04/01/2026
-နှစ်ဖက်ချွန်အားဆေး သောက်မယ်ဆိုရင် ……….
(ကောင်းကျိုး/ဆိုးကျိုး အစုံအလင်)
မင်္ဂလာပါခင်ဗျာ... ဒေါက်တာရဲ ပါ။
ဒီနေ့တော့ ကျွန်တော်တို့မြန်မာပြည်မှာ လူကြီးလူငယ်မရွေး တော်တော်လေးရင်းနှီးပြီးသားဖြစ်တဲ့ "နှစ်ဖက်ချွန်" လို့ လူသိများတဲ့ ဆေးအကြောင်းလေး ပြောပြပေးချင်ပါတယ်။
တော်တော်များများက "အားမရှိရင် ဒါလေးဖောက်သောက်လိုက်၊ အားပြည့်တယ်" ဆိုပြီး သောက်လေ့ရှိကြပါတယ်။ တကယ်ရော လူတိုင်းနဲ့ တည့်ရဲ့လား။ ဆက်ဖတ်ကြည့်လိုက်ရအောင်။
🟢 (နှစ်ဖက်ချွန်အားဆေး) ဆိုတာ ဘာလဲ
သူက သာမန်အားဆေးသက်သက် မဟုတ်ပါဘူး။ အဓိကအားဖြင့် သံဓာတ် (Iron) ပါဝင်သလို ကြေးနီဓာတ် (Copper) နဲ့ မန်ဂနိစ် (Manganese) တို့ ပေါင်းစပ်ထားတဲ့ သွေးအားဖြည့်ဆေးရည် တစ်မျိုးဖြစ်ပါတယ်။
🟢 ဘယ်လိုလူတွေ သောက်သင့်လဲ
ဒီဆေးက အောက်ပါအချက်တွေရှိမှ သောက်သင့်တဲ့ ဆေးပါ။
✅ သံဓာတ်ချို့တဲ့လို့ သွေးအားနည်းနေသူများ (Iron Deficiency Anemia): မျက်ခမ်းဖြူဖျော့နေမယ်၊ မောပန်းလွယ်မယ်၊ ဆံပင်ကျွတ်မယ်၊ ရင်တုန်မယ် စတဲ့လက္ခဏာတွေရှိပြီး သွေးစစ်ကြည့်လို့ သွေးအားနည်းနေမယ်(သံဓာတ်ချို့တဲ့ခြင်းကြောင့် သွေးအားနည်းခြင်း) ဆိုရင်သောက်သင့်ပါတယ်။
✅ ကိုယ်ဝန်ဆောင်မိခင်များ: ကိုယ်ဝန်ဆောင်ချိန်မှာ သံဓာတ်လိုအပ်ချက်များလာလို့ ဆရာဝန်ညွှန်ကြားချက်နဲ့ သောက်နိုင်ပါတယ်။
✅ ခွဲစိတ်ကုသမှု ခံယူထားသူများ: ခွဲစိတ်မှုကြောင့် သွေးဆုံးရှုံးမှုများထားသူတွေ ပြန်လည်သောက်သုံးသင့်ပါတယ်။
🔴 ဘယ်သူတွေ လုံးဝ (လုံးဝ) မသောက်သင့်ဘူးလဲ
ဒါက အရေးအကြီးဆုံးအချက်ပါပဲ။
❌ Thalassemia (သာလာဆီးမီးယား) လို့ခေါ်တဲ့ မွေးရာပါ သွေးအားနည်းရောဂါ) ရှိသူများ:
ဒီရောဂါရှိသူတွေက ခန္ဓာကိုယ်ထဲမှာ သံဓာတ်တွေ ပုံမှန်ထက် ပိုများနေတတ်ပါတယ်။ ထပ်သောက်လိုက်ရင် သံဓာတ်အဆိပ်သင့်ပြီး အသည်းနဲ့ နှလုံးကို ထိခိုက်စေနိုင်လို့ လုံးဝမသောက်ရပါဘူး။
❌ သံဓာတ် ပုံမှန်ရှိနေသူများ: ဘာရောဂါမှမရှိဘဲ အားဆေးသဘောမျိုးနဲ့ ရေရှည်စွဲသောက်ရင် သံဓာတ်ပိုလျှံပြီး ဘေးထွက်ဆိုးကျိုး ဖြစ်နိုင်ပါတယ်။
⚠️ သောက်သုံးခြင်းရဲ့ ကောင်းကျိုးနဲ့ ဆိုးကျိုးများ
* ကောင်းကျိုး: သံဓာတ်ချို့တဲ့သူတွေအတွက် သွေးအားအမြန်တက်စေတယ်။ အရည်ပုံစံဖြစ်လို့ စုပ်ယူမှုအားကောင်းတယ်။
* ဆိုးကျိုး (ဘေးထွက်လက္ခဏာများ):
* ဝမ်းအရောင် မည်းသွားတတ်ပါတယ် (ဒါက ပုံမှန်ပါပဲ၊ မလန့်ပါနဲ့)။
* သွားအရောင် ညိုမည်းတတ်ပါတယ် (ဒါကြောင့် ပိုက် (Straw) လေးနဲ့ စုပ်သောက်တာ ပိုကောင်းပါတယ်)။
* တချို့လူတွေမှာ ရင်ပြည့်ရင်ကယ်ဖြစ်တာ၊ ဝမ်းချုပ်တာ သို့မဟုတ် ဝမ်းလျှောတာမျိုး ဖြစ်တတ်ပါတယ်။
💡 အကြံပြုချက်
နှစ်ဖက်ချွန်ဆေး သောက်မယ်ဆိုရင် အစာမစားခင် (သို့) အစာစားပြီး ၂ နာရီလောက်ခြားပြီး သောက်တာ အကောင်းဆုံးပါ။ Vitamin C ပါတဲ့ သံပုရာရည်၊ လိမ္မော်ရည်တို့နဲ့ တွဲသောက်ရင် သံဓာတ်စုပ်ယူမှု ပိုကောင်းစေပါတယ်။ (ကော်ဖီ၊ လက်ဖက်ရည်နဲ့တော့ တွဲမသောက်ရပါဘူးနော်)။
ကိုယ့်မှာ သွေးအားနည်းတာက သံဓာတ်လိုလို့လား၊ တခြားအကြောင်းအရင်းကြောင့်လားဆိုတာ သေချာစစ်ဆေးပြီးမှ သောက်သုံးကြဖို့ မေတ္တာရပ်ခံပါရစေခင်ဗျာ။
-(စာဖတ်သူမိတ်ဆွေတို့ထဲမှာရော အားရှိအောင်ဆိုပြီး နှစ်ဖက်ချွန်ဆေးကို နေ့တိုင်းသောက်နေတဲ့သူတွေ ရှိလား... ရှိရင် Comment မှာ မန့်ခဲ့ပေးပါဦးနော် )
-ကျန်းမာရေးဗဟုသုတတွေ နေ့စဉ်ဖတ်ရှုဖို့ Dr. Ye Page ကို See First လုပ်ထားဖို့ မမေ့နဲ့နော်။
အားလုံးပဲ ကျန်းမာကြပါစေ
ဒေါက်တာရဲ။
#ကျန်းမာရေးဗဟုသုတ #သွေးအားနည်းရောဂါ
