21/08/2025
‘ဗီတာမင်ဆိုတိုင်း နေ့စဉ် သောက်ဖို့ လိုသလား?’
ဗီတာမင်တွေဟာ ခန္ဓာကိုယ်အတွက် နည်းလမ်းမျိုးစုံနဲ့ အကျိုးပြုနေပါတယ်။ ဗီတာမင်တွေကို နေ့စဉ်စားတဲ့ 🍱 အစားအစာက ရရှိကြသလို ဖြည့်စွက်အနေနဲ့ 💊 ဆေးဝါး၊ ဖြည့်စွက်စာ အနေနဲ့ မှီဝဲလေ့ရှိကြပါတယ်။ ဒါဆိုရင် ဗီတာမင်တွေကို နေ့စဉ် သောက်ဖို့ လိုအပ်သလား??
👉👉 အဖြေကတော့ လူတစ်ဦးနဲ့ တစ်ဦး ဗီတာမင် လိုအပ်တဲ့ ပမာဏချင်း မတူညီနိုင်ပါဘူး။ တချို့က ပုံမှန် ကျန်းမာဖို့ အတွက်ပဲ ဗီတာမင်ကို ဖြည့်စွက်လိုတဲ့အချိန် တချို့ကတော့ ဗီတာမင် ဓာတ် ပိုမိုလိုအပ်တာ ရှိနိုင်ပါတယ်။ ဥပမာအားဖြင့် အစားရှောင်တဲ့သူ၊ အသားစားတာ နည်းတဲ့သူ၊ အသီးအရွက် စားတာ နည်းတဲ့သူ တွေမှာ ပြင်ပကနေ ဗီတာမင်နဲ့ ဖြည့်စွက်စာတွေ ပိုလိုအပ်နိုင်ပါတယ်။
အထူးသဖြင့် ခန္ဓာကိုယ်အတွက် အရေးပါတဲ့ ဗီတာမင် A, B, C, D, E အပါအဝင် Iron, Zinc, Magnesium, Calcium စတဲ့ သတ္ထုဓာတ် တွေကို သင့်တင့်တဲ့ ပမာဏအဖြစ် နေ့စဉ် ခန္ဓာကိုယ်က ရရှိနေဖို့ လိုပါတယ်။ ဒါတွေကို သင်နေ့စဉ် စားသောက်နေတဲ့ အစားအသောက်တွေမှာ ပါဝင်အောင် စားဖြစ်တယ်ဆိုရင်တော့ သီးသန့် ဖြည့်စွက်ဖို့ မလိုပါဘူး။
ဒီတော့ ဗီတာမင် တွေကို ဘယ်လို ရွေးချယ် သောက်သုံးသင့်လဲ? 🤔
(၁) အစားအသောက်နဲ့ ဆေးဝါးဆိုင်ရာ ခွင့်ပြုချက်ရရှိထားတဲ့ ဗီတာမင် အားဆေးတွေကိုပဲ ရွေးချယ် သောက်သုံးပါ။
(၂) တစ်နေ့တာ လိုအပ်တဲ့ ပမာဏထက် ကျော်လွန်ပြီး မသောက်သုံးပါနဲ့။ ဥပမာ - ပုံမှန်လူအတွက် ဗီတာမင် D ဆိုရင် တစ်နေ့ကို 600 IU ပဲ လိုအပ်ပါတယ်။ ဗီတာမင် D ချို့တဲ့သူမှာတော့ ဆရာဝန်ညွှန်ကြားချက် အရ တိုးပြီး သောက်ရမှာ ဖြစ်ပါတယ်။
(၃) ပမာဏ များများ သောက်သုံးလိုတယ်ဆိုရင် ဗီတာမင် ချို့တဲ့မှု ရှိမရှိ စစ်ဆေးပြီးမှပဲ သောက်သုံးရင် အကောင်းဆုံးပါပဲ။
(၄) အစားအသောက်ကို စုံလင်မျှတစွာ စားသုံးပါ။
🧑⚕️ တန်ဆေးလွန်ဘေးဆိုသလို ဗီတာမင်တွေဟာ နေ့စဉ်အတွက် မရှိမဖြစ် လိုအပ်သလို လိုတာထက် များများသုံးမိရင်လည်း အန္တရာယ် ရှိနိုင်တာကြောင့် သတိပြုဆင်ခြင်နိုင်ဖို့ မျှဝေလိုက်ရပါတယ်ရှင်
