01/09/2026
HAUS UM SAND
FEIERT 10 JOER
Wat 2016 ganz kleng ugefaangen huet, ass mat der Zäit gewuess an wäert sech och haut nach ëmmer weiderentwéckelen.
Säit 10 Joer begleeden ech Elteren dobäi, hir Kanner besser ze verstoen an hiren Familljenalldag méi bindungs- a bedierfnisorientéiert ze gestalten ouni sech selwer ze vergiessen.
A menge Berodungen an Elteren-Kand Coursen ginn ech den Eltere Wëssen, Erfarung, Impulser a konkret Iddie mat op de Wee, déi hinnen hëllefen, hiren ganz eegene Wee als Famill ze fannen. Dobäi ass et mir wichteg, d’Elteren an hire Ressourcen ze stäerken, hinnen awer och nei Ressourcen mat op de Wee ze ginn a gemeinsam ze kucken, wéi passend Ritualer ganz natierlech an den Alldag integréiert kënne ginn. Esou kënnen am Familljeliewe kleng Anker entstoen, déi Sécherheet, Gebuergenheet a méi Rou an den Alldag bréngen.
Fir Elteren och schonn an der Zäit virdrun begleeden ze kënnen, hunn ech decidéiert, eng intensiv Doula Ausbildung an Däitschland ze maachen. Domat huet sech fir mech alles stëmmeg zesummegefügt. Säit 2019 begleeden ech vill Koppelen an elengerzéiend Fraen duerch Schwangerschaft, Gebuert a Wochebett.
Ech halen och Fraekreesser, hu vill ganz intim Geschichten héieren, Momenter vun Onsécherheet, Freed a grousser Emotioun mat erlieft, Kraaft a Vertrauen wuessen gesinn a ganz besonnesch Transformatiounen dierfe mat erliewen. Et geet hei ëm “helleg” Räim, déi mech ëmmer erëm beréieren a mir weisen, wéi wäertvoll et ass an dëse sensiblen a prägenden Zäiten einfach do ze sinn, ze halen an ze stäerken.
Zesumme mat 4 aneren engagéierten Doulaen hu mir d’Associatioun Doula Lëtzebuerg gegrënnt. Als Presidentin wäert ech mir mat deenen aneren Méi ginn, den Doulaën zu Lëtzebuerg méi Visibilitéit a Gewiicht ze ginn, fir méi Transparenz an Opklärung ze suergen an eis Aarbecht ëmmer méi bekannt ze maachen. Mir wëllen eis vernetzen, sensibiliséieren an de Famille weisen, wat eng Doula ass a wéi si wierkt. Ab September lancéieren mir eis Homepage a wäerten méi präsent sinn.
A vläicht ass genee dat eng vun de gréisste Verännerunge vun “Haus um Sand” no 10 Joer. Laang war “Haus um Sand” virun allem: ech…a mat de Joren si wäertvoll Collaboratioune mat der Waldorfschoul, enger Konschttherapeutin, Doulaën, Hiewanen, dem Eltereforum an anere Mënschen aus anere Strukturen entstanen. Mënschen, déi sech ergänzen an dobäi e gemeinsamt Zil hunn: Koppelen, Familljen a elengerzéiend Elteren ze begleeden an ze stäerken.
Trotz all deem war 2025/2026 fir mech dat herausfuerderndst Joer. Ech hu mech net ëmmer a menger Mëtt gefillt an hunn ugefaangen ze zweifelen. Villes huet sech an de leschte Joren an de Beräicher, an deenen ech schaffen, zu Lëtzebuerg verännert. Eng Zäitchen hunn op eemol manner Leit de Wee bei mech fonnt. Dat huet natierlech eppes mat mir gemaach. Ech hu mech gefrot, ob dat, wat ech maachen, nach gebraucht gëtt an hat wierklech d’Gefill, meng Plaz e bëssen verluer ze hunn.
Haut mierken ech awer ëmmer méi: “Haus um Sand” evoluéiert. A vläicht huet et genee dës Phas gebraucht, fir z’erkennen, datt Verännerung net bedeit, seng Plaz ze verléieren. Heiansdo bedeit et einfach, datt eppes “Neies” entsteet.
“Haus um Sand” soll eng Plaz bleiwen, wou mir eis wierklech begéinen a vernetzen. Mir liewen an enger Zäit, wou Villes iwwer Bildschiermer leeft. Ëmsou méi wäertvoll fannen ech déi Momenter an deene mir zesummekommen, eis Zäit firenee huelen a richteg a Kontakt trieden. Et entsteet eng Gemeinschaft an d’Gefill, mat senge Froen, Gedanken an Erfarungen net eleng ze sinn.
No 10 Joer fillt et sech dofir net un, wéi wann eppes op en Enn geet. Am Géigendeel. Et fillt sech un, wéi wann déi lescht 10 Joer d’Fundament waren. An elo wäert et weidergoen, wuessen a sech weiderentwéckelen.
E grousse Merci geet un all Eenzelnen, deen an deene leschten 10 Joer en Deel vun dësem Wee war. Merci fir äert Vertrauen. Merci fir all Gespréich, all Fro, all Kritik, all Tréin, all Laachen an all déi kleng a grouss Momenter, déi “Haus um Sand” zu deem gemaach hunn, wat et haut ass.
An och e Merci un all déi Mënschen, déi elo mat mir nei Weeër ginn a matgestalten.
A well “Haus um Sand” haut Gebuertsdag feiert, kritt dir 10 Deeg laang 10% Reduktioun op all meng Offeren.
10 JOER – 10 DEEG – 10 PROZENT
1 SEPTEMBER - 10 SEPTEMBER
CODE: Hausumsand10
Happy birthday. Wat eng Rees, wow!!! Op déi nächst 10 Joer. Ech freeë mech ✨💛✨
Illustratioun: Patrick Hallé
