自由配 #自創食譜 #新煮意

05/08/2022

《點食會健康啲❓: 麥當勞篇🍟》

香港人生活節奏急促，乜嘢都要快💨，就連食嘢都唔例外，好多時候都會揀麥當勞之類嘅快餐，咁究竟有冇咩方法食麥當勞都可以健康啲呢？🤔

貼士1️⃣ — ✅漢堡包走醬
大家可能冇留意醬汁嘅卡路里都幾高下，主要係因為裡面含有大量嘅添加糖同脂肪😥，所以只要走醬就可以減低50至100卡路里📉，用魚柳包做例子，走醬嘅話可以減少90卡路里👍🏻

貼士2️⃣ — ❌高糖飲料
上一個post同大家講過食得太多添加糖有可能引起嘅健康問題，世界衛生組織(WHO)建議每人每日糖嘅攝取上限係50克，其實只要將餐入面嘅汽水🥤轉做走糖嘅檸檬茶或者水、無糖汽水、黑咖啡☕️，就可以大大咁減低糖分攝取啦🤩

貼士3️⃣ — ✅粟米杯代替薯條
薯條🍟經過加工同高溫油炸，熱量高之餘仲好高脂，大家下次叫麥當勞餐嘅時候，不妨試吓將薯條轉做高纖低卡嘅粟米杯🌽，咁樣就唔怕攝取過多嘅脂肪啦😎

貼士4️⃣ — ✅豬骨湯代替原味湯
快餐其中一個唔健康嘅原因係因為佢太高鈉(鹽)，攝取過多鈉除咗會導致水腫、口乾之外，仲會增加腎臟嘅負擔同高血壓、心血管疾病嘅風險，而WHO建議每日最多攝取2000毫克嘅鈉，係食麥當勞早餐扭扭粉🥣嘅時候，大家可以試吓將湯底由原味轉做豬骨湯，咁樣可以減少攝入755毫克嘅鈉（計番幾乎係每日建議攝取量嘅三分之一😌）

最後，俾個例子大家，一個正常嘅板燒雞腿包套餐配中薯條同可樂係819千卡，但如果將個包走醬、薯條轉粟米、可樂轉無糖可樂，咁樣只會有350千卡，卡路里減低咗一半有多😉，大家下次去麥當勞嘅時候不妨參考吓以上嘅貼士同例子，咁樣就可以食得健康啲啦😝

#賽馬會醫家營健康及營養支援計劃 #醫家營 #營養 #健康飲食 #健康資訊 #麥當勞🍟 #麥當勞🍔 #健康搭配 #健康貼士 #健康飲食貼士 #熱量 #外食 #減脂 #減醣

香港中文大學「醫·家·營」健康及營養支援計劃

03/02/2023

26/10/2022

10/10/2022

08/10/2022

06/10/2022

20/08/2022

18/08/2022

17/08/2022

14/08/2022

13/08/2022

11/08/2022

05/08/2022

Address

Telephone

Website

Alerts

Shortcuts

Share

Category