27/09/2017
معضلة " سمح ليا ولكن كنبغيك بحال خويا " او ما يسمى بالفرندزون💔
فا شنو كنقصدوا بمصطلح Friend Zone؟
فبكل بساطة هو : ممكن نعرفوه بوضع الفتاة أو الشاب في منطقة الصداقة دون ان يتم تخطي هذه المنطقة لمنطقة "الحب"
دراسة الحالة :
ياسين زميل مروى فالخدمة , مع الوقت بدى كيحس بإنجذاب ليها, حاول يعبر ليها شحال من مرة على المشاعر ديالو , مروى لاحظت هاد المشاعر فكلامو و حركاته ,ولكن للأسف مكانتش حاسة من جيهتو نفس مشاعر الإنجذاب اللي هو حاس بها من ناحيتها, و على عكس ياسين اللي كان باغي الموضوع يتطور لمرحلة أعلى من مجرد إنجذاب بين جوج زملاء , مروى كانت باغية توقف هاد الموضوع حيت مابغاتوش يتطور .. ياسين بالنسبة ليها مجرد زميل فالخدمة ماشي كتر .. ياسين بالنسبة ليها ف الـ Friend Zone
سنه 1948 , جاب لينا عالم الأحياء Angus John Bateman نظريته العملية
الـ Bateman's principle , و اللي كتقول نظرا ان الأنثى عندها عدد محدد من البيوضات في مقابل الذكر اللي عندو عدد غير منتهي من الحيوانات المنوية, فهاد شي كيخلي الأنثى في اي علاقه تزاوج او ارتباط لها اليد العليا .. بمعنى ان الطبيعة كتعطي للمراة أفضلية اختيار الراجل اللي هي شايفاه مناسب ليها , عكس الراجل اللي كيقدم راسو للأختبار و هو و زهرو ,, فاللي وقع مع ياسين انه قدم راسو لمروى , ولكن مروى مشافتش ان ياسين هو الي صالح ليها , و سالا الموضوع بالنسبة لمروى فهاد النقطة .. فياسين المفروض يستوعب الموضوع , و يحترم قرار مروى بكل هدوء و نُضج و يكمل حياتو عادي .. ولكن الي وقع ان ياسين عاش حالة اكتئاب و يأس كبيرة , شاف كلشي فحياتو كحل و حزن ,, و بقى محبوس فسؤال "علاش ماشي أنا ؟! " ..
الحقيقة , علاش ماشي انت يا أخ ياسين ,, لبزاف ديال الاسباب منها انه حسب Helen Fisher في كتابها Why We Love , وضحت ان الناس كتبغي مني كتلقى 3 ديال لحوايج ( الأنجذاب , الش**ة , التعلق ) , بمعني ان باش مروى تولي كتبغي ياسين ضروري فالأول تنجذب ليه يعني تحس انه فيه شي حاجة مميزة كتشدها , و من بعد تشهى الجلسة معاه سواء ش**ة جنسية او ش**ة عاطفية المهم عنصر انها تبقى ديما فرحانة حيت حاضر معاها و صافي , و اخيرا تتعلق بيه , يعني و حتى و هو ماشي معاها تولي ما قادراش تبعدو على تفكيرها .. و للأسف هادشي كامل وقع لياسين ولكن ماشي لمروى , و اللي بالمناسبة ماشي عيب فياسين او غلط منو , طبيعي ان كاين ناس كتولد كتبغي التفاح و ناس اخرى كتبغي العنب .. عمرنا ما غادي نبزو على اللي كيبغيو التفاح يبغيو العنب بزز منهم , و إلا غانكونو مرضى و ساديين !!
حاجه اخرى,, صدق او لا تصدق ,الى ياسين كان ظريف بزاف مع مروى و خدوم , الى كان ديما موجود و سهل توصل ليه , لو كان واضح بشكل مفرط ! ,كاع هادشي كيزيد فرصة دخوله في الـ Friend Zone ؟!! .. الانسان بطبعه ماكايبغيش الحوايج الساهلة , إنما بالـ scarcity principle , الانسان يقع في حب الاشياء التي يصعب الوصول اليها , و هاذا بالظبط اللي وقع فياسين , و السبب ان عقله مني كيبذل مجهود باش يوصليها كيترجم هاد المجهود على اساس ان الهدف اللي وراه شي حاجة عظيمة جدا ضروري يوصليها ! على عكس مروى اللي كان ياسين بالنسبة ليها شي حاجة زوينة و مسلية موجودة جنبها من غير ما تبذل اي مجهود .. فحتى لو انها قصاحت معاه , هو فجميع الاحوال موجود .. فباركة عليه غير الـ Friend Zone
في النهاية , ياسين ممكن يبقى محبوس ف "علاش ماشي أنا ؟ " وقت طويل , يجلس يتشقلب و يحزن و يسمع "عيد ميلاد جرحي انا " للفنان هاني شاكر ,ولكن الحقيقة ان حتى حد ماغيتأثر او يركز معاه اصلا .. او ممكن يستفيد من التجربة و يحاول يطور من نفسو باش ميبقاش مقيم رسمي في جمهورية الـ Friend Zone
و هادشي كامل الى قلناه غير باش تستهلك بلا ماتهلك 😀
بس : الصورة اسفله هي رمز لFriend Zone 😀
