27/12/2021
👉ເບົາຫວານ (Diabetes) ເປັນພາວະທີ່ລະດັບນໍ້າຕານໃນເລືອດສູງຜິດປົກກະຕິຈາກການທີ່ຮ່າງກາຍບໍ່ສາມາດຈັດການກັບລະດັບນໍ້າຕານໃນເລືອດໃຫ້ຢູ່ໃນລະດັບປົກກະຕິທີ່ເໝາະສົມໄດ້.
- ການປັບການໃຊ້ຊີວິດປະຈໍາວັນໃຫ້ມີວິໄນທາງດ້ານສຸຂະພາບມີຄວາມສໍາຄັນຕໍ່ການຄວບຄຸມເບົາຫວານໄດ້ຢ່າງດີ.
- ການເກີດພະຍາດເບົາຫວານໃນເດັກນ້ອຍ ແລະ ໄວລຸ້ນມີແນວໂນ້ມທີ່ຈະມີຄວາມສ່ຽງຕໍ່ພະຍາດແຊກຊ້ອນໄດ້ຫຼາຍກວ່າພະຍາດເບົາຫວານໃນຜູ້ໃຫຍ່ ເນື່ອງຈາກສະພາວະດ້ານອາລົມ ແລະ ການຕັດສິນໃຈທີ່ມີໂອກາດສູງເຮັດໃຫ້ຂາດວິໄນໃນການຄວບຄຸມເບົາຫວານ.
- ການກວດສຸຂະພາບເພື່ອປະເມີນຄວາມສ່ຽງຕໍ່ພະຍາດເບົາຫວານ ເປັນອີກວິທີໜຶ່ງໃນການປ້ອງກັນພະຍາດ
- ເປັນຫັຍງເດັກນ້ອຍ ແລະ ໄວລຸ້ນກໍ່ສ່ຽງຕໍ່ເບົາຫວານ?
ເບົາຫວານ (Diabetes) ເປັນພາວະທີ່ລະດັບນໍ້າຕານໃນເລືອດສູງຜິດປົກກະຕິຈາກການທີ່ຮ່າງກາຍບໍ່ສາມາດລັ່ງສານອິນຊູລິນໃນປະລິມານທີ່ພຽງພໍເພື່ອມາຈັດການກັບລະດັບນໍ້າຕານ, ສານອິນຊູລິນທີ່ຮ່າງກາຍລັ່ງມານັ້ນມີປະສິດທິພາບບໍ່ດີພໍຕໍ່ການຄວບຄຸມລະດັບນໍ້າຕານໃນເລືອດ, ທີ່ຈະສົ່ງຜົນຕໍ່ຂະບວນການເຜົາຜານ ຫຼື ຂະບວນການປ່ຽນອາຫານ ແລະ ເຄື່ອງດື່ມທີ່ບໍລິໂພກເຂົ້າໄປໃຫ້ກາຍເປັນພະລັງງານໂດຍສະເພາະນໍ້າຕານ ໂດຍຖ້າລະດັບນໍ້າຕານໃນເລືອດບໍ່ສາມາດຖືກຄວບຄຸມໃຫ້ຢູ່ໃນລະດັບປົກກະຕິຈະສົ່ງຜົນກະທົບທີ່ສາມາດທໍາລາຍຫົວໃຈ, ເສັ້ນເລືອດ, ຫມາກໄຂ່ຫຼັງ ແລະ ລະບົບປະສາດ ນອກຈາກນີ້ອາດເຮັດໃຫ້ສູນເສຍການເບິ່ງເຫັນໃນໄລຍະຍາວໄດ້, ເບົາຫວານມີຫຼາຍຊະນິດສາມາດເກີດຂຶ້ນໄດ້ທຸກເພດ, ທຸກຊ່ວງອາຍຸ ໂດຍສະເພາະເບົາຫວານຊະນິດ 1 ແລະ 2 ທີ່ເດັກນ້ອຍ ແລະ ໄວລຸ້ນສະໄໝໃໝ່ມີແນວໂນ້ມທີ່ຈະເປັນຫຼາຍ ເພາະເກີດຈາກພຶດຕິກໍາໃນການໃຊ້ຊີວິດທີ່ປ່ຽນໄປເຊັ່ນ: ການກິນອາຫານ Fast Food ຫຼື ກິນອາຫານທີ່ຫວານຈັດ ເປັນອາຫານປະເພດແປ້ງໃນສັດສ່ວນທີ່ສູງ ມີແຄຄໍລີສູງຕໍ່ມື້ ການເກີດໂລກອ້ວນ, ຂາດການອອກກໍາລັງກາຍຢ່າງສະໝໍ່າສະເໝີ ແລະ ເກີດຈາກກໍາມະພັນເປັນຕົ້ນ.
🔰ສາເຫດຂອງພະຍາດເບົາຫວານຊະນິດທີ 1: ສາມາດເກີດຂຶ້ນໄດ້ທຸກເພດ ທຸກໄວອາຍຸ ແລະ ພົບໄດ້ຕະຫຼອດເບົາຫວານໃນເດັກນ້ອຍ ແລະ ໄວລຸ້ນສາເຫດເກີດຈາກ ລະບົບພູມຕ້ານທານຂອງຮ່າງກາຍທໍາລາຍເຊວທີ່ຜະລິດອິນຊູລິນໃນຕັບອ່ອນ ເມື່ອເກີດສະພາວະນີ້ຮ່າງກາຍຈະບໍ່ສາມາດເຜົາຜານ ແລະ ເອົານໍ້າຕານ (Glucose) ທີ່ຢູ່ພາຍໃນກະແສເລືອດໄປໃຊ້ເປັນພະລັງງານໄດ້ຢ່າງເໝາະສົມ ລວມເຖິງບໍ່ສາມາດຂັບອອກໄດ້ເປັນປົກກະຕິຈຶ່ງເຮັດໃຫ້ເກີດສະພາວະນໍ້າຕານໃນຮ່າງກາຍຫຼາຍເກີນໄປ.
🔰ສາເຫດຂອງພະຍາດເບົາຫວານຊະນິດທີ 2: ມີໂອກາດພົບໄດ້ໃນໄວລຸ້ນສາເຫດເກີດຈາກ ຕັບອ່ອນບໍ່ສາມາດສ້າງອິນຊູລິນໄດ້ພຽງພໍ ແລະ ເຊວບໍ່ສາມາດເອົານໍ້າຕານມາໃຊ້ໃນການສ້າງພະລັງງານໄດ້ດີ, ໃນໄວລຸ້ນທີ່ມີນໍ້າໜັກໂຕເກີນ ຫຼື ເປັນໂລກອ້ວນ ແລະ ມີປະຫັວດຄອບຄົວທີ່ເຄີຍເປັນເບົາຫວານຈຶ່ງສົ່ງຜົນໃຫ້ມີຄວາມສ່ຽງຫຼາຍຂຶ້ນ, ຈະມີຄວາມສ່ຽງຫຼາຍຂຶ້ນຕື່ມເມື່ອມີອາຍຸ 40 ປີຂຶ້ນໄປ.
ເບົາຫວານໃນເດັກແຕກຕ່າງຈາກເບົາຫວານໃນຜູ້ໃຫຍ່ແນວໃດ?
- ຖ້າເກີດເບົາຫວານໃນເດັກຈະເຮັດໃຫ້ມີໂອກາດເກີດພະຍາດແຊກຊ້ອນໄດ້ຫຼາຍກ່ອນເບົາຫວານໃນຜູ້ໃຫຍ່.
- ເນື່ອງຈາກເດັກນ້ອຍ ແລະ ໄວລຸ້ນເປັນຊ່ວງທີ່ມີການຈະເລີນເຕີບໃຫຍ່ ແລະ ການປ່ຽນແປງທາງດ້ານອາລົມ ແລະ ໃຊ້ຄວາມຮູ້ສຶກຫຼາຍກວ່າອາລົມໃນການຕັດສິນໃຈ ຈຶ່ງອາດສົ່ງຜົນຕໍ່ການຄວບຄຸມການຮັກສາ ຫຼື ຄວບຄຸມອາການຂອງພະຍາດໄດ້ບໍ່ດີເທົ່າກັບຜູ້ໃຫຍ່ຈຶ່ງຕ້ອງມີຜູຸ້ປົກຄອງ ຫຼື ຍາດພີ່ນ້ອງເບິ່ງແຍງຊ່ວຍ.
✅ອາການທີ່ສັງເກດໄດ້:
- ຖ່າຍເບົາຕະຫຼອດໂດຍສະເພາະເວລາກາງຄືນ
- ດື່ມນໍ້າຫຼາຍກວ່າປົກກະຕິ ຫຼື ຢາກນໍ້າຕະຫຼອດ
- ມີຄວາມຢາກອາຫານຢູ່ຕະຫຼອດ
- ການເບິ່ງເຫັນມົວບໍ່ຊັດເຈນ ຫຼື ເກີດພາບຊ້ອນ, ບາດແຜນານເຊົາ
- ລົມຫາຍໃຈມີກິ່ນຄ້າຍຄືໝາກໄມ້ຫວານ
- ຮູ້ສຶກເມື່ອຍ ແລະ ຫງຸດຫງິດງ່າຍ
- ນໍ້າໜັກຫຼຸດລົງທັງທີ່ກິນຫຼາຍ
- ການຕິດເຊື້ອທີ່ຜິວໜັງ ເປັນບາດແຜອັກເສບງ່າຍແຕ່ນານເຊົາ ໃນຜູ້ຍິງອາດຕິດເຊື້ອໃນຊ່ອງຄອດ.
👉ສາມາດປ້ອງກັນເບົາຫວານໃນເດັກນ້ອຍ ຫຼື ໄວລຸ້ນໄດ້ຫຼືບໍ່?
ຖ້າຈະຫາວິທີທີ່ປ້ອງກັນໄດ້ແບບເຕັມຮ້ອຍເປີເຊັນ ແມ່ນຍັງບໍ່ມີການລະບຸໄດ້ຈາກວົງການແພດ ໂດຍສະເພາະພະຍາດເບົາຫວານຊະນິດທີ 1 ແລະ ທີ່ມີສາເຫດມາຈາກກໍາມະພັນ, ແຕ່ມີຫຼັກຖານການວິໄຈວ່າ ຜຸ້ທີ່ເປັນເບົາຫວານຊະນິດທີ່ 2 ສາມາດດູແລ ແລະ ປ້ອງກັນຕົວເອງໃນເບື້ອງຕົ້ນໄດ້ຈາກການປັບໃຊ້ໃນຊີວິດປະຈໍາວັນໃຫ້ມີວິໄນຫຼາຍຂຶ້ນເຊັ່ນຖ້າມີພາວະນໍ້າໜັກເກີນຕ້ອງຫຼຸດນໍ້າໜັກເພື່ອຫຼຸດຄວາມສ່ຽງ, ເລືອກກິນອາຫານທີ່ມີປະໂຫຍດ, ຫຼີກລ້ຽງການກິນອາຫານລົດຫວານຈັດ, ລົດມັນ ແລະ ອອກກໍາລັງກາຍຢ່າງສະໝໍ່າສະເໝີ.
✅ສະຫຼຸບລວມແລ້ວ: “ການປ້ອງກັນຍ່ອມດີກວ່າການຮັກສາ” ໂດຍການປັບການໃຊ້ຊີວິດປະຈໍາວັນໃຫ້ມີວິໄນດ້ານສຸຂະພາບຫຼາຍຂຶ້ນເຊັ່ນວ່າ ຖ້າມີພາວະນໍ້າໜັກເກີນໃຫ້ຫຼຸດນໍ້າໜັກລົງເພື່ອຫຼຸດຄວາມສ່ຽງ, ໃຫ້ເລືອກກິນອາຫານທີ່ມີແຄລໍລີຕໍ່າ, ຫຼີກລ້ຽງການກິນອາຫານລົດຫວານ, ມັນ, ເລືອກກິນອາຫານຕາມຫຼັກໂພຊະນາການ, ຈັດການກັບຄວາມຄຽດໄດ້ຢ່າງເໝາະສົມ, ແລະ ອອກກໍາລັງຢ່າງສະໝໍ່າສະເໝີ ຖ້າທ່ານໃດສົງໄສ ຫຼື ຕ້ອງການຮູ້ວ່າລູກຫຼານຂອງທ່ານຈະສ່ຽງຕໍ່ພະຍາດເບົາຫວານ ຫຼືບໍ່ ແມ່ນຕ້ອງໄດ້ຮັບການກວດສຸຂະພາບເພື່ອປະເມີນຄວາມສ່ຽງຂອງພະຍາດນີ້ ແລະ ປ້ອງກັນໄດ້ທັນເວລາ.
#ຢາກໃຫ້ທຸກທ່ານມີສຸຂະພາບທີ່ແຂງແຮງ
ອ້າງອີງ:
https://www.pathlab.co.th/children-and-adolescents-diabetes/
