14/06/2021
လူသားတို့ ကမ္ဘာ
----------------
ကမ္ဘာပေါ်က လူ သန်း ၁၀၀ ကြည့်နေကြတဲ့ ဘောလုံးပွဲမှာ ဒိန်းမတ်ကွင်းလယ်လူ အဲရစ်ဆန် ကွင်းထဲလဲကျသွားတယ်။ သတိလစ်သွားတယ်။ နှလုံးရပ်သွားဖွယ်ရှိတယ်။ ၂ ဖက်ကစားသမားတွေ၊ ဒိုင်လူကြီးတွေ အလျင်အမြန် ပြေးကူကြတယ်။ ဆေးဝန်ထမ်းတွေက ကွင်းထဲမှာ CPR လုပ်နေကြတယ်။ ဒီမြင်ကွင်းကို တကမ္ဘာလုံးက လူတွေအကုန် မြင်ကြရတယ်။
ကစားသမားတွေရဲ့ မျက်ဝန်းမှာ မျက်ရည်စတွေ၊ ပရိသတ်တွေလဲ ထိုနည်းအတူပါပဲ။ ငိုနေတဲ့ သူ့ဇနီးကို ပြိုင်ဖက်အသင်းကပါ နှစ်သိမ့်ပေးကြတယ်။ ကမ္ဘာတဝှမ်းက သူ့အတွက် ဆုတောင်းပေးကြတဲ့ ဆုတောင်းတွေက သန်းနဲ့ချီပြီး ပြည့်နှက်သွားတယ်။
အားလုံးရဲ့ မျက်ရည်။ ကိုယ်စီဆုတောင်းတွေအတွက်ကြောင့်များလား မသိ။
သူ ပြန်သတိရလာပါတယ်။ ကွင်းထဲက ထွက်သွားပြီး သူ အခု ဆေးရုံမှာ ကုသမှုခံယူနေပြီ။ ဒါတွေက လူသားဆန်တဲ့ ကမ္ဘာကြီးရဲ့ လူ့အသက်တချောင်းအတွက် တန်ဖိုးထားမှုပါ။
ကျနော်တို့ဆီမှာကော။ လူ့အသက်ကယ်တဲ့ ဆရာဝန်တွေရဲ့ ဘဝ။ လူတွေရဲ့ အသက်ပေါင်းများစွာ။ ဆင်းရဲဒုက္ခရောက်နေတဲ့ လူတွေအတွက် စာနာမှု တရားတွေ ဘယ်မှာလဲ။ ကိုငှက်ရဲ့ သီချင်းထဲကလို
ကယ်တင်ခြင်းများ မရှိတဲ့ ဘဝတွေလားပေါ့။
Feb ၁ နောက်ပိုင်း အမှောင်ထုကြီးထဲမှာ၊ မလုံခြုံခြင်းတွေထဲမှာ။ မေတ္တာတွေ ကြင်နာမှုတွေ မရှိတဲ့ ကမ္ဘာကြီးမှာ ရှင်သန်နေရတဲ့ ကျနော်အပါအဝင် မြန်မာပြည်သူတွေအတွက်တော့ ဒါဟာ လူသားမျိုးနွယ်စုရဲ့ လူသားဝါဒကို ပြန်လည်မြင်တွေ့လိုက်ရတဲ့အခိုက်ပါပဲ။ စိတ်ထဲမှာ ပြောမပြနိုင်အောင် ကြည်နူးဝမ်းသာရပါတယ်။ မဲမှောင်နေတဲ့ အမှောင်တိုက်ကြီးထဲမှာ အလင်းတချက် လက်သွားသလိုပါပဲ။
မြန်မာပြည်သူတွေ တောင်းဆိုနေကြတာကလဲ အဲဒီလို အသက်တချောင်းကို တန်ဖိုးထားတဲ့၊ အကြင်နာ မေတ္တာတွေ ထုံမွှမ်းနေတဲ့ လူ့အဖွဲ့အစည်းထဲ လူဟာ လူလို နေနိုင်တဲ့စနစ်တခုကို တမ်းတနေခြင်း တောင်းဆိုနေခြင်းသာဖြစ်ပါတယ်။
ဒီညမှာတော့ အရင်တုန်းက ကျနော်တို့ ပျော်ရွှင်စွာ နေထိုင်ခဲ့ရပြီး အခုအချိန်မှာတော့ ၄ လတာ မေ့လျော့နေခဲ့တဲ့ ချစ်ခြင်းတရားနဲ့ ကမ္ဘာကြီးကို ပြန်လည်ပီး အမှတ်ရလာမိပါတော့တယ်။
ကမ္ဘာကို အချစ်များဖြင့် ဆေးခြယ်နိုင်ကြပါစေ။
#နေသွေး
