09/07/2025
How to ចាយលុយកុំឱ្យលើសសមត្ថភាព?
១. ត្រូវដឹងពីសញ្ញាដាស់តឿនមួយចំនួន៖ រាល់ថ្ងៃនេះ តើអ្នកកំពុងតែខ្ចីលុយគេមកចាយវាយវ៉ិលជុំពីមួយខែទៅមួយខែឬអត់ (សូម្បីតែរបស់ប្រើប្រាស់ចាំបាច់ផ្ទាល់ខ្លួនក៏ខ្ចីលុយគេមកទិញ)? រាល់ខែដែលសល់លុយទុកសន្សំខ្លះអត់? សញ្ញាទាំងនេះអាចកំពុងតែប្រាប់អ្នកថា អ្នកចាយលើសចំណូលហើយ។
- គួរធ្វើ៖ ធ្វើកំណត់ត្រាការចំណាយឱ្យបានមួយខែ ដើម្បីដឹងថាលុយដែលរកបានហ្នឹងចាយលើអ្វីខ្លះ ហើយចាយលើអ្វីច្រើនជាងគេ ដើម្បីខែក្រោយទៅងាយស្រួលកាត់បន្ថយចេញខ្លះ។
២. បែងចែកឱ្យច្បាស់រវាង “តម្រូវការ” និង “ការចង់បាន”៖ អ្នកខ្លះអាចនឹងគិតថាខ្លួនស្គាល់ពីពាក្យទាំងពីរនេះ។ ញ៉ាំអីខាងក្រៅបន្តិចបន្តួច ទិញខោអាវថ្មីៗ សាកថ្មជីវិតហើយចង់ហ៊ាហើយ នៅតែគិតថាវាជាតម្រូវការ តែការពិតទៅវាមិនមែននោះទេ។ ហើយចំណាយត្រង់ចំណុចនេះហើយដែលភាគច្រើនលង់ខ្លួនចាយលុយមិនដឹងខ្លួន ដល់ពេលត្រូវចំណាយលើអ្វីដែលចាំបាច់មែនទែនទៅជារត់រកខ្ចីគេ។
- គួរធ្វើ៖ ចាប់ផ្តើមរៀងលំដាប់ការចាយវាយប្រចាំថ្ងៃ ប្រចាំខែ ដោយពិនិត្យលើការចំណាយដែលពិតជាចាំបាច់មែនទែន (មិនអាចខ្វះបាន)។ បន្ទាប់មកធ្វើផែនការការចាំណាយ ហើយចាយកំឱ្យលើសចំនួន។
៣. ធ្វើផែនការហិរញ្ញវត្ថុដែលអាចទៅរួច៖ ផែនការនេះមានន័យថា ផែនការសម្រាប់ការចាយវាយនៅថ្ងៃមុខថាយើងនឹងមិនចាយឱ្យលើចំនួននោះ ក្នុងមួយខែ ក្នុងមួយឆ្នាំនោះទេ ដែលការធ្វើដូច្នេះមានប្រយោជន៍ណាស់ព្រោះវានឹងជួយឱ្យអ្នកមានស្ថិរភាពរឿងលុយ។
- ត្រូវធ្វើ៖ សាកកំណត់ថ្លៃចំណាយផ្សេងៗដូចជា ថ្លៃផ្ទះ ម្ហូប តែត្រូវកំណត់ឱ្យច្បាស់ថាអ្នកពិតជាអាចចំណាយវាបានហើយមិនផ្តល់បន្ទុកធ្ងន់ដល់អ្នក។
៤. លាហើយសម្ភារៈនិយម៖ ពេលដែលយើងរស់នៅក្នុងសង្គមមួយដែលពោរពេញដោយភាពហ៊ឺហារឡូយឆាយ ងាកទៅណាក៏សម្ភារៈនិយម ជាពិសេសតាមបណ្តាញសង្គម វាពិតជាពិបាកនឹងទប់ខ្លួនក្នុងចាយវាយច្រើន ជាពិសេសលើចំណង់តែម្តង។ តែបើយើងរស់នៅជាមួយនឹងភាពសាមញ្ញ ផ្តោតលើគោលដៅជីវិតខ្លួនឯងជាងការតាមដានជីវិតអ្នកដ៏ទៃដែលឡូយឆាយ នោះវានឹងអាចជួយយើងបានច្រើនតែម្តង។
គួរធ្វើ៖ មកដល់ចំណុចនេះហើយសូមព្យាយាមកាត់បន្ថយការចំណាយដែលមិនចាំបាច់ចេញ ដែលចំណាយទាំងនេះគឺមិនប៉ះពាល់ដល់ដល់ការរស់នៅប្រចាំថ្ងៃរបស់អ្នកនោះទេ។ ឧ៖ ក្នុងមួយខែចាយលើការ Shopping 40$ កាត់មកត្រឹម 15$, ឈប់ផឹកការហ្វេប្រេន, ចេញញាំអីក្រៅតែម្តងអីបានហើយ កាត់បន្ថយអ្វីផ្សេងទៀតបាន កាត់ទៅ។ ធ្វើបែបនេះយូរៗទៅនឹងក្លាយជាទម្លាប់ហើយ សំខាន់បានលទ្ធផលទៀត។
៥. ចាប់ផ្តើមសន្សំលុយសម្រាប់គ្រាអាសន្ន៖ លុយមួយកញ្ចប់នេះ មិនមែនគ្រាន់តែជាចំនួនលុយប៉ុណ្ណោះទេ តែវាជាការធានានូវសុវត្ថិភាពហិរញ្ញវត្ថុក្នុងកាលៈទេសៈណាមួយដែលអ្នកត្រូវការលុយបន្ទាន់ ហើយវាអាចជួយឱ្យអ្នកគេចផុតពីបំណុលអាក្រក់ទាំងឡាយផងដែរ។
ត្រូវធ្វើ៖ ចាមផ្តើមសន្សំពីចំនួនតិចៗ អាចជា៥% ១០% អីក៏បាន ធ្វើយ៉ាងណាឱ្យលុយចំនួននេះអាចគ្រប់គ្រាន់សម្រាប់ការចាយវាយប្រចាំខែរបស់អ្នកបានរយៈពេល ៣ ទៅ ៦ខែ ប្រសិនបើអ្នកបាត់បង់ចំណូល៕
©️ ផេក លុយខ្ញុំ-My Money
