20/05/2026
လက်ကောက်ဝတ်အရိုးကျိုးလျှင်
- - - - - - - - - - - - - - - - - - - -
တနေ့ ကျတော့်ဆေးခန်းကို အသက် ၂၅ နှစ်အရွယ် လူငယ်တစ်ယောက် သူ့ရဲ့ဘယ်ဘက်လက်ကောက်ဝတ်နာလို့ လာပြပါတယ်။
ကျတော်ကြည့်လိုက်တော့ပုံမှန်လက်ကောက်ဝတ်အနေအထားမဟုတ်လို့တန်းပြီး ဓါတ်မှန်ရိုက်ခိုင်းလိုက်ပါတယ်။ (တခြားစမ်းသပ်မှုတွေလဲလုပ်ပါသေးတယ်)
ဓါတ်မှန်မှာ အပြင်ဘက်လက်ဖျံရိုးကျိုးနေပါပြီ၊ ထပ်ပြီးမေးကြည့်တော့ လက်ထောက်ချော်လဲတာ (၂ )လ ရှိပြီလို့လဲပြောပါတယ်။ ဓါတ်မှန်အနေအထားအရ ခွဲကိုခွဲရမှာပါ၊ မခွဲရင်မကောင်းတဲ့ အနေအထားမျိုးပါ။
ဘာလို့ ဖြစ်ဖြစ်ချင်းလာမပြတာလဲမေးတော့ အနှိပ်သည်တွေဆီရောက်နေတာ ၊ ဟိုလူပြောလို့ သွားနှိပ်တယ် ၊ ဒီလူပြောလို့ ကျပ်စည်းတယ်နဲ့ အချိန် (၂)လမှာ လည်ထွက်နေပါတယ်။
ထိုလူငယ်လေးအား ခွဲစိတ်ကုသမှ ရမယ့်အကြောင်းသေချာရှင်းပြသော်လည်း ရွာမှာရှိတဲ့ အနှိပ်ဆရာက နာမည်ကြီးနေလေတော့ ကျတော့ဆီလာပြပြီးသည့်တိုင် ရွာပြန်ပြီး အနှိပ်သည်ဆီသွားနှိပ်ပြီး ဘယ်လိုမှမသက်သာတော့တဲ့အဆုံး ကျတော့ဆီ ပြန်ရောက်လာတာပါ ။
ထိမိခိုက်မိဖြစ်ဖြစ်ချင်း လိုအပ်တဲ့ ခွဲစိတ်မှု ထိထိရောက်ရောက် ခံယူလိုက်ရင် ဒီအချိန်လောက်ဆို အရိုးဆက်ပြီးကောင်းကောင်းမွန်မွန်နဲ့ လုပ်ငန်းခွင်ပြန်ဝင်နေလောက်ပြီ။
အခုတော့ အလကားနေရင်း အချိန်(၂)လ လဲပုပ်တယ်၊အလုပ်လဲကောင်းကောင်းမလုပ်နိုင်တော့ အလုပ်မသွားရ၊ ဝင်ငွေထိခိုက်တယ်၊ ပုံမှန်နေ့တဓူဝကိစ္စတွေမလုပ်နိုင်တော့ စိတ်ဓါတ်ကျ၊ အနှိပ်သည်တွေဆီ ရောက်ရင် ရမ်းတမ်းပမ်းတမ်းနှိပ်တော့ သေအောင်အော်ရသေးတယ် ၊ တခုမှ အကျိုးမရှိဘူး။
အချိန်၂ လကျော်မှ ခွဲတော့ လူနာက ပိုနာတယ်၊ ခွဲပေးတဲ့ဆရာဝန်လဲ ချွေးပြန်ရတယ်၊ result လဲလျော့တယ်
အဲ့တော့ ပြောချင်တာက ထိခိုက်ဒဏ်ရာတစ်ခုခုဖြစ်လျှင် နားလည်တတ်ကျွမ်းတဲ့ဆရာဝန်နဲ့ပြပြီး ကုသမှုပုံစံကို ဆွေးနွေးပါ၊ တိုင်ပင်ပါ ၊ အကြံဉာဏ်ရယူပါ။
လူနာရဲ့ အသက်၊ အလုပ်အကိုင်၊ အခြေခံကျန်းမာရေး၊ အရိုးကျိုးပုံကျိုးနည်း တို့အပေါ်မူတည်ပြီး ခွဲရန်လိုသည် ၊ ခွဲရန်မလို စသည်တို့ကို ဆရာဝန်မှ ရှင်းပြလျှင်လေးစားလိုက်နာပေးပါလို့အကြံပြုပါတယ်ခင်ဗျာ။
