Siddhaka Ayurveda

01/06/2026

වාෂ්ප ස්වේද ( Steam Bath)

දහඩිය දැමීමට සලස්වා ශරීරය අභ්‍යන්තරයේ ඇති අපද්‍රව්‍ය බැහැර කරවීමේ ක්‍රියාවලිය සරලව "ස්වේදනය" ලෙස හ‍ඳුන්වා දිය හැකිය. ආයුර්වේද වෛද්‍ය විද්‍යාව තුළ ප්‍රධාන ස්වේද කර්ම 13ක් දක්වා ඇති අතර මෙය පංචකර්ම සිදු කිරීමට ප්‍රථමව සිදු කරන පූර්ව කර්මයක් ලෙසද, සමහර අවස්ථා වලදී ප්‍රධාන කර්මයක් ලෙසද යොදා ගනු ලබයි.

එම ස්වේද කර්ම පහත පරිදි වේ.
1. සංකර ස්වේද
2. ප්‍රස්තර ස්වේද
3. නාඩි ස්වේද
4. පරිෂේක ස්වේද
5. අවඝාහ ස්වේද
6. ජේන්තාක ස්වේද
7. අශ්මඝ්න ස්වේද
8. කර්ෂු ස්වේද
9. කුටී ස්වේද
10. භූ ස්වේද
11. කුම්භීක ස්වේද
12. කූප ස්වේද
13. හෝලාක ස්වේද

මෙහිදී අප මූලිකවම විස්තර කරනු ලබන "වාෂ්ප ස්වේද (Steam Bath)" මෙහි දැක්වෙන "කුටී ස්වේද" යන ස්වේද කර්ම ගණයට අයත් වේ. මේ සඳහා භාවිතා වන උපකරණය "වාෂ්ප ස්වේද යන්‍ත්‍රය" නම් වේ. එය පුද්ගලයෙකු පහසුවෙන් ඇතුළු කළ හැකි ආකාරයට සකස් කරන ලද, ඖෂධීය දැව භාවිතයෙන් නිර්මාණය කරන ලද ස‍ංවෘත කුටීරයකි. මෙය සයනය කිරීමේ ඉරියව්වෙන් මෙන්ම හිඳ ගැනීමේ ඉරියව්වෙන් ද සකස් කළ හැකිය.
මෙම ප්‍රතිකාරයේදී අදාළ පුද්ගලයාගේ ශරීරයේ හිස සිට දෙපතුල් දක්වාම තෛල ආලේපය සිදු කොට, ඉන් අනතුරුව ඔහුගේ හිස පමණක් පිටතට සිටින සේ කුටීරය තුළට ඇතුළු කර ඖෂධීය වාෂ්පයකින් එය පුරවා එමඟින් නිශ්චිත කාලයක් පුරාවට ඔහුට දහඩිය දැමීමට සැලැස්වීම සිදු කරනු ලබයි. එම ඖෂධීය වාෂ්පය රෝගියාගෙන් රෝගියාට රෝගී තත්ත්වය අනුව වෙනස් වේ.

මෙම ප්‍රතිකාර ක්‍රමයෙන් පොදුවේ ලබා ගත හැකි ප්‍රතිඵල මෙසේ සඳහන් කළ හැකිය.
1. ශරීරය තුළ ඇති අපද්‍රව්‍ය දහඩිය හරහා බැහැර වීම
2. ශරීරයේ අනවශ්‍ය මේද කොටස් දහනය වීම
3. ශරීරය තුළ පවතින කැක්කුම්, වේදනා දුරු වීම
4. සන්ධි ආශ්‍රිතව පවතින තද ගතිය, ක්‍රියා කරවීමේ අපහසුතා දුරු වීම
5. ශරීරය තුළ පවතින වාතාදි රෝග සමනය වීම
6. ශරීරය සැහැල්ලු වීම
7. අලස බව දුරු වීම
8. ආහාර රුචිය වැඩි වීම
9. සම දීප්තිමත් වීම
10. ශරීරයේ මෘදු බවක් ඇති වීම

මෙම ප්‍රතිකාර ක්‍රමය වනාහි හුදෙක් රෝගීන්ගේ රෝග සුවපත් කිරීම සඳහාම පමණක් නොව නිරෝගී පුද්ගලයාගේ සෞඛ්‍ය තත්ත්වය ආරක්ෂා කිරීම, පවත්වා ගැනීම සහ තවදුරටත් වැඩිදියුණු කිරීම උදෙසා ද භාවිතා කළ හැකි විශිෂ්ඨ ප්‍රතිකාර ක්‍රමයකි.

සෞඛ්‍ය සම්පන්න සුව දිවියක් පවත්වා ගැනීම උදෙසා සුදුසුකම් ලත් ආයුර්වේද වෛද්‍යවරයකුගේ උපදෙස් සහ අධීක්ෂණය යටතේ ඔබටත් මෙම ප්‍රතිකාර ලබා ගැනීමට අපගේ සිද්ධක ආයුර්වේද වෛද්‍ය මධ්‍යස්ථානය වෙතින් මේ වන විට පහසුකම් සලසා ඇත.

සටහන:
ආයුර්වේද වෛද්‍ය නිමේෂිකා මඩිතියවල

01/01/2026

ඔබ සැමට නිදුක් නිරෝගී සුබ නව වසරක් වේවා..!!

15/12/2025

🌿Glow වෙන්න කේරළීය ආයුර්වේද සත්කාරයක් 🌿

🍁" Manjistha Glow Gel "🍁

වැල්මදට සාරයෙන් පොහොසත්100 % ස්වභාවික අමුද්‍රව්‍ය යොදාගෙන සිදුකරන නිශ්පාදිතයකි.

🌹ඔබට දිදුලන පැහැපත් සමක් ලබාදෙයි
🌹සම වයසට යාමේ ලක්ෂණ මන්දගාමී කරයි.
🌹සමේ ඇති ලප කැළැල් දුරුකර සුසිනිඳු සමක් ඇති කරයි
🌹අභ්‍යන්තරයෙන් සමට අවශ්‍ය පෝෂණය ලබාදෙයි.

🚚 Island Wide Delivery FREE

☎ Order Now : 0703707808

Whats'app : 0703707808

23/10/2025

රත කල්කය

රත කල්කය වනාහි අනාදිමත් කාලයක පටන් ශ්‍රී ලාංකික මව්වරුන් විසින් අලුත උපන් බිළිඳුන් හට ලබා දුන් මහඟු ඖෂධයකි. නමුත් වර්තමානය වන විට රත කල්කය වටා ගෙතුණු දුර්මත හේතුවෙන් මව්වරුන් තම දරුවන්ට ලබා දීමට බියක් දක්වති. කණගාටුවට කරුණ නම් කුඩා කල රත කල්කය ඖෂධ ලෙස ලබා ගත් පිරිස් විසින්ම ඒ පිළිබඳ දුර්මත ගොඩ නැගීමත් ඒ අනුව යමින් කුඩා කල රත කල්කය පානය කළ මව්වරුන් විසින්ම එය තම දරුවන්ට ලබා දීම ප්‍රතික්ෂේප කිරීමත් ය.
මෙම ලිපියෙහි ප්‍රධාන අරමුණ වන්නේ රත කල්කය වටා ගොඩනැගී ඇති ගැටලු සහ දුර්මත සඳහා පිළිතුරක් ලබා දීම මෙන්ම මෙම මහඟු ඖෂධය කෙරෙහි පෙර තිබූ ගෞරවය ඔබ තුළ යළිත් ඇති කිරීමයි.
වරෙක සමේ රෝග හා නිරන්තර සෙම් රෝග වලින් පෙළෙන දරුවෙකු රැගෙන මා හමුවට පැමිණි මවකගෙන් රත කල්කය ලබා දුන්නේද යන වග විමසූ විට ඇය ලබා දුන් පිළිතුර මෙහි මෙසේ සඳහන් කරමි.
" අනේ ඩොක්ටර් රත කල්කයෙ තියෙන්නෙ ගඩොල් කුඩුලුනෙ, අපි ඉස්සර බිව්වට දරුවන්ට දෙන්න බයයි "
එවැනි හාස්‍යජනක ප්‍රකාශ සමාජ ගත කරන්නන් දෙස සානුකම්පිතව බලන අතරම රත කල්කය පිළිබඳව කෙටි විස්තරයක් මෙම ලිපියෙන් ඉදිරිපත් කරමි.
වටිකා ප්‍රකරණයෙහි දෙසඳුන් කල්කය ලෙසත් වෛද්‍යක තත්ව දර්ශනයෙහි ද්විචන්දන කල්කය ලෙසත් හඳුන්වනු ලබන රත කල්කය සුදු හඳුන් සහ රත් හඳුන් ඇතුළු ඖෂධ හතකින් සමන්විත කල්කයකි.
රත කල්කයෙහි අන්තර්ගත වන ප්‍රධාන ද්‍රව්‍ය
1.) කොල්ලු
2.) වදකහ
3.) වැල්මී
4.) සුදු හඳුන්
5.) රත් හඳුන්
6.) සහිඳ ලුණු
7.) දෙහි ඇඹුල්
වටිකා ප්‍රකරණයෙහි රත කල්කය සාදනු ලබන ආකාරය කවියකින් මෙසේ දක්වා ඇත.
" බිළිඳුන් වදකර පැණිරස ඇතිලිය ලේවන් හිමේක බර වන්නේ
සිඳුහට නගිමින් හරිබර වූ තැන ලිකුච යුසින් අඹරා ගන්නේ
ලපටින් ලදරුම වලිප්පු උණදුට කොත්තමල්ලි තම්බා දෙන්නේ
නියතින් ගුණ දෙන රහසකි ඇදුරනි පෙර වෙද දත් පඬිඋතුමන්නේ.."

පළමුව සඳහන් කර ඇති ද්‍රව්‍ය පහ වෙන වෙනම සෝදා වියළා කුඩු කර මිශ්‍ර කරගනු ලබයි. එම ද්‍රව්‍ය පහේ බරට සමාන බරක් සහිඳ ලුණු ගෙන එය දෙහි ඇඹුලෙන් දිය කර පළමුව කොටා ගත් කුඩු සමඟ කලවම් කර දිනක් තිබෙන්නට හැර සියුම් කල්කයක් ලැබෙන තුරු අඹරා ගැනීම සිදු කරනු ලබයි. මෙය දින ගණනාවක් ගත වන ක්‍රියාවලියක් වන අතර කිසිසේත්ම පහසු කටයුත්තක් නොවන බව කිව යුතුමය.
රත කල්කය යනු ප්‍රධාන වශයෙන් රතගාය නමැති රෝගය ඇති වීම වළක්වා ගැනීමට ළදරු අවධියේදී මෙන්ම රෝගය හටගත් පසු රෝගයට ප්‍රතිකාර කිරීම සඳහා ද භාවිතා කරනු ලබන ඖෂධයකි.
අතීත ශ්‍රී ලාංකික පාරම්පරික වෛද්‍යවරුන් විසින් සිය දැනුම සහ සායනික අත්දැකීම් ඔස්සේ රත කල්කය භාවිතා කර ඇති නමුත් වර්තමානය වන විට රත කල්කය පිළිබඳව විද්‍යාත්මක පර්යේෂණ පවා සිදු කර ඇත.
ජ්‍යෙෂ්ඨ මහාචාර්ය A.P.G. අමරසිංහ මහතා විසින් සිදු කර ඇති " Scientific studies of a popular Sri Lankan indigenous therapeutic agent Ratha kalka used in pediatric practice " යන පර්යේෂණය මඟින් රත කල්කය
1.) Immune enhancing effect
2.) Anti bacterial effect
3.) Anti inflammatory effect
4.) Anti pyretic effect
සහිත වන බව මෙන්ම එය ළදරුවන්ට සුදුසු ඖෂධයක් බව ද තහවුරු කර ඇත.
ඔබ විසින් ඔබේ ළදරුවන්ට රත කල්කය ලබා දීමට බලාපොරොත්තු වන්නේ නම් හුදෙක් ඖෂධ අලෙවිසලෙකින් මිල දී ගෙන තමා දන්නා පරිදි එය ලබා දීමෙන් වැළකී ඒ සඳහා සුදුසුකම්ලත් ආයුර්වේද වෛද්‍යවරයෙකු වෙත යොමු වන්නේ නම් මැනවි.

සටහන: ආයුර්වේද වෛද්‍ය නිමේෂිකා මඩිතියවල.
BAMS (Hons)
University of Colombo

15/10/2025

රතගාය

රතගාය යනු රක්ත දූෂණය හේතුවෙන් ඇති වන රෝගී තත්ත්වයකි.
මෙය දේශීය වෙදකමේ සඳහන් වන රෝගයකි. " ලේ නරක් වීමෙන් ඇති වන රෝග " ලෙස සරලව දැක්විය හැකි අතර පොඩි දරුවන්ට ඇති රෝග බොහොමයකට මෙම නාමය යෙදී ඇත. සමහර ළදරුවන් ඉපදෙන විටම රතගාය වැනි තත්ත්වයන් තිබෙනු දැක ගත හැකිය.
එය ඇති වන ස්ථානය අනුව බාහිර හා අභ්‍යන්තර ලෙස කොටස් දෙකකි.

බාහිර රතගාය

‌ඇති වන ස්ථාන ලෙස හිස, මුහුණ, බෙල්ල, අත්, පාද, ඉකිලි, වෘෂණකෝෂ ආශ්‍රිතව හෝ මුළු ශරීරය පුරාම ලෙස දැක්විය හැකිය.
‌විවිධාකාර අන්දමේ බිබිලි, ගඩු, ගැටිති ආදිය සම මත ඇති කරයි.
‌ඉදීමීම ඇති විය හැක.
‌කැසීම බහුල වේ.
‌දැවිල්ල තිබිය හැක.
‌වසා ගැටිති ඉදිමීම ද සිදු විය හැක.

අභ්‍යන්තර රතගාය

‌උණ
‌අතීසාරය හෝ මළ බද්ධය
‌බඩ පුරවා දැමීම
‌මුඛය වියළීම
‌නින්ද නොයාම
‌කැස්ස, සෙම්ප්‍රතිශ්‍යාව, හතිය ආදී ශ්වසන මාර්ගය ආශ්‍රිත රෝග

මීට අමතරව රෝග ලක්ෂණ අනුව රතගාය මෙසේද දැක්විය හැකිය.

‌ලේරත
‌මල්රත
‌වදමල්වන් රත
‌නාරත
‌ගල්‍ රත
‌ඉසේ අල්ලන රත
‌කනේ අල්ලන රත
‌පිටේ අල්ලන රත
‌දුවන පනින රත
‌පණු රත
‌මාන්දම් රත
‌වලිප්පු රත
‌කසන රත

රතගාය ඇති වීමට බලපාන හේතු

ගර්භණී මවට හා මව්කිරි දෙන මවට අදාළව පහත හේතු දැක්විය හැකිය.

1. ‌තමක ශ්වාස, කුෂ්ඨ, පීනස, ආසාත්මිකතා ආදී රෝග වලින් මව පෙළීම.
‌අහිතකර ආහාර භාවිතා කිරීම.
2. ‌සෞඛ්‍ය සම්පන්න නොවන ජීවන රටාවක් පැවතීම.
3. ‌තරහව, බිය, ක්‍රෝධය වැනි මානසික තත්ත්ව බහුල අයෙක් වීම.

ළදරුවාට අදාළ හේතු මෙසේය.

1.‌ ලබා දෙන මව්කිරි දෝෂ සහිත වීම,
2. ‌සෞඛ්‍යාරක්ෂිත නොවන ආහාර ලබා ගැනීම.
3. ‌පෝෂණ ඌණතා සහිත වීම.
4. ‌ක්‍රිමි රෝග සහිත වීම.
‌සහජ රෝග පැවතීම.

රතගාය ආශ්‍රිත ප්‍රතිකාර, රෝගය වළක්වා ගැනීම හා රෝගය වැළඳුණු පසු සිදු කරන ප්‍රතිකාර ලෙස කොටස් දෙකකට දැක්විය හැකිය.
රතගාය ඇති වීම වළක්වා ගැනීම පිණිස ගර්භණී මවට මෙන්ම අලුත උපන් නිරෝගී ළදරුවන්ට ද ඖෂධ ලබා දෙනු ලබයි.
එමෙන්ම රෝගය වැළඳුණු දරුවන්ට ප්‍රතිකාර කිරීමේදී ද දරුවාට මෙන්ම මව්කිරි ලබා දෙන මවටද ඖෂධ ලබා දීම සිදු කෙරේ.

මෙහිදී ළදරුවන් සඳහා භාවිතා කරනු ලබන ප්‍රධානම අභ්‍යන්තර ඖෂධය වන්නේ රත කල්කයයි.
(රත කල්කය පිළිබඳ සවිස්තරාත්මක කරුණු රැසක් මීළඟ ලිපියෙන් බලාපොරොත්තු වන්න.)

ඉහත සඳහන් කළ පරිදි ඉපදී සති දෙකක් ගත වන නිරෝගී ළදරුවන්ට රත කල්කය ලබා දීමෙන් ඔවුන් ඉදිරි කාලයේදී රතගාය ආශ්‍රිත රෝග තත්ත්ව වලට පත් වීමෙන් වළක්වා ගත හැකිය.
මෙහිදී රත කල්කය ලබා දීමට දරුවා සුදුසු වේද නොවේද යන වග, ලබා දිය යුතු මාත්‍රාව හා අනුපාන, ලබා දිය යුතු වේලාව සහ කාල සීමාව පිළිබඳව නිසි අවබෝධයක් සහිතව කටයුතු කිරීම ඉතා වැදගත් ය.
ඒ සඳහා සුදුසුකම්ලත් ආයුර්වේද වෛද්‍යවරයෙකුගෙන් උපදෙස් ලබා ගැනීම ඔබේ ළදරුවාට ඉතා හිතකර වනු ඇත.

සටහන: ආයුර්වේද වෛද්‍ය නිමේෂිකා මඩිතියවල.
BAMS (Hons)
University of Colombo

15/04/2025

12/04/2025

ගුද මාර්ගය ආශ්‍රිතව ඇති වන නොයෙකුත් ස්වරූප සහිත මාංශමය නෙරීම් හෝ අංකුර අර්ශස් ලෙස සරලව හඳුන්වා දිය හැකිය. ආයුර්වේද වෛද්‍ය විද්‍යාවෙහි සඳහන් වන මහා රෝග අටෙන් එකක් වන අර්ශස් ගුදය ආශ්‍රිතව හට ගන්නා ප්‍රධානම රෝගයයි.
ආයුර්වේදීය මූල ග්‍රන්ථයන් හි අර්ශස් රෝගය පිළිබඳව මෙසේ දක්වා ඇත.
" අරීවත් ප්‍රාණාන් ශෘණාති භිනස්ති ඉති අර්ශ:"
එහි අරුත "සතුරෙකු මෙන් ප්‍රාණියා පීඩාවට පත් කරන්නේ අර්ශස් නම් වේ" යන්නයි.
එහි සඳහන් ආකාරයටම අර්ශස් යනු ඉතා වේදනාකාරී මෙන්ම රෝගියා ඉමහත් පීඩාවට පත් කරනු ලබන රෝගයකි.
ආයුර්වේද වෛද්‍ය විද්‍යාවට අනුව ගුද මාර්ගය
1.)ප්‍රවාහනී
2.) විසර්ජනී
3.) සංවරණී
නම් වන ප්‍රධාන ගුද වලි ත්‍රිත්වයේ නිර්මාණයකි. මෙම ගුද වලි ත්‍රිත්වයේ බිත්ති වල තිබෙන ශිරාවන්ගේ පිම්බීම අර්ශස්, ගුදාංකුර, ගුද කීල ලෙස සරලව දැක්විය හැකිය. ගුදය තුළ ශිරා පිහිටා ඇති ආකාරය අනුව විවිධාකාර හේතූන් මත පහසුවෙන් රුධිරය එක් රැස් වීමට හැකියාවක් පවතින අතර එමඟින් අර්ශස් හට ගනී.

ප්‍රධාන රෝග ලක්ෂණ

1.) ගුද විවරය ආශ්‍රිතව වේදනාකාරී මාංශමය නෙරීම් පිහිටීම. (මුල් අවස්ථාවේ පසු වන අභ්‍යන්තර අර්ශස් වල මෙම ලක්ෂණය දැක ගත නොහැක.)
2.) මළපහ පිට කරන විට දැඩි වේදනාවක් හෝ දැවිල්ලක් ඇති වීම.
3.) ගුද මාර්ගයේ තද ගතියක් පැවතීම.
4.) ආහාර අරුචිය සහ උදරය පිරී ඇති ස්වභාවයක් දැනීම.
5.) රෝගය උත්සන්න වූ පසු වාඩි වී සිටීම ඉතා අපහසු වීම.
6.) බොහෝ විට මළ බද්ධය සහිත වීම.
7.) මළපහ පිට කරන විට රුධිරය පිට වීම. (රුධිරය පිට නොවන අවස්ථා ද ඇත.)

අර්ශස් රෝගය හට ගැනීමට බලපාන මූලික හේතු

මෙහිදී ආහාරමය සහ විහරණමය හේතු දක්වා ඇත.
1.) අහිතකර ආහාර පුරුදු මූලික හේතුවකි.
තෙල්, මිරිස් අධික ආහාර, උෂ්ණාධික ආහාර, අම්ලාධික, ලවණාධික ආහාර නිරන්තරයෙන් භාවිතා කිරීම.
මාංශ බහුල ආහාර භාවිතා කිරීම වැඩි වීම සහ තන්තු සහිත ආහාර භාවිතා කිරීම අඩු වීම.
අධික ලෙස මත්පැන් භාවිතා කිරීම.
දීර්ඝකාලීන මළ බද්ධය සඳහා මෙම ආහාර පුරුදු හේතු විය හැකිය. එවිට සිදු කරන අධික තැටමීම හේතුවෙන් ගුද මාර්ගයේ බිත්ති ආශ්‍රිත ශිරාවන් මත පීඩනය වැඩි වීමෙන් අර්ශස් ඇති වීමට ඉඩ ඇත.
2.) දවසේ වැඩි කාලයක් වාඩි වී සිටීම.
මෙමඟින් ද ගුද මාර්ගය තෙරපී එහි ශිරාවන් මත පීඩනය වැඩි වී අර්ශස් ඇති වීමට හැකියාවක් පවතී.
රියදුරු රැකියාවේ නිරත වන අය අතර අර්ශස් රෝගය බහුල වන්නේ මේ හේතුව නිසාය.
3.) ශීතල දේශගුණය සහ ශීතල ස්ථාන වල බොහෝ වේලා වාඩි වී සිටම.
ගුදයේ පහළ කොටසේ ශිරාවන් හැකිලී යාමෙන් අර්ශස් ඇති විය හැකිය.
4.) මළ වේග ධාරණය
අවශ්‍ය වූ විට මළපහ පිට නොකර දරා සිටීම තුළින් ගුද මාර්ගය අවට පීඩනය වැඩි වීම මේ සඳහා හේතු විය හැකිය. එමෙන්ම වැඩි කාලයක් මහාන්ත්‍රය තුළ මළපහ රැඳී තිබෙන විට අධික ලෙස ජලය අවශෝෂණය වන බැවින් මළ වියළීමට ලක් වී මළ බද්ධය ඇති විය හැකිය.
මීට අමතරව අධික ලෙස වෙහෙසී වැඩ කිරීම, අධික ව්‍යායාමය හේතු විය හැකිය.

අර්ශස් වර්ගීකරණය

ආයුර්වේද වෛද්‍ය විද්‍යාව තුළ මෙම වර්ගීකරණය ඉතා පුළුල් ලෙස සිදු කර ඇති අතර, අර්ශස් ඇති වන ස්ථානය අනුව ඉතා සරලව
1.) බාහිර
2.) අභ්‍යන්තර
ලෙස වර්ග කළ හැකිය.
බාහිර අර්ශස් ගුද මාර්ගයෙන් පිටත මාංශමය නෙරීම් ලෙස දැක ගත හැකි අතර අභ්‍යන්තර ගුද වලි ආශ්‍රිතව අභ්‍යන්තර අර්ශස් හට ගනී.
අභ්‍යන්තර අර්ශස් ඇති විට මුල් අවස්ථාවේ දී රුධිරය පිට වීමක් සිදු වුවහොත් හැර රෝගියාට විශේෂ දැනීමක් නැත. දෙවන අවස්ථාව වන විට මළපහ පිට කරන විට පිටතට පැමිණෙන අර්ශස් අංකුර මළපහ පිට කිරීම අවසානයේ දී ඉබේම ඇතුළට යයි. තෙවන අවස්ථාවේ දී මළපහ පිට කරන විට පිටතට පැමිණෙන අර්ශස් අංකුර තමා විසින් අතින් ඇතුළු කර ගත යුතු වේ. රෝගය සිවු වන අවස්ථාවට පත් වූ පසු අභ්‍යන්තර අර්ශස් අංකුර බාහිරයට පැමිණ පිහිටයි, ඇතුළු කළ නොහැකි වේ.
ඉහත සඳහන් කර ඇති පරිදි අර්ශස් යනු මහා රෝගයකි. එමෙන්ම ඉතා පීඩාකාරී, කල් ගත වන විට උපද්‍රව බහුල වන රෝගයකි. මුල් අවස්ථාවේ පවතින රෝගය අභ්‍යන්තර හා බාහිර ඖෂධ මඟින් සුව කර ගත හැකි නමුත් කල් ගත වන විට ඖෂධ මගින් සුව කර ගැනීම අපහසුය. එහිදී ශල්‍යකර්ම පවා යොදා ගැනීමට සිදු වනු ඇත.

මෙහි පවතින සංකූලතා බහුලතාවය සහ නැවත නැවත ඇති වීමේ ප්‍රවණතාවය වැඩි වීම යනාදි කරුණු සලකා බැලූ කල ඔබත් මෙම රෝගයෙන් පෙළෙන අයෙක් නම් නොපමාව සුදුසුකම් ලත් වෛද්‍යවරයෙක් හමු වී ප්‍රතිකාර ලබා ගැනීම ඉතා යහපත් වනු ඇත.

සටහන: ආයුර්වේද වෛද්‍ය නිමේෂිකා මඩිතියවල
BAMS (Hons)
University of Colombo

16/04/2024

නව වසරේ සුභ මොහොතින් හිස තෙල් ගෑමේ චාරිත්‍රය සිදු කරමින්..