08/05/2026
सुख थोड़े दुःख घणे जगत मैं, भोगे कष्ट सरै राणी ॥
किस-किस के दुःख दूर करूं, या दुनिया दुखी फिरै राणी ।। टेक
खेत उगाला, माह मै पाला, खुंडा फाला दुखी करै, थोड़ी नाला, आवैं तिवाला, बिगड़या ताला दुखी करै, पाहं मैं छाला, दाल मैं काला, आँख मैं जाला दुखी करै, भीत मैं आला, पछीत मैं खाला, घर मैं साला दुखी करै, एक खर्च कुढाला दुखी करै, नित कर्जा दुखी करै राणी।।
नार बिना भरतार दुखी, घरबार खान दुःख की दीखै, यार बिना दिलदार दुखी, लाचार खान दुःख की दीखै, साहूकार बिना सरकार दुखी, जमीदार खान दुःख की दीखै प्यार बिना परिवार दुखी, घरबार खान दुःख की दीखै एक संसार खान दुःख की दीखै, कोए जन्मैं कोए मरै राणी।।
कीड़ी कण बिन, हाथी मण बिन, नागन फण बिन दुखी रहै, विषणी विष बिन, इंद्री मनं बिन, भूखा अन्न बिन दुखी रहै, बाँझ जणंन बिन, चकवी मिलन बिन, सती सजन बिन दुखी रहै, योद्धा रण बिन, केहरी बण बिन, निर्धन धन बिन दुखी रहै, एक पक्षी गगन बिन दुखी रहै, जब पिंजरे आण घिरै राणी ॥
मात कुलक्षणी, मूर्ख बेटा, फूहड़ नारी दुःख देवा, बाप कै मौसी, बुरा पडोसी, ओछी यारी दुःख देवा, बुरे की संगत, जुआ जामनी, चोरी जारी दुःख देवा, पट बिन खेती, फसल पछेती, कोडी क्यारी दुःख देवा, सभी बीमारी दुःख देवा, नित चिंता चित्त को चरै राणी ।।
रेत की भींत, झील की बस्ती, गली मैं चोडा दुखी करै, कडवाल भैंस, बोलणी ऊंटणी, बलध लतोड़ा दुखी करै, खोरी झोटा, सांड मारणा, अड़ियल घोडा दुखी करै, बाट दूर की, बोझा भारी, जाथर थोडा दुखी करै, एक रग पै फोड़ा दुखी करै, कदे फूटै कदे भरै राणी ।।
गरीब सताणा, जुल्म कमाणा, ताप में नहाणा दुखी करै, दूर सिमाणा, पैदल जाणा, वजन उठाणा दुखी करै, सहम उलाहणा, धोखा खाणा, गाम मैं थाणा दुखी करै, लाग्गै लाणा, बैर पूराणा, जयादा खाणा दुखी करै, एक सुर बिन गाणा दुखी करै, बस न्यूं जगदीश डरै राणी ॥
#साहित्यग्रंथावली #जाटमेहरसिँह #निसावर्थभावसेवा #म्हारीसंस्कृति #दादामांगेराम #फ़ैनलख्मीचंदका #फ़ैन_लख्मीचंद_का #हरयाणवीरागनी #लिखित #रागनी
