20/06/2026
കേരള ബജറ്റ് 2026-27: പ്രഖ്യാപനങ്ങൾക്കപ്പുറം ഭിന്നശേഷി മേഖലക്ക് യഥാർത്ഥത്തിൽ എത്ര തുക? -ശിവദാസ് കൃഷ്ണൻ
കേരള സർക്കാരിന്റെ 2026-27 ബജറ്റിൽ ഭിന്നശേഷിക്കാർക്കായി ഉൾക്കൊള്ളുന്ന അടിസ്ഥാനസൗകര്യങ്ങൾ, ബാരിയർ-ഫ്രീ ടൂറിസം, സ്പെഷ്യൽ സ്കൂളുകൾക്ക് എയ്ഡഡ് പദവി, കെയർഗിവർ പരിശീലനം തുടങ്ങിയ നിരവധി പ്രഖ്യാപനങ്ങൾ ഉണ്ടായിട്ടുണ്ട്. എന്നാൽ ഒരു അവകാശ അധിഷ്ഠിത (Rights-Based) കാഴ്ചപ്പാടിൽ ബജറ്റ് വിലയിരുത്തുമ്പോൾ പ്രഖ്യാപനങ്ങൾ മാത്രം പോര; അവയ്ക്ക് പിന്നിൽ എത്ര തുകയാണ് വകയിരുത്തിയിട്ടുള്ളത് എന്ന ചോദ്യത്തിന് വളരെയധികം പ്രാധാന്യമുണ്ട്
സാമൂഹ്യ സുരക്ഷയും ക്ഷേമവും (Social Security & Welfare page: 159-161) എന്ന വിഭാഗത്തിന് 2026-27 സാമ്പത്തിക വർഷത്തിൽ മൊത്തം ₹19,237.96 കോടി രൂപയാണ് അനുവദിച്ചിരിക്കുന്നത്. ഇതിൽ ഭൂരിഭാഗം തുകയും "Non-Plan" ചെലവുകളായാണ് വകയിരുത്തിയിരിക്കുന്നത്.
Plan Allocation എന്നത് പുതിയ പദ്ധതികൾ, വികസന പ്രവർത്തനങ്ങൾ, അടിസ്ഥാനസൗകര്യ വികസനം, സേവന വിപുലീകരണം, നവീന പദ്ധതികൾ തുടങ്ങിയവയ്ക്കുള്ള ചെലവിനെയാണ് സൂചിപ്പിക്കുന്നത്. ഭിന്നശേഷി മേഖലയിൽ ഇത് പ്രവേശന സൗകര്യങ്ങൾ (Accessibility), ഉൾക്കൊള്ളുന്ന വിദ്യാഭ്യാസം, സഹായ ഉപകരണങ്ങൾ, കെയർഗിവർ പരിശീലനം, പുതിയ സേവന കേന്ദ്രങ്ങൾ തുടങ്ങിയ വികസനപരമായ പ്രവർത്തനങ്ങൾക്കായി ഉപയോഗിക്കപ്പെടാം. 2026-27ൽ മൊത്തം Plan Allocation ₹1,629.85 കോടി രൂപ മാത്രമാണ്. ഇത് മൊത്തം ബജറ്റിന്റെ ഏകദേശം 8.47 ശതമാനം മാത്രമാണ്.
അതേസമയം Non-Plan Allocation ₹17,608.11 കോടി രൂപയാണ്. ഇത് മൊത്തം ബജറ്റിന്റെ ഏകദേശം 91.53 ശതമാനം വരും. പെൻഷനുകൾ, ജീവനക്കാരുടെ ശമ്പളം, ഗ്രാന്റുകൾ, നിലവിലുള്ള പദ്ധതികളുടെ നടത്തിപ്പ്, സ്ഥാപനങ്ങളുടെ പരിപാലനം തുടങ്ങിയ ആവർത്തന ചെലവുകളാണ് ഇതിൽ ഉൾപ്പെടുന്നത്.
ഈ കണക്കുകൾ നമ്മെ എന്താണ് പഠിപ്പിക്കുന്നത്?
സാമൂഹ്യ സുരക്ഷാ ബജറ്റിന്റെ 91 ശതമാനത്തിലധികം നിലവിലുള്ള ബാധ്യതകൾ തുടരാനാണ് ചെലവഴിക്കുന്നത്.
പുതിയ പദ്ധതികൾക്കും വികസന പ്രവർത്തനങ്ങൾക്കും ലഭ്യമാകുന്ന വിഹിതം 8.5 ശതമാനത്തിൽ താഴെയാണ്. അതിനാൽ ഭിന്നശേഷി സൗഹൃദ അടിസ്ഥാന സൗകര്യങ്ങൾ, ബാരിയർ-ഫ്രീ ടൂറിസം, കെയർഗിവർ പരിശീലനം, പ്രത്യേക വിദ്യാലയങ്ങൾക്ക് എയ്ഡഡ് പദവി തുടങ്ങിയ പ്രഖ്യാപനങ്ങൾ യഥാർത്ഥത്തിൽ നടപ്പിലാകുമോ എന്ന് അറിയാൻ കൂടുതൽ വിശദമായ ബജറ്റ് രേഖകൾ പരിശോധിക്കേണ്ടതുണ്ട്. അതിനു നമ്മൾ, ഭിന്നശേഷിയുള്ളവരുടെ രക്ഷിതാക്കൾ തന്നെ മുന്നിട്ടിറങ്ങണം. ആജ്ഞ ശക്തിയായി മാറുവാൻ ഇപ്പോൾ തന്നെ തയ്യാറാകണം.
ഭിന്നശേഷി അവകാശ നിയമം 2016 പ്രകാരമുള്ള ഒരു അവകാശ അധിഷ്ഠിത സമീപനത്തിൽ നമ്മൾ, ചോദിക്കേണ്ട പ്രധാന ചോദ്യങ്ങൾ ഇവയാണ്:
₹1,629.85 കോടി രൂപയുടെ Plan Allocation-ൽ ഭിന്നശേഷിക്കാർക്കായി പ്രത്യേകമായി എത്ര തുക മാറ്റിവച്ചിട്ടുണ്ട്?
പ്രവേശന സൗകര്യങ്ങൾ (Accessibility), ഉൾക്കൊള്ളുന്ന വിദ്യാഭ്യാസം, തൊഴിൽ, കമ്മ്യൂണിറ്റി ലിവിംഗ്, സ്വതന്ത്ര ജീവിത പിന്തുണ, വ്യക്തിഗത സഹായ സേവനങ്ങൾ, പ്രാരംഭ ഇടപെടൽ (Early Intervention) എന്നിവയ്ക്കായി എത്ര തുക വകയിരുത്തിയിട്ടുണ്ട്?
സാമൂഹ്യ സുരക്ഷാ-ക്ഷേമ ബജറ്റിലെ ₹19,237.96 കോടിയിൽ എത്ര തുകയാണ് യഥാർത്ഥത്തിൽ ഭിന്നശേഷിക്കാർക്ക് നേരിട്ട് പ്രയോജനപ്പെടുന്നത്?
അതിനാൽ ബജറ്റിലെ പ്രഖ്യാപനങ്ങൾ സ്വാഗതാർഹമാണെങ്കിലും, അവയുടെ ഫലപ്രാപ്തി വിലയിരുത്താൻ താഴെ പറയുന്ന രേഖകൾ പൊതുജനങ്ങളും അവകാശ പ്രവർത്തകരും പരിശോധിക്കേണ്ടതാണ്:
സാമൂഹ്യ നീതി വകുപ്പിന്റെ വിശദമായ Demand for Grants
ഭിന്നശേഷി ക്ഷേമ പദ്ധതികളുടെ പദ്ധതി- തിരിച്ചുള്ള വകയിരുത്തലുകൾ
സംസ്ഥാന ഭിന്നശേഷി കമ്മീഷണറുടെ ഓഫീസിനുള്ള വകയിരുത്തലുകൾ
ഭിന്നശേഷി അവകാശ നിയമം 2016 നടപ്പാക്കുന്നതിനുള്ള പ്രത്യേക ഫണ്ടുകൾ
ബജറ്റിന്റെ യഥാർത്ഥ വിലയിരുത്തൽ മൊത്തം തുക നോക്കിയല്ല, ഭിന്നശേഷിക്കാർക്ക് തുല്യാവകാശം, പ്രവേശന സൗകര്യം, സ്വതന്ത്ര ജീവിതം, ഉൾക്കൊള്ളൽ എന്നിവ ഉറപ്പാക്കാൻ എത്ര തുക ചെലവഴിക്കുന്നു എന്ന് പരിശോധിച്ചായിരിക്കണം. പ്രഖ്യാപനങ്ങളിൽ നിന്ന് അവകാശങ്ങളിലേക്കുള്ള യാത്രയ്ക്ക് കൃത്യമായ ധനവിനിയോഗവും സുതാര്യതയും അനിവാര്യമാണ്.
