មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ

28/08/2026

ពង្រឹងប្រព័ន្ធអង្កេតតាមដានជំងឺគ្រុនចាញ់ដើម្បីរក្សាកម្ពុជាគ្មានការចម្លងគ្រុនចាញ់ឡើងវិញ
________________________________
ដោយមានការអនុញ្ញាតពី លោកបណ្ឌិតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត (ម.គ.ច) លោកបណ្ឌិត ខៀវ វីរៈ អនុប្រធាន ម.គ.ច បានចូលរួមជាអធិបតីក្នុងពិធីបើកកិច្ចប្រជុំប្រចាំឆ្នាំរបស់ក្រុមឆ្លើយតបបន្ទាន់ជំងឺគ្រុនចាញ់ (MRRTs) ដែលប្រព្រឹត្តនៅព្រឹកថ្ងៃសុក្រ ១៥កើត ខែស្រាពណ៍ ឆ្នាំមមី អដ្ឋស័ក ព.ស ២៥៧០ នៅខេត្តកំពង់ស្ពឺ ក្រោមការឧបត្ថម្ភថវិកាដោយក្រសួងការបរទេសសហរដ្ឋអាមេរិច តាមរយៈគម្រោងការពង្រឹងប្រព័ន្ធរកឃើញជំងឺឆ្លង (STRIDES) ។ កិច្ចប្រជុំមានគោលបំណងដើម្បីពិនិត្យមើលសមិទ្ធផលដែលសម្រេចបាន ពិភាក្សាអំពីបញ្ហាប្រឈម និងដំណោះស្រាយ ចែករំលែកបទពិសោធន៍ល្អៗ និងពង្រឹងចំណេះដឹងលើគោលការណ៍ណែនាំនៃការតាមដានជំងឺ ការត្រៀមលក្ខណៈឆ្លើយតបជំងឺ ក្នុងបរិបទទប់ស្កាត់ការកកើតឡើងវិញនៃជំងឺគ្រុនចាញ់ (PoR)។

ក្នុងឱកាសបើកកិច្ចប្រជុំ លោកបណ្ឌិត ខៀវ វីរៈ បានមានប្រសាសន៍ថា ការពង្រឹងប្រព័ន្ធអង្កេតតាមដាន និងការគ្រប់គ្រងករណីជំងឺគ្រុនចាញ់ ត្រូវបន្តអនុវត្តជាប្រចាំ ដើម្បីធានាការស្វែងរក ការរាយការណ៍ ស៊ើបអង្កេត និងការឆ្លើយតបចំពោះគ្រប់ករណីបានទាន់ពេលវេលាប្រកបដោយប្រសិទ្ធភាព និងគុណភាព។ ជាមួយគ្នានេះ លោកបណ្ឌិតបានគូសបញ្ជាក់ថា ក្នុងបរិបទនៃការទប់ស្កាត់ការកកើតឡើងវិញនៃជំងឺគ្រុនចាញ់ (PoR) ត្រូវផ្លាស់ប្តូររបៀបគិត និងការអនុវត្តការងារពី «រង់ចាំឱ្យមានករណីកើតឡើង ហើយទើបឆ្លើយតប» ទៅជា «រកឃើញហានិភ័យជាមុន និងទប់ស្កាត់ការចម្លងឱ្យបានទាន់ពេលវេលា»។ ប្រព័ន្ធអង្កេតតាមដានជំងឺគ្រុនចាញ់ក្នុងបរិបទ PoR «ករណីមួយ មិនមែនគ្រាន់តែជាចំនួនមួយ(ករណី)ទេ ប៉ុន្តែជាសញ្ញាព្រមានមួយ» ដែលត្រូវធ្វើការស៊ើបអង្កេត និងចាត់វិធានការឆ្លើយតបជាបន្ទាន់ ដោយត្រូវផ្តោតលើការស្វែងរកប្រភព កត្តាហានិភ័យ និងចាត់វិធានការអន្តរាគមន៍ចាំបាច់នានា ដើម្បីកាត់ផ្តាច់ការចម្លងជំងឺកុំឱ្យមានការរីករាលដាលជំងឺគ្រុនចាញ់។

កិច្ចប្រជុំនេះ មានការអញ្ជើញចូលរួមពីអស់លោក លោកស្រីជាមន្រ្តីជំនាញមកពីមន្ទីរសុខាភិបាលនៃរដ្ឋបាលខេត្ត ការិយាល័យសុខាភិបាលស្រុកប្រតិបត្តិ របស់ខេត្តទាំង៦ (ខេត្តកំពង់ស្ពឺ ឧត្តរមានជ័យ បន្ទាយមានជ័យ ស្ទឹងត្រែង ព្រះវិហារ សៀមរាប) ព្រមទាំងអង្គការដៃគូនានា និងមន្រ្តីរាជការ ម.គ.ច សរុប ៦៦នាក់។

25/08/2026

ជំងឺគ្រុនឈាម គ្មានថ្នាំព្យាបាលនោះទេ រួមទាំងថ្នាំបុរាណផងដែរ អាស្រ័យហេតុនេះសូមបងប្អូនទាំងអស់ដែលមានការសង្ស័យថាកើតជំងឺគ្រុនឈាមនោះ សូមប្រញាប់ទៅមន្ទីរពេទ្យដែលនៅជិតបំផុតជាបន្ទាន់។

24/08/2026

ព្រឹកថ្ងៃចន្ទ ១១កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៤ ខែសីហា ឆ្នាំ២០២៦នៅសាលប្រជុំធំបាយ័ន មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) បានរៀបចំកិច្ចប្រជុំ ប្រចាំខែ ថ្នាក់ដឹកនាំ ប្រធាន អនុប្រធាន ការិយាល័យ និងប្រធានផ្នែកម.គ.ច ដែលដឹកនាំផ្ទាល់ ដោយលោកបណ្ឌិតប្រធាន មុនចាប់ផ្តើមកិច្ចប្រជុំក៏មានការគោរពទង់ជាតិនៃព្រះរាជាណាចក្រកម្ពុជា ដោយច្រៀងផ្ទាល់មាត់នូវបទនគររាជ និងមានការគោរពវិញ្ញាណក្ខណ្ឌដល់វីរៈកងទ័ពជួរមុខ ដែលបានពលីពីសំណាក់សត្រូវឈ្លានពានផងដែរ
គោលបំណងក៏ប្រជុំ៖
១. បច្ចុប្បន្នភាពការងារកម្មវិធីជាតិប្រយុទ្ធនឹងជំងឺគ្រុនចាញ់
២. បច្ចុប្បន្នភាពនៃការចងក្រង និងបញ្ជូនឯកសារផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ
២០២៦-២០៣៥
៣. បច្ចុប្បន្នភាពពីការប្រមូលព័ត៌មានពីប្រភេទសត្វស្វានៅប្រទេសកម្ពុជា ដែលទាក់ទងនឹងការចម្លងជំងឺគ្រុនចាញ់សត្វស្វា
៤. បច្ចុប្បន្នភាពការងារកម្មវិធីជាតិប្រយុទ្ធនឹងជំងឺគ្រុនឈាម
៥. បញ្ហាផ្សេងៗ បូកសរុបការប្រជុំ និងបិទអង្គប្រជុំ៕

23/08/2026

12/08/2026

បន្តចុះពិនិត្យ និងតាមដានការអនុវត្តវិធានការការពារ និងកាត់បន្ថយជំងឺគ្រុនឈាម នៅខេត្តសៀមរាប
=========
នៅថ្ងៃពុធ ១៤ រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១២ ខែសីហា ឆ្នាំ២០២៦ ក្រោមការដឹកនាំ និងការចង្អុលបង្ហាញណែនាំជាប្រចាំរបស់ ឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល លោកបណ្ឌិត ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) និងសហការី បានបន្តចុះពិនិត្យ និងតាមដានស្ថានភាពប្រើប្រាស់មធ្យោបាយគ្រប់គ្រងភ្នាក់ងារចម្លងជំងឺគ្រុនឈាម ព្រមទាំងអង្កេតការអនុវត្តសកម្មភាពដាក់ថ្នាំអាបែតសម្លាប់ដង្កូវទឹក នៅតាមភូមិសាស្ត្រមួយចំនួនដែលស្ថិតក្រោមការគ្របដណ្តប់របស់មណ្ឌលសុខភាពគោកចក មណ្ឌលសុខភាពសៀមរាប និងមណ្ឌលសុខភាពមណ្ឌល១ នៃការិយាល័យសុខាភិបាលស្រុកប្រតិបត្តិសៀមរាប ខេត្តសៀមរាប។

ក្នុងដំណើរចុះពិនិត្យនេះ លោកបណ្ឌិត ប្រធាន ម.គ.ច បានជួបសំណេះសំណាល និងពិភាក្សាការងារជាមួយ លោកប្រធានមន្ត្រីរសុខាភិបាល លោកស្រីប្រធានមណ្ឌលសុខភាពទាំងបី ព្រមទាំងអាជ្ញាធរមូលដ្ឋាន និងប្រជាពលរដ្ឋ ដើម្បីស្វែងយល់ពីស្ថានភាពជាក់ស្តែង បញ្ហាប្រឈម និងវឌ្ឍនភាពនៃការអនុវត្តវិធានការបង្ការ និងគ្រប់គ្រងជំងឺគ្រុនឈាមនៅមូលដ្ឋាន។

ជាមួយគ្នានេះ លោកបណ្ឌិតប្រធាន ម.គ.ច បានផ្តល់ការណែនាំ និងលើកទឹកចិត្តដល់មន្ត្រីសុខាភិបាល អាជ្ញាធរមូលដ្ឋាន និងប្រជាពលរដ្ឋ ឱ្យបន្តពង្រឹងកិច្ចសហការក្នុងការថែរក្សាអនាម័យ និងសម្អាតបរិស្ថានជុំវិញលំនៅឋាន ព្រមទាំងជំរុញការអនុវត្តសកម្មភាពដាក់ថ្នាំអាបែតឱ្យបានទៀងទាត់ ទូលំទូលាយ និងមានប្រសិទ្ធភាព។ ទន្ទឹមនឹងនេះ ត្រូវខិតខំសម្រេចការគ្របដណ្តប់ឱ្យបានលើសពី ៩០% ដើម្បីកាត់បន្ថយប្រភពដង្កូវទឹក ការរីករាលដាលនៃមូសខ្លា និងរួមចំណែកកាត់បន្ថយការឆ្លង ព្រមទាំងអត្រាស្លាប់ដោយសារជំងឺគ្រុនឈាមឱ្យបានជាអតិបរមា។

11/08/2026

ថ្ងៃអង្គារ ១៣រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១១ ខែសីហា ឆ្នាំ២០២៦ ក្រោមការដឹកនាំ និងចង្អុលបង្ហាញណែនាំជាប្រចាំរបស់ឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល លោកបណ្ឌិតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) រួមជាមួយសហការី បានបន្តចុះពិនិត្យស្ថានភាពប្រើប្រាស់មធ្យោបាយគ្រប់គ្រងភ្នាក់ងារចម្លងជំងឺគ្រុនឈាម និងអង្កេតការអនុវត្តសកម្មភាពដាក់ថ្នាំអាបែត សម្លាប់ដង្កូវទឹក នៅតាមភូមិសាស្ត្រមួយចំនួនក្នុងមណ្ឌលសុខភាព​ដូនកែវ មណ្ឌលសុខភាពព្រៃជ្រូក និងមណ្ឌលសុខភាពសសរស្តម្ភ នៃការិយាល័យ​សុខាភិបាល​ស្រុកប្រតិបត្តិ​អង្គរជុំ ខេត្តសៀមរាប។

លោកបណ្ឌិតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានពាំនាំនូវការផ្តាំផ្ញើរដ៏ខ្ពង់ខ្ពស់របស់ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល សួរសុខទុក្ខដល់មន្ទីរសុខាភិបាលនៃរដ្ឋបាលខេត្ត ដែលបានខិតខំប្រឹងប្រែងធ្វើការងារ និងសហការយ៉ាងល្អជាមួយមជ្ឈមណ្ឌលជាតិ ដើម្បីកាត់បន្ថយប្រភពបង្កាត់ពូជមូសខ្លា និងទប់ស្កាត់ការចម្លងជំងឺគ្រុនឈាមឱ្យមានប្រសិទ្ធភាពខ្ពស់ និងនិរន្តរភាព។

ជាចុងក្រោយ៖ លោកបណ្ឌិតប្រធាន ម.គ.ច បានអញ្ជើញជួបសំណេះសំណាលជាមួយមន្ត្រីសុខាភិបាលរបស់មណ្ឌលសុខភាព​ដូនកែវ មណ្ឌលសុខភាពព្រៃជ្រូក និងមណ្ឌលសុខភាពសសរស្តម្ភ និងអាជ្ញាធរមូលដ្ឋាន ព្រមទាំងប្រជាពលរដ្ឋ ដើម្បីចុះពិនិត្យស្ថានភាពជាក់ស្តែង ព្រមទាំងបានលើកទឹកចិត្តឱ្យរួមគ្នារក្សាអនាម័យបរិស្ថានជុំវិញផ្ទះ និងពង្រឹងការដាក់ថ្នាំអាបែតឱ្យបានគ្របដណ្តប់លើសពី ៩០% សំដៅកាត់បន្ថយចំនួនករណីឆ្លង និងអត្រាស្លាប់ដោយសារជំងឺគ្រុនឈាមនេះឱ្យខានតែបាន។

10/08/2026

មជ្ឈមណ្ឌលជាតិប្រយុទ្ធនឹងជំងឺគ្រុនចាញ់
ប៉ារ៉ាស៊ីតសាស្រ្ត និងបាណកសាស្រ្ត (ម.គ.ច)
======🙏❤️🙏======

ថ្ងៃចន្ទ ១២រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែសីហា ឆ្នាំ២០២៦ នៅសាលប្រជុំធំ របស់មន្ទីរពេទ្យជ័យវរ្ម័ន សៀមរាប ក្រោមការដឹកនាំ និងចង្អុលបង្ហាញណែនាំជាប្រចាំរបស់ឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល លោកបណ្ឌិតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) បានអញ្ជើញចូលរួមជាគណៈអធិបតី ក្នុងពិធីបើកវគ្គបណ្តុះបណ្តាលពង្រឹងសមត្ថភាព តាមរយៈការសិក្សាបែបអនុវត្តជាក់ស្តែងក្នុងមន្ទីរពេទ្យ នៅមន្ទីរពេទ្យគន្ធបុប្ផា និងមន្ទីរពេទ្យជ័យវរ័្មនទី៧ ស្តីអំពីការគ្រប់គ្រងព្យាបាល និងថែទាំជំងឺគ្រុនឈាម វគ្គទី២ ដែលចាប់ពីថ្ងៃទី១០ ដល់ថ្ងៃទី១២ ខែសីហា ឆ្នាំ២០២៦។

វគ្គបណ្តុះបណ្តាលពង្រឹងសមត្ថភាព តាមរយៈការសិក្សាបែបអនុវត្តជាក់ស្តែងក្នុងមន្ទីរពេទ្យ វគ្គទី២ មានការអញ្ជើញចូលរួមពីក្រុមគ្រូពេទ្យ មកពីខេត្តចំនួន ១៧ រួមមាន ៖ ខេត្តកណ្តាល ព្រៃវែង កំពង់ស្ពឺ កំពង់ឆ្នាំង តាកែវ កំពត កែប កោះកុង ព្រះសីហនុ សៀមរាប កំពង់ធំ បាត់ដំបង បន្ទាយមានជ័យ ឧត្តរមានជ័យ ព្រះវិហារ ពោធិ៍សាត់ និងខេត្តប៉ៃលិន។ មុននឹងដំណើរការវគ្គបណ្តុះបណ្តាល គណៈអធិបតី បានជួបសំណេះសំណាលជាមួយក្រុមគ្រូពេទ្យរបស់មន្ទីរពេទ្យគន្ធបុប្ផា និងសិក្ខាកាមចូលរួមវគ្គបណ្តុះបណ្តាលពង្រឹកសមត្ថភាព តាមរយៈការសិក្សាបែបអនុវត្តជាក់ស្តែងក្នុងមន្ទីរពេទ្យ ផងដែរ។

ទន្ទឹមនឹងនោះផងដែរ ក្រោយពេលបើកវគ្គបណ្តុះបណ្តាលពង្រឹកសមត្ថភាព តាមរយៈការសិក្សាបែបអនុវត្តជាក់ស្តែងក្នុងមន្ទីរពេទ្យ លោកបណ្ឌិតប្រធាន ម.គ.ច បានអញ្ជើញចុះពិនិត្យស្ថានភាពអ្នកជំងឺគ្រុនឈាម និងសួរសុខទុក្ខនៅផ្នែកសង្គ្រោះ ព្រមទាំងបានថ្លែងអំណរគុណដល់ក្រុមគ្រូពេទ្យដែលបានខិតខំបម្រើសេវាជូនដល់កុមារ ជាពិសេសជំងឺគ្រុនឈាម ដោយផ្តោតពីជាចម្បងសំខាន់បំផុត គុណភាព សុវត្ថិភាព ប្រសិទ្ធភាព ក្នុងការថែទាំព្យាបាលជំងឺគ្រុនឈាម។

10/08/2026

មជ្ឈមណ្ឌលប្រយុទ្ធនឹងជំងឺគ្រុនចាញ់
ប៉ារ៉ាស៊ីតសាស្រ្ត និងបាណកសាស្រ្ត (ម.គ.ច)
======🙏❤️🙏======

ថ្ងៃចន្ទ ១២រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែសីហា ឆ្នាំ២០២៦ នៅបន្ទប់បណ្ណាល័យរបស់ ម.គ.ច។ លោកសាស្រ្តាចារ្យ ឡឹក ឌីសូឡី អនុប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៃក្រសួងសុខាភិបាល ព្រមទាំងសហការីរួមមាន លោកវេជ្ជ. ស៊ីវ សុវណ្ណារ័ត្ន ប្រធានការិយាល័យបច្ចេកទេស លោកវេជ្ជ. ប៉ូ លី
អនុប្រធានការិយាល័យបច្ចេកទេសនិងជាប្រធានផ្នែកអ្នកស្ម័គ្រចិត្តភូមិ ព្រមទាំងមន្រ្តី នៃកម្មវិធីជាតិប្រយុទ្ធនឹងជំងឺគ្រុនឈាម បានជួបពិភាក្សាជាមួយក្រុមការងារនៃមូលនិធិGX Foundation នៃសាធារណៈរដ្ឋប្រជាមានិតចិន ដែលដឹកនាំដោយ Dr. P**n Yen-yen Grace នាយិកាប្រចាំអាស៊ីអាគ្នេយ៍ និងសហការី ៩រូប ក្នុងគោលបំណងសំណេះសំណាលនិងពិភាក្សាការងារ ក្នុងនោះដែរមូលនិធិGX Foundation ក៏បាននាំមកនូវតេស្តរហ័សសម្រាប់ពិនិត្យរកជំងឺគ្រុនឈាម ចំនួន ១០០០០ តេស្ត និងក្រដាសបន្ទះស្អិតអន្ទាក់ចាប់សត្វល្អិតចំនួន ១៥០០០ បន្ទះ ផងដែរ។
លោកសាស្ត្រាចារ្យអនុប្រធាន ម.គ ច បានថ្លែងអំណរគុណដល់ក្រុមការងារ នៃមូលនិធិGX Foundation នៃសាធារណៈរដ្ឋប្រជាមានិតចិន ដែលបានចូលរួមគាំទ្រនូវសកម្មភាពប្រយុទ្ធនឹងជំងឺគ្រុនឈាមនៅកម្ពុជា។

06/08/2026

ថ្ងៃព្រហស្បតិ៍ ៨រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៦ ខែសីហា ឆ្នាំ២០២៦ ក្រោមការដឹកនាំ និងចង្អុលបង្ហាញណែនាំជាប្រចាំរបស់ឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល ឆ្លៀតឱកាសដ៏មមាញឹក លោកបណ្ឌិតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) រួមជាមួយសហការី បានចុះពិនិត្យស្ថានភាពប្រើប្រាស់មធ្យោបាយគ្រប់គ្រងភ្នាក់ងារចម្លងជំងឺគ្រុនឈាម និងអង្កេតការអនុវត្តសកម្មភាពដាក់ថ្នាំអាបែតសម្លាប់ដង្កូវទឹក នៅតាមភូមិសាស្ត្រមួយចំនួនក្នុងមណ្ឌលសុខភាព​សារិកាកែវ​ នៃការិយាល័យ​សុខាភិបាល​ស្រុកប្រតិបត្តិ​ល្វាឯម​ ក្រុង​អរិយក្សត្រ​ ខេត្តកណ្តាល ជាលើកទី២។

ជាចុងក្រោយ៖ លោកបណ្ឌិតប្រធាន ម.គ.ច បានអញ្ជើញជួបសំណេះសំណាលជាមួយមន្ត្រីសុខាភិបាលរបស់មណ្ឌលសុខភាព​សារិកាកែវ​ អាជ្ញាធរមូលដ្ឋាន និងប្រជាពលរដ្ឋ ដើម្បីចុះពិនិត្យស្ថានភាពជាក់ស្តែង ព្រមទាំងបានលើកទឹកចិត្តឱ្យរួមគ្នារក្សាអនាម័យបរិស្ថានជុំវិញផ្ទះ និងពង្រឹងការដាក់ថ្នាំអាបែតឱ្យបានគ្របដណ្តប់លើសពី ៩០% សំដៅកាត់បន្ថយចំនួនករណីឆ្លង និងអត្រាស្លាប់ដោយសារជំងឺគ្រុនឈាមនេះឱ្យខានតែបាន។