25/05/2026
🤝Mirë se vjen Vita S Poliklinika Ks në familjen olimpike të Kosovës! ✍️
Komiteti Olimpik i Kosovës ka nënshkruar marrëveshje sponsorizimi katërvjeçare me klinikën me renome ndërkombëtare VITA S, në rrugëtimin e përbashkët drejt Lojërave Olimpike LA28.
Marrëveshja u nënshkrua në zyret e KOK-ut nga presidenti Ismet Krasniqi dhe menaxheri gjeneral i VITA S, Nebojsha Mojsoski, në praninë e presidentit të Komitetit Olimpik të Maqedonisë së Veriut, Daniel Dimevski, si dhe themeluesit të VITA S, Simon Trpeski.
Presidenti Krasniqi falënderoi drejtuesit e VITA S për besimin dhe mbështetjen ndaj sportit kosovar, si dhe presidentin Dimevski për ndërmjetësimin e këtij bashkëpunimi. Ai theksoi se përfituesit më të mëdhenj të kësaj marrëveshjeje do të jenë sportistët elitarë dhe bursistët olimpikë për LA 28, të cilët do të kenë qasje në mbështetje mjekësore dhe diagnostike falas.
Nga ana tjetër, Mojsoski u shpreh se është nder për VITA S të mbështesë KOK-un dhe sportistët që synojnë sukses në Lojërat Olimpike LA 28. Ai theksoi se klinika ofron shërbime moderne diagnostike dhe mjekësore, duke përfshirë MRI, CT, Rentgen dhe analiza të tjera që ndihmojnë në përmirësimin e performancës sportive, duke ftuar jo vetëm bursistët e KOK-ut, por gjithë sportistët e Kosovës të kryejnë kontrollore mjekësore në këtë klinikë.
Presidenti Dimevski ndau përvojën pozitive të bashkëpunimit me VITA S në Maqedoninë e Veriut, duke vlerësuar këtë partneritet si një mbështetje të rëndësishme për sportistët e të dy vendeve. Ndërkohë, themeluesi Trpeski vlerësoi sukseset e sportistëve kosovarë në arenën ndërkombëtare dhe ritheksoi se VITA S do të jetë në shërbim të tyre në çdo hap të rrugëtimit olimpik.
VITA S ka selinë në Skopje dhe është një nga klinikat më të njohura në rajon për shërbime diagnostike dhe mjekësi sportive.
