07/08/2026
လေးဘက်နာရောဂါတွေ ဆိုတာ ဘာတွေလဲ? အမျိုးအစား ဘယ်နှစ်မျိုးရှိလဲ? 🦵
"လေးဘက်နာ" ဆိုတာ ခန္ဓာကိုယ်ရဲ့ အရိုး၊ အဆစ်၊ ကြွက်သားနဲ့ သွေးကြောတွေကို နာကျင်ရောင်ရမ်းစေတဲ့ ရောဂါစုကြီး ဖြစ်ပါတယ်။ လူအတော်များများက အဆစ်အမြစ်ကိုက်ခဲတာ တစ်ခုတည်းကိုပဲ လေးဘက်နာလို့ ထင်တတ်ကြပေမယ့် တကယ်တော့ လေးဘက်နာအမျိုးအစား ပေါင်း ၁၀၀ ကျော်အထိ ရှိပါတယ်။
အဲ့ဒီထဲကမှ ကျွန်တော်တို့ပတ်ဝန်းကျင်မှာ အဖြစ်အများဆုံး လေးဘက်နာ အမျိုးအစားကြီး (၄) မျိုးကို ဝေမျှပေးချင်ပါတယ် 👇
🩸 သွေးလေးဘက်နာ (Rheumatoid Arthritis - RA)
ခန္ဓာကိုယ်ရဲ့ ကိုယ်ခံအားစနစ် ကမောက်ကမဖြစ်ပြီး ကိုယ့်အဆစ်တွေကို ပြန်တိုက်ခိုက်ရာကနေ ဖြစ်လာတဲ့ ရောဂါပါ။ လက်ချောင်း၊ ခြေချောင်း အဆစ်လေးတွေကစပြီး ဘယ်ညာအစုံလိုက် ရောင်ရမ်းနာကျင်တတ်ပြီး မနက်အိပ်ရာထချိန်မှာ အဆစ်တွေ တောင့်တင်းနေတတ်တာက အဓိက လက္ခဏာဖြစ်ပါတယ်။
🦴 အရိုးနုစား လေးဘက်နာ (Osteoarthritis - OA)
အသက်ကြီးလာတာ၊ ကိုယ်အလေးချိန်များတာ ဒါမှမဟုတ် အဆစ်ကို အလွန်အကျွံ သုံးစွဲတာကြောင့် အဆစ်ကြားက အရိုးနုလေးတွေ ပွန်းစားပြီး ဖြစ်လာတဲ့ ရောဂါပါ။ အသက် ၅၀ ကျော်သူတွေမှာ အဖြစ်များပြီး အထူးသဖြင့် ဒူးဆစ်၊ ခါးဆစ်နဲ့ တင်ပါးဆစ်တွေမှာ ပိုဖြစ်တတ်ပါတယ်။
🍄ယူရစ်အက်စစ်များ လေးဘက်နာ / ဂေါက်ရောဂါ (Gout)
သွေးထဲမှာ ယူရစ်အက်စစ် (Uric Acid) တွေ အရမ်းများလာပြီး အဆစ်တွေထဲမှာ သွားစုပုံရာကနေ ဖြစ်လာတာပါ။ကိုယ်တွင်း ကလီစာများ၊ ပုစွန်၊ မျှစ်နဲ့ အရက်၊ ဘီယာတွေ အစားများသူတွေမှာ အဖြစ်များပြီး အထူးသဖြင့် ခြေအဆစ်ကြီး ချက်ချင်းဖောင်းကြွပြီး ပြင်းပြင်းထန်ထန် နာကျင်လာတတ်ပါတယ်။
🦋 အရေပြားလေးဘက်နာ / လူးပတ်စ်ရောဂါ (SLE)
ဒါကတော့ အဆစ်အမြစ်တင်မကဘဲ အရေပြား၊ ကျောက်ကပ်၊ နှလုံးနဲ့ အဆုတ်စတဲ့ ခန္ဓာကိုယ်အတွင်းအင်္ဂါတွေကိုပါ ကိုယ်ခံအားစနစ်က မှားယွင်းတိုက်ခိုက်တဲ့ ပြင်းထန်တဲ့ လေးဘက်နာအမျိုးအစား ဖြစ်ပါတယ်။ မျက်နှာမှာ လိပ်ပြာပုံစံ အနီကွက်တွေ ထွက်လာတတ်တာက ထင်ရှားတဲ့ လက္ခဏာတစ်ခု ဖြစ်ပါတယ်။
"လေးဘက်နာရောဂါတွေဟာ အမျိုးအစားပေါ်မူတည်ပြီး ကုသပုံချင်း မတူညီကြပါဘူး။“
ဒါကြောင့် မိမိမှာ အဆစ်အမြစ်တွေ ပုံမှန်မဟုတ်ဘဲ နာကျင်ရောင်ရမ်းနေပြီဆိုရင် အကိုက်အခဲပျောက်ဆေးတွေ ဇွတ်မှိတ်သောက်မယ့်အစား နားလည်တတ်ကျွမ်းတဲ့ ဆရာဝန်နဲ့ သေချာပြသပြီး ထိရောက်တဲ့ ကုသမှုကို စောစောစီးစီး ခံယူဖို့ တိုက်တွန်းလိုက်ရပါတယ်နော်။ ❤️
