04/06/2026
သွေးဆုတ်သွေးလန့် (shock) လူနာအား ရှေးဦးပြုစုခြင်း
++++++++++++++++++++++++++++++
သွေးဆုတ်သွေးလန့်လက္ခဏာများ
• အရေပြား ဖြူဖျော့ပြီး အေးစက်ကာ ချွေးစေးများ ထွက်နေခြင်း။
• နှုတ်ခမ်း သို့မဟုတ် လက်သည်းခြေသည်းများ ပြာနှမ်းလာခြင်း။
• ဂဏာမငြိမ်ဖြစ်ခြင်း၊ စိတ်ရှုပ်ထွေးခြင်း သို့မဟုတ် သတိလစ်မေ့မြောခြင်း။
• အသက်ရှူ မြန်ပြီး စိတ်မရှည်သလို ဖြစ်နေခြင်း။
• သွေးခုန်နှုန်း (Pulse) အလွန်မြန်ပြီး စမ်းရခက်ခြင်း (သို့မဟုတ်) အားပျော့ခြင်း။
သွေးဆုတ်သွေးလန့်လူနာအား ရှေးဦးပြုစုနည်း အဆင့်ဆင့်
အရေးပေါ်အကူအညီ ချက်ချင်းခေါ်ပါ
လူနာကို ပက်လက်လှဲစေပြီး ခြေထောက်ကို မြှင့်ပေးပါ (Shock Position)
• လူနာကို ကုန်းစောင်းမရှိသော ညီညာသည့် ကြမ်းပြင်ပေါ်တွင် ပက်လက်လှဲအိပ်စေပါ။
• ဦးနှောက်နှင့် နှလုံးဆီသို့ သွေးလှည့်ပတ်မှု ပိုမိုရောက်ရှိစေရန် လူနာ၏ ခြေထောက်နှစ်ဖက်ကို အနည်းဆုံး ၁ ပေခန့် (ခေါင်းထက်မြင့်အောင်) ခေါင်းအုံး သို့မဟုတ် အဝတ်လိပ်များ ခံ၍ မြှင့်ထားပေးပါ။
• ခြွင်းချက်: လူနာတွင် ဦးခေါင်း၊ လည်ပင်း၊ ခါးရိုး ဒဏ်ရာရထားသည်ဟု သံသယရှိပါက သို့မဟုတ် ခြေထောက်ကျိုးထားပါက လူနာကို လုံးဝမရွှေ့ပါနှင့်၊ ခြေထောက်မမြှင့်ပါနှင့်။
အသက်ရှူ လွယ်ကူအောင် လုပ်ဆောင်ပါ
• လူနာ ဝတ်ဆင်ထားသော တင်းကျပ်သည့် အကျႌကော်လာ၊ ခါးပတ် နှင့် အဝတ်အစားများကို လျှော့ပေးပါ။
• လေကောင်းလေသန့် ရရှိစေရန် လူနာဘေးတွင် လူစုလူဝေး မလုပ်ပါနှင့်။
လူနာကို နွေးထွေးအောင် ထားပါ
• သွေးလန့်နေစဉ် ခန္ဓာကိုယ်အပူချိန် ကျဆင်းတတ်သဖြင့် လူနာကို စောင် (သို့မဟုတ်) အကျႌအထူတစ်ထည်ဖြင့် ခြုံပေးထားပါ။
သတိလစ်သွားပါက ဘေးစောင်းထားပါ (Recovery Position)
• လူနာသည် အန်နေပါက သို့မဟုတ် ပါးစပ်မှ သွေးထွက်နေပါက အန်ဖတ်ဆို့ပြီး အသက်ရှူလမ်းကြောင်း မပိတ်စေရန် လူနာကို ဘေးစောင်းအနေအထား ပြောင်းပေးပါ။
လိုအပ်ပါက CPR ချက်ချင်းစတင်ပါ
• လူနာသည် အသက်မရှူတော့ပါက သို့မဟုတ် နှလုံးခုန်ရပ်သွားပါက ဆေးဘက်ဆိုင်ရာအကူအညီများ မရောက်မချင်း ရင်ဘတ်ဖိခြင်း (CPR) ကို ချက်ချင်းလုပ်ဆောင်ပေးပါ။
❌ လုံးဝ (လုံးဝ) မလုပ်ရမည့်အချက်များ (Health Tips & Warnings)
• ရေ သို့မဟုတ် အရည် လုံးဝမတိုက်ပါနှင့်: လူနာက ရေဆာသည်ဟု ပြောလျှင်ပင် ရေ လုံးဝမတိုက်ရပါ။ Shock ရနေသူသည် အချိန်မရွေး သတိလစ်သွားနိုင်ပြီး တိုက်လိုက်သော အရည်များ အသက်ရှူလမ်းကြောင်းထဲ ဝင်သွားကာ အသက်ရှူကျပ်ပြီး သေဆုံးနိုင်ပါတယ်။ (နှုတ်ခမ်းခြောက်နေပါက ရေစိုအဝတ်ဖြင့်သာ အသာအယာ တို့ပေးပါ)။
• လူနာကို အလောတကြီး မထိုင်ခိုင်း/မတ်တတ်မရပ်ခိုင်းပါနှင့်: ယင်းက ဦးနှောက်သို့ သွေးရောက်ရှိမှုကို ရုတ်တရက် ရပ်တန့်သွားစေနိုင်ပြီး အခြေအနေကို ပိုမိုဆိုးရွားစေသည်။
• ဒဏ်ရာများကို လျစ်လျူမရှုပါနှင့်: Shock ရခြင်းသည် သွေးထွက်လွန်ခြင်းကြောင့် ဖြစ်ပါက ဒဏ်ရာကို အဝတ်သန့်သန့်ဖြင့် ဖိ၍ သွေးတိတ်အောင် အရင်လုပ်ဆောင်ပါ။
Dr. Hazel
Ref: Mayo clinic, WebMD, St. John Ambulance
