الدكتور أيناوو محمد- أخصائي جراحة المسالك البولية و التناسلية- تاوريرت

30/08/2026

قصة ألم وأمل ❤️🩺
فواحد الفترة ديال العمل ديالي فمدينة ميسور، جات للمستشفى واحد السيدة فأواخر الثلاثينات، كانت كتعيش واحد المشكل صعيب : تسرب مستمر ديال البول نهار وليل.
كانت باقا كترضع ولدها اللي عندو 9 شهور، و المشكل ديالها بدا من بعد الولادة الطبيعية مباشرة ،ومع مرور الوقت، بدات المعاناة كتزاد، و أثرات حتى على حياتها الزوجية، لدرجة أن زوج ديالها سمح فيها و خلاها بسبب هاد المشكل. كانت كتحس بالعزلة والإحراج الشديد،
من بعد الفحص والكشوفات الطبية، تبين أنها كتعاني من ناسور مثاني مهبلي (Fistule vésico-vaginale)، وهو عبارة عن ثقب ماشي طبيعي كيتكون بين المثانة والمهبل، وغالباً كيكون نتيجة لمضاعفات الولادة ملي كتكون صعيبة و طويلة.
المريضة كانت جاية من دوّار بعيد على ميسور، وظروفها كانت صعيبة، ولكن الحمد لله بفضل الله قدرنا نديرو ليها العملية الجراحية ونصلحو هاد الناسور بنجاح.

الأجمل ف هاد القصة؟
هو ديك الفرحة ديالها من بعد ما برات، ورجعات تعيش حياتها بشكل طبيعي، بلا تسرب، بلا إحراج، وبكرامة. رجعات ليها الابتسامة والأمل ف غد أفضل.
و هاد القصة كتذكرنا بواحد الحاجة مهمة: تسرب البول المستمر من بعد الولادة ماشي أمر عادي، وما خاصش المرأة تبقى ساكتة عليه أو تحس بالحشمة . هاد المشكل ماشي "مكتوب" خاصها تعايش معاه، بل هو حالة طبية معروفة؛ كاين ليها تشخيص وكاين ليها علاج جراحي فعال كيرجع للمرأة حياتها الطبيعية.

#

📸 في التعليق الأول توثيق طبي لرحلة العلاج من داخل قاعة العمليات والفحص المنظاري
الصورة 1 (سكانير): كيبين لينا المشكل؛ المادة البيضاء اللي كتعمر المثانة، باينة كتسرب وتتسيل جيهة المهبل، وهادا هو التأكيد الإشعاعي لوجود الناسور. الصورة 2 (المنظار الأولي): كنبينو فيها فحص المثانة بالمنظار (Cystoscopie). الدائرة السوداء كتوضح بدقة هاداك الثقب (الناسور) اللي كيربط بين المثانة والمهبل، واللي كان هو السباب ف تسرب البول المستمر. الصورة 3 (وسط العملية الجراحية): لقطة من داخل قاعة العمليات. الدائرة كتوثق مرحلة خياطة وإغلاق هاد الثقب ب غرز جراحية، باش نرجعوا الجدار الطبيعي للمثانة ونمنعوا أي تسرب. الصورة 4 (منظار المراقبة بعد شهر - J30): هادي هي اللحظة الأجمل! فحص المراقبة من بعد 30 يوم من العملية كيبين بلي جدار المثانة برى وتجمع تماماً (مابقاش الثقب نهائياً)، والمخاطية ديال المثانة رجعات وردية وصحية. هادا دليل على النجاح التام للعملية والشفاء النهائي.

29/08/2026

😂 ملي شفت هاد الفيديو ديال هاد الشاب الأجنبي، تفكرت بزاف ديال التعاليق اللي كانت على المنشور ديالي على الفحص الشرجي للبروستات

كاين اللي كيقول: واش حنا مازالين فالعصر الحجري؟ التكنولوجيا تطورات، و علاش ما كاينش شي جهاز يعوض هاد الفحص؟ 😅

المثير للاهتمام هو أن نفس التخوف ونفس السؤال كاينين حتى عند الناس ديال بلدان اللي الطب فيها متطور بزاف.

الفحص الشرجي للبروستات ما عندوش علاقة بواش الطب متطور ولا متأخر، وماشي حيث ما عندناش التكنولوجيا. 😉
راه الفحص السريري عندو قيمة ديالو، والتكنولوجيا كتكمّلو وماشي بالضرورة كتعوضو.

وبالمناسبة… البروستات عندها هاد القدرة العجيبة:
مهما تطورات التكنولوجيا، كتخلي بعض الرجال يقولوا:
«واش قانوني هادشي دكتور؟🤣

29/08/2026

ذكريات جميلة من فترة عملي بمستشفى المسيرة الخضراء بميسور سنة 2022 .. تحية كبيرة لأهل ميسور ولكل زملاء مستشفى المسيرة الخضراء .

27/08/2026

جيل موضعي لعلاج ضعف الانتصاب: شنو هو؟ شنو الدور ديالو؟و فوقاش كنقدرو نستاعملوه فالعلاج؟

بزاف ديال المرضى كيسولو : واش كاين شي علاج لضعف الانتصاب من غير لكنينات
من بين الاختيارات اللي كاينين، كاين مادة Alprostadil، وهو دواء موضعي كيخدم مباشرة على العروق ديال الدم ديال العضو الذكري كيعاون على حدوث الانتصاب.

شنو هي هاد المادة ؟
هي مادة كتشبه واحد المادة طبيعية كاين ف الجسم ديالنا سميتها Prostaglandine E1.

شنو الدور ديالها ؟
الدور ديالها كتعاون على ارتخاء العضلات ديال الاجسام الكهفية لي كينا داخل العضو الذكري وبالتالي كتزيد دخول الدم بشكل كافي. هاد الدواء كيمكن يتستعمل عبر عدة طرق، ومن بينها هاد الجيل الموضعي اللي كيتندار داخل ثقب البول (الإحليل) عبر عصية (Applicateur) قبل العلاقة بـ 5 إلى 30 دقيقة.

امتا نقدرو نستعملوه ؟
فالغالب، الكنينات كتكون هي الاختيار الأول لعلاج ضعف الانتصاب، إلا ما كان حتى شي مانع طبي.
ولكن ماشي كل مريض كيستافد من لكنينة بنفس الدرجة، وكاين اللي ما كيقدرش يستعملها بسبب الأعراض الجانبية أو ما كتعطيش النتيجة المطلوبة. فهاد الحالات، كنقترحو اختيارات أخرى، ومن بينها هاد الجيل الموضعي.

واش هاد الجيل حسن من لكنينات؟
ما كاينش علاج أفضل من الأخر. هاد الجيل كيتميز ب أنه موضعي وما كيتشربش وما كيحتاجش حقن بالإبرة. لذلك، اختيار العلاج كيعتمد على سبب المشكل، الحالة الصحية للمريض، الأدوية الأخرى اللي كياخد، والتفضيل ديالو.

واش عندو أعراض جانبية؟
نعم، بحال أي دواء يقدر يسبب عند بعض الحالات:

• حريق خفيف ف العضو الذكري أو مجرى البول.
• تهيج ف الإحليل.
• نادرا دوخة أو انخفاض ف الضغط عند بعض المرضى

لهذا، هاد العلاج خاصو يكون بوصفة ومتابعة دقيقة من طبيب المسالك البولية، وما خاصش المريض يجربو بوحدو.

هاد الجيل الموضعي ماشي متوفر فالصيدليات المغربية حالياً، و كيجيبوه المرضى معاهم من أوروبا. وكنتمناو يتوفر مستقبلاً، حيت غاذي يعطي للطبيب اختيار إضافي مهم لبعض المرضى اللي ما ستفدوش من العلاج ديال لكنينات.

📸 فالصورة: الجيل المخصص للاستعمال الموضعي/الإحليلي

#تاوريرت #وجدة

24/08/2026

واش هاد الشي قانوني؟ 😂

واحد النهار، من بعد ما قلبت واحد المريض كبير فالعمر ودرت ليه الفحص، قلت ليه:
«الحاج غادي نقلبك من اللور.»

منين شرحت ليه بلي غادي ندخل صبعي فالمخرج ديالو باش نقلب البروستات، شاف فيا وقال بكل جدية:

«واش هاد الشي قانوني؟» 😂😂

ضحكت، ولكن السؤال ديالو عندو معنى، حيث بزاف ديال الرجال ملي كيسمعو تقليبة ديال البروستات من المخرج Toucher re**al كيتساءلو:
«أنا عندي مشكل فالبول… علاش الطبيب باغي يقلبني من اللور؟!»

التقليبة ديال البروستات من المخرج ماشي إهانة او تعديب وماشي إجراء بلا سبب.
هو فحص طبي كيعاون الطبيب يقيس البروستات من المخرج، حيث البروستات قريبة بزاف من هاد المنطقة.

شنو كنقدرو نعرفو به؟

- واش البروستات كبيرة ولا لا
- واش الملمس ديالها طبيعي ولا كاين شي تصلب أو حبة مشبوهة
- واش كاين ألم، خصوصاً فبعض حالات التهاب او تعفن البروستات
- وكيقدر يعطينا معلومات مهمة باش نشخصو بعض مشاكل التبول والبروستات

ولكن مهم نعرفو واحد الحاجة: Toucher re**al بوحدو ما كيقدرش يشخّص سرطان البروستات. الطبيب كيقيّم الحالة كاملة: الأعراض، الفحص، تحليلة ديال الدم ديال البروستات PSA، وأحياناً فحوصات أخرى حسب الحالة.

#البروستات

22/08/2026

20/08/2026

الشبكة أو "البلاكة" فعملية الفتق: علاش كنستعملوها؟ واش ضرورية؟
بزاف ديال المرضى كيسولونا قبل العملية: واش غادي ديرولي الشبكة؟

شنو هي الشبكة؟

هي مادة طبية رقيقة وخفيفة بزاف، كنحطوها فبلاصة الضعف فـجدار البطن. الدور ديالها كتعاون على تقويتو ومنع رجوع الفتق مرة أخرى. كنديرو هادشي بشكل روتيني فبزاف ديال الحالات وكيكون آمن وغالباً ما كيتسبب ف حتى شي مشكل.

علاش كنستعملوها؟

حيت الفتق أصلاً كيكون بسبب ضعف أو تمزق فالجدار ديال البطن. منين كنصلحو الفتق، هاد الشبكة كتخلي الإصلاح أقوى كثر، وكتنقص من احتمال أنه يرجع مقارنة مع التقنية العادية بدون شبكة.

فالصورة: تحضير الشبكة الطبية قبل استعمالها فعملية الفتق ال الإربي داخل غرفة العمليات.

📍 العنوان: مصحة النسيم تاوريرت

17/08/2026

كيفاش ايحس الإنسان وهو عندو بحال هاد الحجرة فالمثانة ؟

الإحساس كيكون مزعج بزاف… بحال إلا كاين شي حاجة داخل الكرش وكل ما تحرك كيزيد الألم و الإزعاح.

من بين الأعراض اللي ممكن تسببها الحجرة:
🔹 ألم وحريق فأسفل البطن.
🔹 التبول كيولي متقطع وصعيب، خصوصاً ملي كتسد الحجرة فم المثانة.
🔹 كثرة التبول والإحساس المستمر بالحاجة للذهاب للمرحاض.
🔹 الدم فالبول، نتيجة احتكاك الحجرة بجدار المثانة.
🔹 وأحياناً، فالحالات المتقدمة، ممكن توصل حتى لاحتباس البول.

#تاوريرت #وجدة

14/08/2026

استشارات في جراحة الكلى والمسالك البولية والتناسلية
📍 مصحة النسيم – تاوريرت
🗓 الاثنين والأربعاء

08/08/2026

من أجواء وعدة قبيلة لعثامنة أولاد عمر بسيدي سماعيل ،سيدي لحسن - تاوريرت
أجواء تراثية جميلة تجمع الماضي و الحاضر