02/02/2026
කිලෝමීටර් දහස් ගණනක් ඈතින් ශ්රී ලංකාවේදී ඇසුණු රොමේනියානු හඬ🇷🇴
රොමේනියානු ව්යවසායකයෙකු වන ඇලෙක්සැන්ඩ්රු ලැස්කාර් (Alexandru Lascăr) සිය නිවාඩුවක් සඳහා ශ්රී ලංකාවට පැමිණ සිටියදී මෙම අත්දැකීමට මුහුණ දුන්නේය. ගාල්ලේ වීදියක ඇවිදිමින් සිටි ඔහු වෙත පැමිණි ශ්රී ලාංකිකයෙකු, ඉතා පැහැදිලි රොමේනියානු භාෂාවෙන් ඔහුට කතා කිරීමෙන් ඇලෙක්සැන්ඩ්රු මහත් මවිතයට පත් විය. "මෙය අදහාගත නොහැකි දෙයක්" යැයි පවසමින් ඔහු එම අවස්ථාව වීඩියෝ කර සමාජ මාධ්ය වෙත මුදා හැරීමත් සමඟ එය ඉතා වේගයෙන් ලොව පුරා ප්රසිද්ධ විය.
මෙම පුද්ගලයා ගුරුවරයෙකු, සංචාරක මගපෙන්වන්නෙකු හෝ මීට පෙර රොමේනියාවේ ජීවත් වූ අයෙකු නොවේ. ඔහු හුදෙක් එම භාෂාවට පෙම් බැඳි සාමාන්ය පුද්ගලයෙකි. ඔහු පසුගිය වසර දහයක පමණ කාලය පුරාම තමන්ට ලැබෙන සෑම විවේක වේලාවකදීම රොමේනියානු භාෂාව හැදෑරීමට කැප වී තිබේ.
විශේෂත්වය වන්නේ ඔහු මෙම දුෂ්කර භාෂාව ඉගෙනගෙන ඇත්තේ කිසිදු ජංගම යෙදුමක් (Apps), අන්තර්ජාල පාඨමාලා හෝ ගුරුවරයෙකුගේ සහය නොමැතිව වීමයි. පොතක් ඇසුරෙන් පමණක් ස්වයංව ඉගෙන ගත් ඔහු, රොමේනියානු ජාතික ගීය වන "Deșteaptă-te, române!" (රොමේනියානුවනි, අවදි වන්න!) හි පද කිහිපයක් පවා නිවැරදි තාලයට සහ උච්චාරණයට ගායනා කිරීමට සමත් වී ඇත.
මෙම පුද්ගලයා පවසන පරිදි රොමේනියානු භාෂාව ඉතා දුෂ්කරය. එහෙත් ඔහුගේ නොපසුබට උත්සාහය සහ එම සංස්කෘතිය කෙරෙහි දක්වන ගෞරවය නිසාම ඔහු අද වන විට රොමේනියානුවන්ගේ හදවත් දිනාගත් වීරයෙකු වී හමාරය. අන්තර්ජාලය ඔස්සේ බොහෝ දෙනා අදහස් දක්වමින් කියා සිටියේ, "බොහෝ රොමේනියානු ජාතිකයින්ටත් වඩා ආදරයකින් ඔහු මෙම භාෂාව භාවිතා කරන" බවයි.
මෙම පුවත රොමේනියානු වෙබ් මාධ්ය වාර්තා කර තිබීමද සුවිශේෂී අවස්ථාවකි.
Gayya in Europe
