02/05/2026
بما انه بلش موسم البطيخ .. و الدعم عالميديا صار حصري لمثيري الجدل، مش ناقص غير يجي واحد يبتكر نظام البطيخ لخسارة الوزن. علاج الأمراض.
لان الناس بحبوا الي بيضحك عليهم !!
هذا البوست اعتبروه كوميديا سوداء ، و ليكن دعوة لكل شخص يحترم عقله قبل ما يشجع على نشر افكار غريبة و مؤذية.
انت لما تتابع محتوى فيه افكار خاطئة بتشجع على زيادة انتشار هذا المحتوى، و قد يصل إلى أشخاص تفكيرهم محدود يصدقوه و يطبقوه و يضر نفسه!!!
بعرف انك عم تحاول تلاقي افكار جذابة و مريحة الك خاصة بالتغذية، و ما بلومك لانك عم تفترض ان هذا الشخص ما كان راح يحكي بكل هذه الثقة لو ما كان خبير صاحب علم و جدير بالثقة! بتلاقي واحد بيحكي غلط تشرب مي!!!، واحد تاني بيحكي الحليب فقط للعجول و ليس للانسان!!! غيره بيحكي الخضار هي المشكلة!!! او حتى الي اخترعت علم جديد ينص على ان البلغم موجود في الدم و ما بعرف شو بينشف المخ و بيسبب مشاكل و البصل هو الحل!!!!
ما اختلفنا ان البصل مفيد بس عمرة ما كان الحل السحري!! ولا في اي حلول سحرية اصلا!!!
ليش افترضتم انهم خبراء لمجرد انهم بيطلعوا بيحكوا بثقة!!! ما خطر ببالكم ان هالشخصية ممكن ببساطة يكون من النوع الغبي محدود الافق، و ترى هذا ما اله علاقة بالشهادات، ممكن اي حدا ياخد شهادات و هو غبي عادي جدا، ما خطرلكم ان هالشخص ممكن يكون بيضحك عليكم بأي كلام بيجيب تفاعلكم بهدف الشهرة !!! او بهدف يبيعكم منتج و السلام!!!
و بتطلع وحدة باللوك الملفت تأيد افكار ناس زي هيك و الكل بيسمعلها و كإنها خبيرة!!!!، مع انها مجرد شخصية مثيرة للجدل و مشهورة بعد فيديو كليب عملته قبل ١٥ سنه و من وقته بتعرض ارائها في كل المجالات حتى بالتغذية و علم النفس ...، المفروض يكون كل هذا كافي ما نسمعلها لكن بالعكس!!! الواضح ان الناس بتحب الي بيضحك عليها !!! حقيقة مؤسفة!
ما سألتوا حالكم ان لو كلامهم صحيح ليش ما سبقوهم العلماء بهيك معلومات و حلول سحرية؟!! كتير في دكاترة و بروفيسورات، ليش ما اكتشفوا سحر البصل ولا ضرر الخضار!!!!
كل واحد حر لمين يسمع
هي كلمة حق و حبيت اقولها
لا تسمعوا لهذا النوع من المحتوى المضلل
و لا تدعموا و تشجعوا المضللين بمتابعتهم
اي حدا بيقدر يطلع ينشر معلومة مصدرها دراسة انعملت على عشر فيران بظروف غير دقيقة، بس المفروض ان في مخ بيقيم و يحكم و ضمير يمنع التضليل و الرزق على الله . و لو صار طلع يحكي معلومات مضللة ، المفروض المستمع عنده عقل و ما يصدق اي شي بينحكى!!!
